އިންކުއަރީ ރިޕޯޓް: ދުރު ރާސްތާ ރެކޮމެންޑޭޝަންތައް ތަންފީޒު ކުރެވެން އަންނަނީ މިދައުރު ނިމޭހިސާބުގައި
ޢައްބާސް ފާއިޒްއާ ބައްދަލުކުރައްވައި މަޝްވަރާކުރައްވާފައިވޭ
ރައީސުލްޖުމްހޫރިއްޔާ ނޭޝަނަލް ސެކިއުރިޓީ ކައުންސިލާއެކު ކުރިއަށްގެންދެވި ބައްދަލުވުމުގެ ތެރެއިން
ރައްޔިތުން މަޖިލީހުގެ ރައީސް، ރައީސް މުޙައްމަދު ނަޝީދު އަވަހާރަކޮށްލުމަށް ދިން ޓެރަރިސްޓް ހަމަލާއާ ގުޅިގެން 241 ކޮމިޓީން ކުރިޔަށް ގެންދިޔަ އިންކުއަރީ ރިޕޯޓްގައި ފާހަގަކޮށްފައިވާ ރެކޮމެންޑޭޝަންތަކުގެ ދުރު ރާސްތާ ރެކޮމެންޑޭޝަންތައް ތަންފީޒު ކުރެވެން އަންނަނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ މި ދައުރު ނިމޭ ހިސާބުގައި ކަމަށް ނެޝަނަލް ސެކިއުރިޓީ އެޑްވައިޒަރ އިން މައުލޫމާތު ދީފައިވާ ކަމަށް މެއި 6 ކޮމިޓީގެ މުޤައްރިރު އަދި ވިލުފުށީ ދާއިރާގެ މެމްބަރު ޙަސަން ޢަފީފު ވިދާޅުވެއްޖެއެވެ.
ބުދަ ދުވަހުގެެރޭ ބޭއްވި އެމްޑީޕީގެ ޤައުމީ މަޖިލީހުގެ ބައްދަލުވުމުގައި ވާހަކަ ދައްކަވަމުން ޢަފީފު ވިދާޅުވީ، ކޮމިޓީގެ އެންމެ މުހިންމު މަސައްކަތަކީ, ރައީސް ނަޝީދަށް އަމާޒުކޮށް ދިން ހަމަލާގެ ތަހުގީގު ކުރިއަށްދާ ގޮތް ބެލުން ކަމަށެވެ. އެގޮތުން މިހަފުތާގެ ހޯމަ ދުވަހުގެ ހަވީރު 4:00ގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ކަނޑައަޅުއްވާފައިވާ ޚާއްސަ މަންދޫބު ޢައްބާސް ފާއިޒްއާ ބައްދަލުކުރައްވާފައިވާ ކަމަށެވެ. އޮންލައިންކޮށް ބޭއްވި ބައްދަލުކުރެއްވުމުގައި މުހިންމު މައުލޫމާތުތަކެއް ހިއްސާކުރެވުނު ކަމަށް ޢަފީފު ވިދާޅުވިއެވެ. މިވަގުތު ޢައްބާސް އިނގިރޭސިވިލާތުގައި ހުންނެވި ނަމަވެސް ވަރަށް ގާތުން, ތަހުގީގު ކުރިއަށްދާގޮތް ބައްލަވާކަން ފާހަގަކުރައްވައި ޢަފީފު ވިދާޅުވީ މިހަމަލާގެ ތަހުގީގު ކުރިއަށްދާ ގޮތާމެދު އެބޭފުޅާ ހިތްޕުޅުހަމަ ޖެހޭ ކަމަށެވެ. ނަމަވެސް މިހަމަލާއަށް ފަންޑު ކުރި މީހުން ހޯދެން ޖެހޭކަމަށް ޢައްބާސް ވެސް ގަބޫލުކުރައްވާކަން މިބައްދަލުވުމުގައި ވިދާޅުވެފައިވާ ކަމަށް ޢަފީފު ވިދާޅުވިއެވެ.
ޢަފީފު ވިދާޅުވީ މިހަފްތާ ތެރޭގައި, ޔޫތު މިނިސްޓްރީއާ ވަގުތީ ގޮތުން ހަވާލުވެ ހުންނެވި ޓޫރިޒަމް މިނިސްޓަރު ޑރ. ޢަބްދުﷲ މަޢުޞޫމްއާ ބައްދަލުކުރެއްވުމަށް މަސައްކަތް ކުރެއްވި ނަމަވެސް އެބައްދަލުވުން އަންނަ އަންގާރަ ދުވަހަށް ލަސްވެފައިވާ ކަމަށެވެ.
