މުދާ އިމްޕޯޓް ކުރާ ފަރާތްތަކުން އޮންލައިން ޕޯޓަލް މެދުވެރިކޮށް ފައިސާ ދެއްކުމަށް އެމްޕީއެލުން އަންގައިފި
ޕޯޓަލް މެދުވެރިކޮށް ދައްކާ ފައިސާގެ ރަސީދު ޕޯޓަލުން ފެންނަން ހުންނާނެ
އެމްއެސްއެސްގެ ފުރަތަމަ ބޯޓު ރާއްޖޭގެ ވިޔަފާރި މައި ބަނދަރު އެމްޕީއެލްއަށް ކައިރިކުރުން
މުދާ އިމްޕޯޓް ކުރާ ފަރާތްތަކުން އޮންލައިން ޕޯޓަލް މެދުވެރިކޮށް ފައިސާ ދެއްކުމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އަންގައިފިއެވެ.
އެ ކުންފުނިން ބުނީ މުދާ އިމްޕޯޓް ކުރާ ފަރާތްތަކުން ހޯދާ ޚިދުމަތްތަކަށް ލުއި ފަސޭހަކޮށް ފައިސާ ދެއްކޭނެ އިންތިޒާމު ހަމަޖެއްސުމަށާއި ކުންފުނިން ފޯރުކޮށްދޭ ޚިދުމަތްތައް ޒަމާނީ ކުރުމަށް ގެންނަމުންދާ ބަދަލުތަކުގެ ތެރެއިން ކުންފުނީގެ އޮންލައިން ޕޯޓަލް މެދުވެރިކޮށް ފައިސާ ދެއްކޭނެ އިންތިޒާމް ކުންފުނިން ހަމަޖައްސާފައިވާ ކަމަށެވެ. އަދި މި ބަދަލު ގެނައިީ ޑިޖިޓަލް ވަސީލަތްތައް މެދުވެރިކޮށް ދެވޭ މާލީ ޚިދުމަތްތައް ކުރިއަރުވައި، ރާއްޖޭގެ އިޤްތިސާދުގައި ޗެކާއި ނަގުދު ފައިސާއަށް ބަރޯސާވާ މިންވަރު މަދުކޮށް، ޑިޖިޓަލް ވަސީލަތްތައް މެދުވެރިކޮށް ފައިސާ ބަލައިގަތުމަށް ފިނޭންސް މިނިސްޓްރީން އެންގުމުން ކަމަށް ވަނީ ބުނެފައެވެ.
އެމްޕީއެލުން އިތުރަށް ބުނީ އޮންލައިން ޕޯޓަލް މެދުވެރިކޮށް ފައިސާ ދެއްކެން ހުންނަ ޚިދުމަތްތަކަށް އެ ކުންފުނީގެ ބޭންކް އެކައުންޓަށް ސީދާ ފައިސާ ޓްރާންސްފަރ ކޮށްގެން ފައިސާ ބަލައިގަތުމުގެ ޚިދުމަތް ހުއްޓާލުމަށް ނިންމާފައިވާ ކަމަށެވެ. އަދި ޕޯޓަލް މެދުވެރިކޮށް ދައްކާ ފައިސާގެ ރަސީދު ޕޯޓަލުން ފެންނަން ހުންނާނެ ކަމަށެވެ.
އޮންލައިން ޕޯޓަލުން ފޯރުކޮށްދޭ ޚިދުމަތްތައް ފިޔަވާ އެހެނިހެން ޚިދުމަތްތައް ހޯދާ ފަރާތްތަކާއި އަދި ބޯޓުފަހަރުގެ އެޖެންޓުން ފައިސާ ދެއްކުމަށް މިހާރު ވެސް އަމަލު ކުރަމުންދާ އުސޫލަށް އަމަލު ކުރުމަށް ވަނީ އަންގާފައެވެ.
އެމްޕީއެލްގެ މައި ބަނދަރު ޕޭމަންޓް ގޭޓްވޭ ފަސޭހަ ޚިދުމަތްތަކާއެކު ދާދި ފަހުން ވަނީ އަޕްގްރޭޑްކޮށްފައެވެ. މައި ބަނދަރު ޕޯޓަލްއިން ވެސް ލިންކު ބޭނުންކޮށް ޕޯޓަލްއިން ބޭރުން ވެސް ފައިސާ ދެއްކުމުގެ އިންތިޒާމާއި އަދި، މޯބައިލް ޕޭގެ ޚިދުމަތް ލިބޭނެ ގޮތް ވެސް ވަނީ ހަމަޖައްސާފައެވެ. ހުރިހާ ކުންފުނިތަކާއި އަމިއްލަ ފަރާތްތަކާއި އަދި ޝިޕިންގ އޭޖެންޓުންނަށް ވެސް ފަސޭހަކޮށް އެމްޕީއެލްއަށް ދައްކަންޖެހޭ ފައިސާގެ މުއާމަލާތްތައް އޮންލައިންކޮށް ދެއްކޭނެއެވެ.
