ޕާކު ކޮށްފައި އޮތް އިޒްރޭލް ޕާސްޕޯޓު މަނާކުރުމުގެ ބިލުގެ މަސައްކަތް ކުރިއަށްދާކަމަށް ވިދާޅުވެ ފަލާހު އިތުރުފުޅުހައްދަވައިފި
ޕާސްޕޯޓު ކޮމިޓީގައި އޮންނަތާ 93 ދުވަސް
އިޒްރޭލް ޕާސްޕޯޓް މަނާކުރުމުގެ ބިލުގެ މަސައްކަތް ހިނގާކަމަށް ވިދާޅުވި އިރު ކޮމިޓީގައި އެ ބިލުގެ އެއްވެސް މަސައްކަތެއް ކޮށްފައި ނުވޭ
ރައްޔިތުންގެ މަޖިލީހުގެ 241 ކޮމިޓީގައި ޕާކު ކޮށްފައި އޮތް އިޒްރޭލް ޕާސްޕޯޓު މަނާކުރުމުގެ ބިލުގެ މަސައްކަތް ކުރިއަށްދާކަމަށް ވިދާޅުވެ އިނގުރައިދޫ ދާއިރާގެ މެމްބަރު އިބްރާހިމް ފަލާހު އިތުރުފުޅު ހައްދަވައިފިއެވެ.
ވެރިކަން ކުރާ ޕީއެންސީ އަދި މަޖިލީހުގެ ސުޕަރ މެޖޯރިޓީ އޮންނަ ޕީއެންސީގެ ޕާލަމެންޓްރީ ގްރޫޕުގެ ލީޑަރު ފަލާހު ބޭއްވި ނޫސްވެރިންގެ ބައްދަލުވުމުގައި ވިދާޅުވީ އިޒްރޭލު ޕާސްޕޯޓު މައްސަލަ އޮތީ ރައްޔިތުންގެ މަޖިލީހުގެ 241 ކޮމިޓީގައި ކަމަށެވެ. އެ މަސައްކަތް ކުރިއަށްދާ ކަމަށެވެ. އަދި ރައްޔިތުން ކަންބޮޑުވާން ނުޖެހޭ މިންވަރަށް އެކަންކަން ހަލުވިކަމާއެކު ކުރިއަށްދާނެ ކަމަށާއި، މަޖިލީހުގެ ދެވަނަ ދައުރުގައި އެ މަސައްކަތް ކުރިއަށްދާނެ ކަމަށެވެ.
އިޒްރޭލު ޕާސްޕޯޓު މަނާކުރާ ބިލު ކޮމިޓީގައި ތާށިވެފައި އޮންނަތާ 90ށް ވުރެ ގިނަ ދުވަސް ވެފައިވާއިރު، ސަރުކާރުގެ ތެރެއިން އެއްވެސް ވަރަކަށް އެކަމުގެ ކަންބޮޑުވުން ފާޅުކޮށްފައި ނުވެއެވެ. އަދި އެ މަސައްކަތް މަޖިލީހުގެ ތެރެއިން އަވަސްކުރުމަށްވެސް މަސައްކަތް ނުކުރެއެވެ.
ރައްޔިތުންގެ މަޖިލީހުގެ ވެބްސައިޓުގައިވާ ގޮތުން ސަލާމަތީ ހިދުމަތްތަކާއި ބެހޭ ކޮމިޓީގައި ފުރަތަމަ ދައުރުގައި ކޮށްފައިވަނީ 8 މަސައްކަތެވެ. 13 ކޮމިޓީ ބައްދަލުވުން ބާއްވާފައިވެއެވެ. ނަމަވެސް އެއްވެސް ބައްދަލުވުމެއްގައި ޕާސްޕޯޓުގެ މަސައްކަތެއް ކޮށްފައި ނުވެއެވެ. އަދި އެޖެންޑާވެސް ކޮށްފައި ނުވެއެވެ.
29 މެއި 2024 ގައި މަޖިލީހަށް ހުށަހެޅި، 10 ޖޫން 2024 ވަނަ ދުވަހު (20 ވަނަ ރައްޔިތުންގެ މަޖިލީހުގެ 4 ވަނަ ޖަލްސާގައި) ދިވެހިރާއްޖޭގެ އިމިގްރޭޝަންގެ ގާނޫނު އަށް އިސްލާހު ގެނައުމުގެ ބިލު މަޖިލީހުން ބަލައިގަތުމަށް ފާސްވެ، ސަލާމަތީ ޚިދުމަތްތަކާބެހޭ ކޮމެޓީއަށް ވަނީ ފޮނުވާފައެވެ. އިޒްރޭލް ޕާސްޕޯޓް މަނާ ކުރުމަށް ރާއްޖޭގެ އިމިގްރޭޝަން އާ ބެހޭ ގާނޫނަށް އިސްލާހް ގެނައުމަށް ރައްޔިތުންގެ މަޖިލީހަށް ހުށަހެޅި ބިލު ކޮމެޓީގައި އޮތް އިރު އޭގެ ފަހުން މަޖިލީހަށް ހުށަހެޅުނު ސަމޯއާ އެގްރީމެންޓްގެ މައްސަލަ މަޖިލީހުން ވަނީ ފާސްކޮށްފައެވެ.
