މެއިންޓަނެންސް ފީގެ ގޮތުގައި ނަގާ އަދަދުން ބާކީވާ ފައިސާ ފްލެޓްތަކުގެ ވެރިފަރާތަަށް ދޭނެ: ސުހައިލް
14 އޯގަސްޓު 2021 | ހޮނިހިރު 08:51އެޗްޑީސީން ފްލެޓްތަކުގެ މެއިންޓަނެންސްގެ މަސައްކަތް ކުރާނީ ގާތްގަނޑަކަށް އެއްއަހަރު ދުވަހަށް
ހުޅުމާލޭގެ ދެވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓްތައް،
ހިޔާ ފުލެޓްތަކުގެ މެއިންޓަނެންސް ފީގެ ގޮތުގައި ނަގާ އަދަދުން ބާކީވާ ފައިސާ ފްލެޓްތަކުގެ ވެރިފަރާތަަށް ދޭނެ ކަމަށް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިންގ ޑިރެކްޓަރ ސުހައިލް އަހުމަދު ވިދާޅުވެއްޖެއެވެ.
ހިޔާ ފްލެޓްތަކުގެ އެންމެ ފަހުގެ މައުލޫމާތު ދިނުމަށް ހޮނިހިރު ދުވަހު ހުރަވީ ސްކޫލުގައި ބޭއްވި ނޫސްވެރިންގެ ބައްދަލުވުމުގައި ސުހައިލް ވިދާޅުވީ އެޗްޑީސީން ފްލެޓްތަކުގެ މެއިންޓަނެންސްގެ މަސައްކަތް ކުރާނީ ގާތްގަނޑަކަށް އެއްއަހަރު ދުވަހަށް ކަމަށާއި، ދާއިމީ ގޮތެއްގައި އެމަސައްކަތް ނުކުރާނެ ކަމަށެވެ. އަދި އެޗްޑީސީން ބާރު އަޅަނީ އެތަނުގައި ދިރިއުޅޭ މީހުން ޖަމިއްޔާއެއް ނޫނީ ބޮޑީއެއް އުފައްދައިގެން އެމަސައްކަތް ކުރުމަށް އިސްނެގުމަށް ކަމަށެވެ.
ސުހައިލް ވިދާޅުވީ ފުލެޓްތަކުގެ މެއިންޓަނަންސް މަސައްކަތާ އެޗްޑީސީން ހަވާލުވެފައިވަނީ ފުލެޓްތައް ދޫކުރާ އަހަރަށް ވެފައި، މަސައްކަތްތައް އިންތިހާއަށް ބުރަ ވެގެންދާނެތީ ކަމަށެވެ.
ފުލެޓްތަކުގެ މެއިންޓެނެންސް ފީގެ ގޮތުގައި ނަގަނީ 1000 ރުފިޔާއެވެ. ނަމަވެސް އެ ފީ ވެސް ބޮޑު ކަމަށް ބުނެ ބައެއް މީހުން ކަންބޮޑުވުން ފާޅުކޮށްފައިވެއެވެ.
މެއިންޓަނެންސް ފީގެ ގޮތުގައި ނަގާ އަދަދުން ބާކީވާ ފައިސާ ފްލެޓްތަކުގެ ވެރިފަރާތަަށް ދޭން ނިންމާފައިވާއިރު، ހިޔާ ފްލެޓްތަކުގެ ކުލި ކުޑަ ނުކުރެވޭނެ ކަމަށް ސުހައިލް ވިދާޅުވެފައިވެއެވެ. ހިޔާ ފްލެޓު ލިބުނު މީހުންގެ ކަންބޮޑުވުންތައް ހިއްސާކުރުމަށް ހިޔާ ޔޫނިއަނުން ސުލްހަވެރި އެއްވުމެއް ހުކުރު ދުވަހުގެ ހަވީރު ބާއްވާފައިވެއެވެ. މި އެއްވުމުގައި ހިޔާ ފްލެޓުތައް ލިބުނު ގިނަ އަދަދެއްގެ މީހުން ވަނީ ބައިވެރިވެފައެވެ. އެމީހުން ވަނީ މި އެއްވުމުގައި ބައިވެރިވެ އެމީހުންގެ ކަންބޮޑުވުންތައް ހިއްސާކޮށްފައެވެ.
