މި އަހަރުގެ މެއި މަހުގެ ތެރޭގައި އޭއެފްސީ ކަޕުގެ ޕްލޭއޮފް މެޗު ކުޅުނުނަމަ މާ ރަނގަޅުވާނެ ކަމަށް އިންޑިއާގެ ބެންގަލޫރު އެފްސީގެ ކޯޗު މާކޯ ޕެއްޒައިއޯލީ ބުނެފިއެވެ.

ޕްލޭއޮފް މެޗު އާދީއްތަ ދުވަހުގެރޭ ގައުމީ ފުޓްބޯޅަ ކުޅޭއިރު، މީގެ ކުރިން މި މެޗު މެއި މަހުގެ 11 ވަނަ ދުވަހު ކުޅެންވެސް ތާވަލުކުރިއެވެ. އެކަމަކު އެ މެޗު ފަސްކުރަން ޖެހުނީ އެ ފަހަރު މާލެއައި ބެންގަލޫރު ޓީމު ކޮވިޑް-19 ގެ އުސޫލުތަކާ ޚިލާފުވުމުންނެވެ.

އަލުން ޕްލޭއޮފް މެޗާ ކުރިމަތިލާއިރު ބެންގަލޫރުން ވަނީ މުބާރާތުގެ ގްރޫޕް ސްޓޭޖަށް ވަނުމުގެ އަމާޒުގައި ގިނަ ކުޅުންތެރިންތަކެއްގެ ސޮއި ހޯދާފައެވެ. އެގޮތުން މިހާތަނަށް އެ ޓީމަށް ސޮއިކޮށްފައިވާ ކުޅުންތެރިންނަކީ ކޮންގޯގެ ގައުމީ ޓީމުގެ ފޯވާޑް ޕްރިންސް އިބަރާ އާއި، ކުރިން ޗެންނާއީ އާއި މޯހަން ބަގާންއަށް ކުޅުނު މިޑްފީލްޑަރު ޖަޔޭޝް ރާނޭ އާއި، ބްރެޒިލް ލީގުން ގެނައި ޑިފެންޑަރު އެލަން ކޮސްޓާ އާއި، މިދިޔަ ސީޒަނުގެ އެންމެ ގިނަ ލަނޑު ޖެހި ޒުވާން ފޯވާޑް ބިދްޔާޝަގަރު ސިންހް އާއި، އީސްޓް ބެންގޯލުގެ ޑިފެންޑަރު ސަތާކް ގޯލުއީ އާއި، ފޯވާޑް ހަމަންފްރީތު ސިންހް އާއި، ރިއަލް ކަޝްމީރު ޓީމުން ގެނައި ދާނިޝް ފާރޫގް އަދި ކެރަލާ ބްލާސްޓާސްގެ މިޑްފީލްޑަރު ރޯހިތު ކުމާރެވެ.

ޕްލޭއޮފް މެޗުގެ ކުރިން ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން މާކޯ ބުނީ މި މެޗާ ކުރިމަތިލާއިރު ބެންގަލޫރުގައި އަނިޔާގެ މައްސަލަތައް އެބަހުރި ކަމަށެވެ. އެގޮތުން 29 ކުޅުންތެރިން ހިމެނޭ ސްކޮޑެއްގައި މެޗު ކުޅެން މާލެ އައިސްފައިވަނީ 26 ކުޅުންތެރިން ކަމަށްވެސް ވަނީ ބުނެފައެވެ.

މާކޯ ބުނީ އޭރު އޮތް ހާލަތަށް ބަލާއިރު މެއި މަހުގެ ތެރޭގައި މެޗު ކުޅުނުނަމަ ބެންގަލޫރަށް މާ ރަނގަޅު ކަމަށެވެ. އެގޮތުން އެ ފަހަރުގެ މެޗަށް ވަރަށް ރަނގަޅަށް ތައްޔާރުވެވުނު ކަމަށާއި، އެކަމަކު ސީޒަނުގެ މެދުތެރެއިން އަލުން މެޗު ކުޅެން ޖެހުމާއެކު، ބެންގަލޫރު ޓީމުގެ މިހާރުގެ ހާލަތު އެހާ ރަނގަޅު ނޫން ކަމަށްވެސް ވަނީ ބުނެފައެވެ. އަދި ގިނަ ދުވަސްތަކެއް ވަންދެން ބަބްލް އެއްގައި ކުޅުންތެރިން ތިބެން ޖެހުނު ކަމަށާއި، އެހެންކަމުން އޭގެ އަސަރުވެސް ކުޅުންތެރިންނަށް ކުރާނެ ކަމަށް މާކޯ ވަނީ ބުނެފައެވެ.

މި ފަހަރުގެ އޭއެފްސީ ކަޕުގެ ކޮލިފައިންގައި އީގަލްސްއާ ދެކޮޅަށް ބެންގަލޫރު ނިކުންނައިރު، މިދިޔަ އަހަރުގެ މުބާރާތުގެ ކޮލިފައިން ޕްލޭއޮފްގެ ދެ ލެގުންވެސް އެ ޓީމު ވަނީ ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަން އަތުން ބަލިވެފައެވެ. ނޫސްވެރިންގެ ބައްދަލުވުމުގައި ވާހަކަދައްކަމުން ބެންގަލޫރުގެ ކެޕްޓަން ސުނިލް ޗެތުރީ ބުނީ މި މެޗަށް ތައްޔާރުވުމަށް ހަތަރު ހަފުތާއަށް ރަނގަޅު ފަރިތަކުރުންތަކެއް ކުރިއަށް ގެންދެވުން ކަމަށެވެ. އަދި މިދިޔަ އަހަރުގެ މުބާރާތުގައި މާޒިޔާ އަތުން ދެ ފަހަރުވެސް ބަލިވިއިރު، އެ ފަހަރުގެ މުބާރާތުގައި ކުޅުންތެރިންނަށް އެންމެ އެދެވޭ ކުޅުން ދެއްކިފައި ނުވާ ކަމަށާއި، އެހެންކަމުން މާޒީ ހަނދާން ނައްތާލުމަށްފަހު މިހާރުގެ އަމާޒަކީ މި އަހަރުގެ މުބާރާތުގެ ގްރޫޕް ސްޓޭޖުން ޖާގައެއް ހޯދުން ކަމަށްވެސް ވަނީ ބުނެފައެވެ.

އޭއެފްސީ ކަޕުގެ ގްރޫޕް ސްޓޭޖުގައި މި ވަގުތު އޮތީ ރާއްޖޭގެ މާޒިޔާގެ އިތުރުން އިންޑިއާގެ މޯހަން ބަގާން އާއި ބަންގްލަދޭޝްގެ ބަޝުންދަރާ ކިންގްސްއެވެ. ގްރޫޕް ސްޓޭޖުގެ ފަހު ޖާގަ އީގަލްސް އާއި ބެންގަލޫރު ކުޅޭ މެޗުން މޮޅުވާ ޓީމަކަށް ލިބޭއިރު، އީގަލްސް އާއި ބެންގަލޫރު ކުޅޭ މެޗު ފަށާނީ އާދީއްތަ ދުވަހުގެރޭ ރާއްޖެ ގަޑިން 20:00 ގައެވެ.