ރައީސް އޮފީހުން 2 ޖޫން 2024 ގައި ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރު އަލީ އިހުސާން ވަނީ އިޒްރޭލު މީހުން ރާއްޖެ އަށް އެތެރެވޭ ގޮތަށް އޮންނަ އޮތުން ބަދަލުކުރަން ގާނޫނު އިސްލާހު ކުރަން ސަރުކާރުން އެ ދުވަހު ނިންމިކަން އިއުލާން ކުރައްވާފައެވެ. ނަމަވެސް އޭގެފަހުން މިއަދާ ހަމައަށް މި ބިލާ ގުޅޭ އެއްވެސް މަސައްކަތެއް ސަރުކާރުން ކޮށްފައިނުވެއެވެ.
އިޒްރޭލް ޕާސްޕޯޓް ބޭންކުރުމާއި ގުޅޭގޮތުން ސަރުކާރުގެ ސްޓޭންޑަށް ބަލާއިރު، ސަރުކާރުގެ ފަރާތުން ބަންޑާރަނައިބު އަހުމަދު އުޝާމް ވިދާޅުވެފައިވަނީ އިޒްރޭލްގެ ޕާސްޕޯޓް މަނާކުރުމަށް ހުށަހަޅާފައިވާ ބިލް އޮތްގޮތަށް ފާސްކޮށްފިނަމަ ދަތިތައް ދިމާވެދާނެކަމަށާއި، އެހެންކަމުން ސަރުކާރުން އެ ބިލަށް އިސްލާހު ހުށަހަޅާނެ ކަމަށެވެ. ނަމަވެސް މިހާތަނަށް ވެސް އެ ބިލުގެ މަސައްކަތް ކޮމިޓީގައި ކޮށްފައި ނުވެއެވެ. އަދި ސަރުކާރުގެ ފަރާތުން އިސްލާހެއް ވެސް ހުށަހަޅާފައި ނުވެއެވެ.
އުޝާމް ވިދާޅުވީ އިޒްރޭލު ޕާސްޕޯޓު މަނާކުރުމުގެ ބިލު މިހާރު ހުށަހެޅިފައި އޮތް ގޮތަށް ފާސްކޮށްފިނަމަ، ބައެއް ކަހަލަ "ކޮމްޕްލިކޭޝަންސް" އައުމުގެ ފުރުސަތު އެބައޮތްކަމަށެވެ. އެހެންކަމުން 241 ކޮމިޓީގައި މަޝްވަރާ ކުރުމަށް ފަހު، ބަންޑާރަނައިބުގެ ފަރާތުން ވެސް އިސްލާހުތައް ހުށަހަޅުއްވާނެ ކަމަށެވެ.
އިޒްރޭލް ރައްޔިތުންނަށް ރާއްޖެއަށް ނާދެވޭ ގޮތަށް ބިލު ހުށަހަޅާފައި ވަނީ، އިމިގްރޭޝަން ގާނޫނުގެ އަށް ވަނަ މާއްދާގެ ފަހަތަށް އަކުރެއް އިތުރުކުރާ ގޮތަށެވެ. އެގޮތުން އެ އަކުރުގައި ބުނެފައިވަނީ ރާއްޖެއަށް އެތެރެވުން މަނާ މީހުންގެ ތެރޭގައި އިޒްރޭލް ޕާސްޕޯޓު ގެންގުޅޭ މީހުންނާއި އިޒްރޭލް ޕާސްޕޯޓު އޮންނަ އެހެން ގައުމެއްގެ ޕާސްޕޯޓު އޮންނަ މީހުން ހިމެނުމަށެވެ.
ބިލުގައި މިހެން އޮތުމުން އިޒްރޭލް ރައްޔިތުންގެ ތެރެއިން ޑުއަލް ސިޓިޒަންޝިޕްގައި ތިބޭ މީހުންނަށްވެސް ރާއްޖެއަށް އެތެރެނުވެވޭނެއެވެ. މާނައަކީ އެމެރިކާ ރައްޔިތަކަަށްވިޔަސް އޭނާ އަތުގައި އިސްރާއިލު ޕާސްޕޯޓެއް އޮންނަ ނަމަ ރާއްޖެއަށް ނާދެވޭނެއެވެ. އަދި އިސްރާއިލު ރައްޔިތަކަށްވެފައި އެހެން ގައުމުގެ ސިޓިޒިންޝިޕް އޮތަސް ނާދެވޭނެއެވެ.
ބަންޑާރަ ނައިބު ވިދާޅުވީ ބްލޭންކެޓްކޮށް އިޒްރޭލު ޕާސްޕޯޓް މަނާކުރުމާ މެދު ކަންބޮޑުވުން އެބައޮތް ކަމަށެވެ.
