އަފްޣާނިސްތާނުގެ ހާލަތުންް ރާއްޖެއަށް ނުރައްކަލެއް އޮތްތޯ ބަލަނީ
އެ ގައުމުގައި އެހީއަށް ބޭނުންޖެހިފައިވާ މީހުންނަށް އިންސާނީ އެހީތެރިކަން ފޯރުކޮށްދިނުމަށް ކުރެވިދާނެ ކަންކަން ދެނެގަތުމަށް ވެސް ހުށަހަޅުއްވާފައިވޭ
އީވާ އަބްދުﷲ - ރައްޔިތުންގެ މަޖިލީހުގެ ނައިބު ރައީސް
އަފްޣާނިސްތާނުގައި ހިނގަމުންދާ ހަމަނުޖެހުންތަކުގެ ސަބަބުން ދިވެހިރާއްޖެއަށް ނުރައްކަލެއް ކުރިމަތިވެގެން ހިނގައިދާނެތޯ ބެލުމަށް ރައްޔިތުންގެ މަޖިލީހުގެ ނާއިބުރައީސް އީވާ އަބްދުﷲ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ) ގައި އެދިވަޑައިގެންފިއެވެ.
ނާއިބުރައީސް އީވާ ވަނީ 241 ކޮމިޓީގެ މުގައްރިރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމަށް ހޯމަ ދުވަހު ސިޓީއެއް ފޮނުއްވާފައެވެ. މި ސިޓީގައި ވަނީ އަފްޣާނިސްތާނު މިހާރުގެ ހާލަތުގެ ސަބަބުން ރާއްޖެއަށް އެއްވެސް ނުރައްކަލެއް އޮތްތޯ ބަލައި، ކަމާގުޅޭ އިދާރާތަކުން ހަދާފައިވާ ރިސްކު އެސެސްމަންޓް ދެނެގަތުމަށް އެފަދަ ރިސްކް އެސެސްމަންޓެއް ހެދުމަށް ހުށަހަޅުއްވާ ކަމަށެވެ.
މީގެ އިތުރުން އީވާ ވަނީ އެ ގައުމުގައި އެހީއަށް ބޭނުންޖެހިފައިވާ މީހުންނަށް އިންސާނީ އެހީތެރިކަން ފޯރުކޮށްދިނުމަށްޓަކައި ދިވެހިރާއްޖެއިން ކުރެވިދާނެ ކަންކަން ދެނެގަތުމަށް ވެސް ހުށަހަޅުއްވާ ކަމަށް ވިދާޅުވެފައެވެ.
އަފްޣާނިސްތާނުގައި ޠާލިބާނުންގެ ބާރު ގަދަވާން ފަށާފައިވަނީ އެގައުމުގައި ތިބި ބޭރު ގައުމުތަކުގެ ފައުޖުތައް މި އަހަރުގެ ތެރޭގައި ފައިބާނެކަން ހާމަކުރުމާއެކުއެވެ. އެއާއެކު ޠާލިބާނުންގެ ބާރުގަދަވެ އެގައުމުގައި އުފެދިފައިވާ ސަރުކާރު ވަނީ ނިމުމަކަށް އައިސްފައެވެ. އަދި ޠާލިބާނުންވަނީ އަފްޣާނިސްތާނުގައި ކުރިޔަށްދިޔަ ހަނގުރާމަ ނިމިފައިވާކަން އިއުލާންކޮށްފައެވެ. އަދި މިހާރު މަސައްކަތްކުރަމުން އަންނަނީ އައު ސަރުކާރެއް އެކުލަވާލުމަށް ކަމަށް ޠާލިބާނުން ވަނީ ހާމަކޮށްފައެވެ.
މީ އިތުރުން އަފްޣާނިސްތާނުގެ ސަރުކާރު، އެމީހުންގެ ބާރުގެ ދަށަށް ގެނެސް ބޭއްވި ފުރަތަމަ ނޫސްވެރިންގެ ބައްދަލުވުމުގައި ޠާލިބާންގެ ތަރުޖަމާނު ޒަބިހުއްލާ މުޖާހިދު ވިދާޅުވީ, އެމީހުން އަންހެނުންގެ ހައްގުތަކަށް އިހުތިރާމުކުރާނެ ކަމަށެވެ. އަންހެނުން ވަޒީފާއަށް ނުކުތުމާއި, އަންހެން ކުދިން ތައުލީމު ހާސިލްކުރުމަށް ސްކޫލްތަކަށް ދިޔުމަށް ހުރަސް ނާޅާނެ ކަމަށް ވެސް ތަރުޖަމާނު ވިދާޅުވިއެވެ.
