މާޒިޔާ ނުކުންނާނީ ދިވެހި ފުޓްބޯޅަ ދިފާއުކުރަން: ވިޑަކޮވިޗް

އޭއެފްސީ ކަޕުގެ ގްރޫޕް ޑީގެ ފުރަތަމަ މެޗުގައި ބަންގްލަދޭޝްގެ ޗެމްޕިއަން ބަޝުންދަރާ ކިންގްސްއާ ދެކޮޅަށް ނުކުންނާނީ ދިވެހި ފުޓްބޯޅަ ދިފާއުކުރުމަށް ކަމަށް ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނުގެ ކޯޗު ރިސްޓޯ ވިޑަކޮވިޗް ބުނެފިއެވެ.

އޭއެފްސީ ކަޕުގެ ދެކުނު އޭޝިއާއަށް ޚާއްސަ ގްރޫޕުގައި މި ފަހަރު އޮތް ރާއްޖޭގެ ހަމައެކަނި ޓީމަކީ މާޒިޔާއެވެ. ދެން ގްރޫޕް ސްޓޭޖުގައި ހިމެނެނީ ބަޝުންދަރާގެ އިތުރުން އިންޑިއާގެ މޯހަން ބަގާން އާއި ބެންގަލޫރު އެފްސީއެވެ. ގްރޫޕް ސްޓޭޖުގެ ޖާގައެއް ބެންގަލޫރު ހޯދާފައިވަނީ މިދިޔަ އާދީއްތަ ދުވަހުގެރޭ ކުޅުނު ޕްލޭއޮފް މެޗުގައި ރާއްޖޭގެ ކުލަބު އީގަލްސް 1-0 ގެ ނަތީޖާއަކުން ބަލިކޮށްގެންނެވެ.

ބަޝުންދަރާއާ ދެކޮޅަށް ބުދަ ދުވަހުގެރޭ ކުޅެން އޮތް މެޗުގެ ކުރިން އަންގާރަ ދުވަހު ބޭއްވި ނޫސްވެރިންގެ ބައްދަލުވުގައި ވާހަކަދައްކަމުން ވިޑަކޮވިޗް ބުނީ މި މުބާރާތުގައި މާޒިޔާގެ ޒިންމާ ދިވެހި ފުޓްބޯޅައަށް ބޮޑުވާނެ ކަމަށެވެ. އެހެންކަމުން މާޒިޔާ މި މެޗަށް ނުކުންނާނީ ދިވެހި ފުޓްބޯޅަ ދިފާއުކުރުމަށް ކަމަށާއި، މާޒިޔާގެ މުޅި ޓީމުންވެސް މެޗަށް 100 އިންސައްތަ ދޭނެ ކަމަށްވެސް ވަނީ ބުނެފައެވެ.

އޭއެފްސީ ކަޕާ ކުރިމަތިލާއިރު، މާޒިޔާއިން ވަނީ މުބާރާތުގެ ކުރިން ސައުދީ އަރަބިއްޔާގައި ކޭމްޕުކޮށްފައެވެ. އެ ކޭމްޕުގައި މާޒިޔާއިން އެކުވެރިކަމުގެ ތިން މެޗެއް ކުޅުނުއިރު، ފުރަތަމަ މެޗުން ވަނީ އަލް-އިއްތިހާދުގެ ޒުވާން ޓީމު އަތުން 2-1 ގެ ނަތީޖާއަކުން މޮޅުވެފައެވެ. އަދި ދެވަނަ މެޗުގައި އަލް ވަހްދާ އެފްސީއާ ދެކޮޅަށް ކުޅެ، ލަނޑެއް ނުޖެހި އެއްވަރުކުރިއިރު، ފަހު މެޗުން ވަނީ ޖިއްދާ އެފްސީއާވެސް އެއްވަރުކޮށްފައެވެ.

ސައުދީގައި ކުރިއަށްގެންދިޔަ ކޭމްޕާ ބެހޭ ގޮތުން ވާހަކަ ދައްކަމުން ވިޑަކޮވިޗް ބުނީ ސައުދީގައި ކުރި ތަމްރީނުތަކަކީ ފުރިހަމަ ތަމްރީނުތަކެއް ކަމަށާއި، އެކަމަކު ތަމްރީނުތަކުގައި ކުޅުނު އެކުވެރި ކަމުގެ މެޗުތަކާ އަޅާބަލާއިރު މި މުބާރާތް އުނދަގޫވާނެ ކަމަށެވެ. އަދި އެ މެޗުތަކުގައި މޯޓިވޭޝަނާއި މެޗު ޕްރެޝަރުގެ ކަންކަން ހުންނާނީ ރަސްމީ މެޗުތަކާ އެއްވަރަށް ނޫން ކަމަށްވެސް ވަނީ ބުނެފައެވެ.

ނޫސްވެރިންގެ މި ބައްދަލުވުމުގައި ވާހަކަ ދައްކަމުން މާޒިޔާގެ ކެޕްޓަން އަސަދުﷲ އަބްދުﷲ ބުނީ ރާއްޖޭގައި މެޗުތައް ކުޅެން ޖެހުމަކީ ލިބުނު ހިތްހަމަޖެހުމެއް ކަމަށާއި، އަދި ސަޕޯޓަރުންނާއި ނުލައި މެޗުތައް ކުޅެން ޖެހުނު ނަމަވެސް، ގައުމީ ފުޓްބޯޅަ ދަނޑަށް އެންމެ ފަރިތަވާނީ ދިވެހި ކުޅުންތެރިން ކަމަށެވެ. އެހެންކަމުން އޭގެ ފައިދާ ނެގޭނެ ކަމަށްވެސް ވަނީ ބުނެފައެވެ.

އޭއެފްސީ ކަޕުގެ ގްރޫޕް ޑީގައި ބަޝުންދަރާ އާއި މާޒިޔާ ބައްދަލުކުރާ މެޗު ފަށާނީ ބުދަ ދުވަހުގެރޭ ރާއްޖެ ގަޑިން 21:00 ގައެވެ.