ތިލަމާލެ ބުރިޖް އެޅުމަަށް މިއީ އެންމެ ރަނގަޅު ވަގުތު - އަމީރު

ތިލަމާލެ ބުރިޖް އެޅުމަށް މިއީ އެންމެ ރަނގަޅު ވަގުތު ކަމުގައި ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެއެވެ،

ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަފުޅު ދައްކަވަމުން މިނިސްޓަރު އަމީރު ވިދާޅުވީ، ކޮންމެ ދަރަންޏަކީ އެއް ހަަމައަކުން ގުނޭނެ ދަރަންޏެއް ނޫން ކަމަށާއި، އިންޑިއަން އެގްޒިމް ބޭންކުން ބްރިޖް އެޅުމަށް ނަގާ ލޯނަކީ، 5 އަހަރުގެ ގްރޭސް ޕީރިއަޑަކާއެކު 1.57 އިންސައްތަ އިންޓަރެސްޓާއެކު ލިބޭ ލޯނެއް ކަމަށެވެ. ލޯނު ދައްކަން ދީފައިވާ މުއްދަތަކީ 15 އަހަރު ކަމަށެވެ. މުޅިއެކު 20 އަހަރު ލޯނު ދައްކަން ލިބޭއިރު، މިއީ މާރކެޓްގައި ލޯނު ލިބޭ ރޭޓަށްވުރެ ވަރަށް ބޮޑު ލުއިތަކަކާއެކު ލިބޭ ލޯނެއްކަން މިނިސްޓަރު ފާހަގަކުރެއްވިއެވެ.

މިނިސްޓަރު ވިދާޅުވީ ކޮވިޑްގެ ހާލަތުގައި ރާއްޖޭގެ އިގްތިސާދު މިހާ ދަށްވެފައި އޮތް ވަގުތެއްގައި ދައުލަތަށް ބޮޑު އާމްދަނީއެއް ނުލިބޭއިރު މިވަގުތު ލުއި ގޮތަކަށް ފަންޑު ލިބި މަސައްކަތް ފަށައިގަތުމަށް މިއީ އެންމެ ރަނގަޅު ދަނޑިވަޅު ކަމުގައެވެ. ދައުލަތަށް އާމްދަނީ ލިބޭނެ އެހެން ދޮރުތައް ވަރަށް ބޮޑަށް ހަނިވެފައިވާ ދަނޑިވަޅެއްގައި މިއީ ރާއްޖޭގެ އިގްތިސާދަށް ވަރަށް ބޮޑު ބޫސްޓެއް ލިބޭނެ ބްރިޖެއްގެ ގޮތުގައި މިނިސްޓަރު ފާހަގަކުރެއްވިއެވެ.

ފަންޑް ލިބިފައި އޮތް ދަނޑިވަޅުގައި މަސައްކަތްކޮށް ނިންމާލުމުން، އިގްތިސާދު އާއްމު ހާލަތަށް ދާއިރު ހުރިހާ ކަމަކުން އަރައިގަތުމަށް މަސައްކަތް ކުރެވޭނެ ކަމަށް މިނިސްޓަރު ވިދާޅުވިއެވެ. ގްރޭޓަރ މާލެ ބްރިޖަކުން ގުޅިގެން ދިޔުމުން، ކޮމާރޝަލް ޕޯޓް ވެސް ފީސިބްލް އެއްޗަށްކަށް ބަދަލުވެގެންދާނެކަން މިހާރު ހެދިފައި ހުރި ދިރާސާތަކުން ދައްކާ ކަމަށް މިނިސްޓަރު ވިދާޅުވިއެވެ. ކޮމާރޝަލް ޕޯޓާއި ބްރިޖްގެ އިންވެސްޓްމެންޓަކީ، މިހާރު ފަށައިގަންނަން މުހިއްމު ކަމެއްގެ ގޮތުގަައި މިނިސްޓަރު ފާހަގަކުރެއްވިއެވެ. އަދި 100 މިލިއަން ޑޮލަރުގެ ހިލޭ އެހީވެސް ލިބިފައި އޮތް މި ދަނޑިވަޅުގައި މަސައްކަތް ފަށައިގަތުން އެއީ އަމާޒު ކަމުގައި މިނިސްޓަރު ވިދާޅުވިއެވެ.

ތިލަމާލެ ބްރިޖްގެ ދިރާސާތައް ހެދުމަށްފަހު، މަސައްކަތް ހަވާލުކުރުމުގެ ތައްޔާރީތައް މިހާރު އަންނަނީ ކުރަމުންނެވެ.