ބުދަ ދުވަހު ނޭޝަނަލް ސެކިއުރިޓީ އެޑްވައިޒަރުގެ ބޭފުޅުންނާ ބައްދަލުކުރެއްވިކަން ފާހަގަކުރައްވައި ޢަފީފު ވިދާޅުވީ އިންކުއަރީ ރިޕޯޓްގައި ފާހަގަކޮށްފައިވާ ރެކޮމެންޑޭޝަންތައް ތަންފީޒު ކުރުމަށް ކުރާ މަސައްކަތްތަކާއި, ތަންފީޒު ކުރެވޭ މިންވަރު ގާތުން ބައްލަވާނެ ކަމަށެވެ. އަދި މި ރެކޮމެންޑޭޝަންތައް ތަންފީޒު ކުރުމަކީ ސަލާމަތީ ޚިދުމަތްތަކާއި ބެހޭ މުއައްސަސާތަކުގެ ޒިންމާއެއް ކަމަށް ދެކެވަޑައިގަންނަވާތީ އެމައުލޫމާތު އޮޅުން ފިލުއްވަން މަސައްކަތް ކުރެއްވި ކަމަށެވެ. ނަމަވެސް އެމްއެންޑީއެފްގެ ބޭފުޅުންނާ ބައްދަލުކުރެއްވުމަށް މަސައްކަތް ކުރެއްވި ނަމަވެސް އެކަން ކާމިޔާބުވެފައިނުވާ ކަމަށެވެ.
ޢަފީފު ވިދާޅުވީ އެންއެސްއޭއަކީ ތަންފީޒީ އިދާރާއެއް ނޫން ކަމަށާއި، އެއީ ކޯޑިނޭޝަން ބޮޑީއެއް ކަމަށެވެ. އެންއެސްއޭގެ ބޭފުޅުންނާއި ހަވާލާދެއްވައި ޢަފީފު ވިދާޅުވީ ރެކޮމެންޑޭޝަންތައް ތަންފީޒު ކުރުމަށް ތިން ބަޔަކަށް ބަލާފައި ކަމަށެވެ. އެއީ ކުރު ރާސްތާގައި ތަންފީޒު ކުރަން ފަށާ ރެކޮމެންޑޭޝަންތަކާއި މެދު ރާސްތާގައި ތަންފީޒު ކުރަން ފަށާ ރެކޮމެންޑޭޝަންތަކާއި އަދި ދުރު ރާސްތާގައި ތަންފީޒު ކުރަން ފަށާ ރެކޮމެންޑޭޝަންތައް ކަމަށެވެ. ދުރު ރާސްތާ ރެކޮމެންޑޭޝަންތައް ތަންފީޒު ކުރެވެން އަންނަނީ ރައީސް ޞާލިޙުގެ ދައުރު ނިމޭ ހިސާބުގައި ކަމަށް ޢަފީފު ވިދާޅުވިއެވެ. އަދި ރެކޮމެންޑޭޝަންތައް ތަންފީޒުކުރުމަށް ކުރިއަށް ގެންދާ ގޮތްތަކެއް ނޭނގޭ ކަމަށާއި، އެމައުލޫމާތު ހިއްސާކޮށްފައިނުވާ ކަމަށެވެ.
އެންއެސްއޭއަށް މެއި 6 ކޮމެޓީގެ ފަރާތުން ހުށަހަޅާފައިވާ ކަންތައްތަކަށް އަލިއަޅުއްވާލައްވައި ޢަފީފު ވިދާޅުވީ ހަރުކަށި ފިކުރު މިރާއްޖެއިން ނައްތާލުމަށް ކުރަމުންދާ މަސައްކަތުގައި ސްކޫލް ކުދިންނާއި ޒުވާނުންނަށް ޚާއްސަ ސަމާލުކަމެއް ދޭންޖެހޭ ކަމަށެވެ. ސްކޫލްތަކާއި ތައުލީމުދޭ ބައެއް މަރުކަޒުތަކުގައި އިސްލާމް ޓީޗަރުން ދޭ މައުލޫމާތުތަކުގެ ސަބަބުން ހަރުކަށި ފިކުރަށް ކުދިން އެނބުރޭކަމުގެ މައުލޫމާތު ލިބިފައިވާތީ އެކަން ގާތުން ބެލުމަށް އެދިފައިވާ ކަމަށެވެ. އަދި ވިދާޅުވީ ކިޔަވައިދިނުމަށް ދާ އިސްލާމް ޓީޗަރުންނަކީ ހަރުކަށި ފިކުރުގެ ބައެއް ނޫންކަން ކަށަވަރުކުރަން ޖެހޭ ކަމަށެވެ. އަދި މިކަންކަން އިސްލާމިކް މިނިސްޓްރީއާ ހިއްސާކުރެވި މަޝްވަރާކޮށްފައިވާކަމަށެވެ.
މީގެ އިތުރުން ނޭޝަނަލް ސެކިއުރިޓީ ޤާނޫނު ހެދިފައިނުވާތީ އެޤާނޫނު މަޖިލީހާ ހަމައަށް ގެނައުމަށް ކުރަމުންދާ މަސައްކަތްތަކާއި، ސިފައިންގެ ގާނޫނަށް ގެންނަން ނިންމާފައިވާ ބަދަލުތައް ގެނެސް، އެ ގާނޫނު މަޖިލީހަށް ފޮނުވޭނެ މުއްދަތާ ބެހޭގޮތުން މަޝްވަރާކޮށްފައިވާ ކަމަށް ޢަފީފު ވިދާޅުވިއެވެ.
