ކޮޕް26 ގެ ރިޔާސަތު ބަލަހައްޓަވާ އަލޮކް ޝަރްމާއާ ފޮރިން މިނިސްޓަރު ޝާހިދު ބައްދަލުކުރައްވައިފި
ކޮޕް26އަށް ތައްޔާރުވުމަށް ދިވެހިރާއްޖެއިން ކުރަމުންދާ މަސައްކަތްތަކާ ބެހޭ މައުލޫމާތު ހިއްސާކުރެއްވި
އަލޮކް ޝަރްމާއާއެކު ފޮރިން މިނިސްޓަރު އަބްދުﷲ ޝާހިދު ބޭއްވެވި ބައްދަލުކުރެއްވުމަށްފަހު
މޫސުމީ ބަދަލުތަކާ ބެހޭ ބައިނަލްއަޤްވާމީ ބައްދަލުވުން، ކޮޕް26 ގެ ރިޔާސަތު ބަލަހައްޓަވާ އަލޮކް ޝަރްމާއާ ފޮރިން މިނިސްޓަރު އަބްދުﷲ ޝާހިދު ބައްދަލުކުރައްވައިފިއެވެ.
ކޮޕް26 ބައްދަލުވުން އޮންނާނީ އަންނަ އޮކްޓޯބަރު މަހު އިނގިރޭސިވިލާތުގެ ގްލެސްގޯގައެވެ.
އަލޮކްއާއެކު މިނިސްޓަރ ޝާހިދު، ލަންޑަންގައި ބޭއްވި މި ބައްދަލުކުރެއްވުމުގައި އދ.ގެ އާއްމު މަޖިލީހުގެ 76 ވަނަ ދައުރުގައި ރިޔާސަތުން އިސްކަން ދެއްވާނެ ކަންތައްތަކާ ގުޅޭ ގޮތުންނާއި، ކޮޕް26އަށް ތައްޔާރުވުމަށް ދިވެހިރާއްޖެއިން ކުރަމުންދާ މަސައްކަތްތަކާ ބެހޭ މައުލޫމާތު މިނިސްޓަރު ޝާހިދު ވަނީ އަލޮކް ޝަރްމާއަށް އަރުވާފައެވެ.
މޫސުމީ ބަދަލުތަކާއި، ދުނިޔެއަށް ބޭނުންވާ މުހިއްމު ކަންތައްތަކަކީ މިނިސްޓަރު ޝާހިދު އދ.ގެ އާއްމު މަޖިލީހުގެ ރިޔާސަތު ބަލަހައްޓަވާއިރު އިސްކަން ދެއްވާނެ މުހިއްމު ބައެއް ކަންތައްތަކެވެ.
މީގެ އިތުރުން މިނިސްޓަރު ޝާހިދު ވަނީ ސައުދީ ޢަރަބިއްޔާގެ ޚާރިޖީ ވަޒީރު އަމީރް ފައިސަލް ބިން ފަރްހާންއާ ފޯނުން ގުޅުއްވައި މަޝްވަރާކުރައްވާފައެވެ. އެގޮތުން ދެޤައުމުގެ ދެމެދުގައި އޮންނަ ގުޅުމާ ބެހޭ ގޮތުންނާއި، ސަރަހައްދީ އަދި ބައިނަލްއަޤްވާމީ މައްސަލަތަކާ ބެހޭ ގޮތުން ވެސް ދެ ބޭފުޅުން މަޝްވަރާކުރެއްވިއެވެ.
