ސަރުކާރުން ތިމަރަފުށީގައި އިމާރާތް ކުރަމުންދާ ހައުސިން ޔުނިޓްގެ މަސައްކަތް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ބައްލަވާލައްވައިފިއެވެ.

ކޮޅުމަޑުލުގެ ބައެއް ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ތިމަރަފުށީގައި އިމާރާތްކުރާ ހައުސިންގ ޔުނިޓްގެ މަސައްކަތް ރައީސް ބައްލަވާލައްވާފައިވަނީ ބުދަ ދުވަހުގެ ހެނދުނު އެ ސަރަހައްދަށް ވަޑައިގެންނެވެ.

ތިމަރަފުށީގައި އަލަށް އިމާރާތްކުރާ 100 ހައުސިން ޔުނިޓަކީ މި ސަރުކާރުން ފެށި މަޝްރޫއެކެވެ. މިނިސްޓްރީ އޮފް ޕްލޭނިންގ ހައުސިން އެންޑް އިންފްރާސްޓަރަކްޗާ އިން އެސްޖޭ ކޮންސްޓްރަކްޝަން ޕްރައިވެޓް ލިމިޓެޑާ ހަވާލުކޮށްގެން ކުރިއަށް ގެންދާ މި މަޝްރޫއުގެ މަސައްކަތް ފަށާފައިވަނީ މި އަހަރުގެ ޖެނުއަރީ މަހުގެ 23 ވަނަ ދުވަހުއެވެ. މި މަސައްކަތް ނިންމުމަށް ދީފައިވާ މުއްދަތަކީ 364 ދުވަހެވެ. އަދި މި އަހަރުގެ ނޮވެމްބަރު މަހުގެ 9 ވަނަ ދުވަހުގެ ކުރިން މަސައްކަތް ނިންމާލެވޭނެކަަމަށް ހައުސިން މިނިސްޓްރީން އަންދާޒާ ކުރެއެވެ.

މި މަޝްރޫއަކީ 71.5 މިލިއަން ރުފިޔާ ޚަރަދުކޮށްގެން ކުރިއަށްގެންދާ މަޝްރޫއެކެވެ. ހައުސިން މިނިސްޓްރީން ބުނީ މި މަޝްރޫއުގެ ދަށުން އެއްބުރީގެ 100 ހައުސިން ޔުނިޓު އިމާރާތް ކުރާނެ ކަމަށާއި ކޮންމެ ޔުނިޓެއްގައި ތިން ކޮޓަރިއާއި ތިންފާހާނާ އަދި ބަދިގެ އާއި ސިޓިން ރޫމްގެ އިތުރުން ލޯންޑްރީ ބައެއް ވެސް ހިމެނޭނެ ކަމަށެވެ.

މި ޕްރޮޖެކްޓްގެ ދަށުން 100 ހައުސިން ޔުނިޓް އަލަށް އިމާރާތް ކުރެވިގެންދާ އިރު، މީގެ ތެރެއިން 64 ގޭގެ ރޫފް ބީމްގެ މަސައްކަތާއި، ރޭނުގެ މަސައްކަތް ވަނީ ނިމިފައެވެ. 42 ގެއެއްގައި ސިމެންތި ޖެހުމުގެ މަސައްކަތް ނިމިފައިވާ އިރު، 56 ގޭގެ ރޫފް ޓްރަސް ހަރުކޮށް ވަނީ ނިމިފައެވެ. އަދި 32 ގެ ހިޔާކޮށް ނިމިފައިވާ ކަމަށް ހައުސިން މިނިސްޓްރީން ބުނެއެވެ.