ފެނަކައިގެ ކޮރަޕްޝަންގެ މައްސަލަތަކެއް އޭސީސީން ދަނީ ބަަލަމުން: ރައީސް
އޭގެ ތެރެއިން އެއްވެސް މައްސަލައެއް ކޯޓާ ހިސާބަށް ދާން ޖެހޭނަމަ އެ މައްސަލަ ކުރިއަށްދާނެ ކަމަށް ވިދާޅުވި
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް
ފެނަކަ ކޯޕަރޭޝަންގެ ކޮރަޕްޝަންގެ މައްސަލަތަކެއް އެންޓި ކޮރަޕްޝަން ކޮމިޝަން (އޭސީސީ) އިން ބަލަމުންދާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވިދާޅުވެއްޖެއެވެ.
ރައީސް ވިދާޅުވީ ކުރީގައި ވެސް ފެނަކައިގެ ކޮރަޕްޝަންގެ މައްސަލަތަކުގެ ވާހަކަ އަންނަ ކަމަށާއި އެކަމާ ގުޅިގެން އޭސީސީއަށް މައްސަަލަތައް ހުށަހެޅި، އެ މައްސަލަތައް ބަލަމުންދާ ކަމަށެވެ. އަދި އޭގެ ތެރެއިން އެއްވެސް މައްސަލައެއް ކޯޓާ ހިސާބަށް ދާން ޖެހޭނަމަ އެ މައްސަލަ ކުރިއަށްދާނެ ކަމަށާއި އެކަމުގެ ދެމެދަށް ވަދެ، އެކަން ހުއްޓުވުމުގެ ވިސްނުމެއް ސަރުކާރުން ނުގެންގުޅުއްވާ ކަމަށް ރައީސް ވިދާޅުވިއެވެ.
ރައީސް މިހެން ވިދާޅުވެފައިވާއިރު މިހާރު އޭސީސީން ބަލަމުންދަނީ ކުރީގެ ސަރުކާރުން ނުވަތަ މި ސަރުކާރުން ހިންގި ކޮރަޕްޝަންގެ އަމަލުތަކުގެ ވާހަކަ ކަމެއް ހާމައެއް ނުކުރައްވައެވެ. އެހެންނަމަވެސް ދާދި ފަހުން ސަރުކާރުގެ ތެރޭގައި ކޮރަޕްޝަންގެ އަމަލުތައް ހިންގަމުންދާތީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް، ފެނަކަ ކޯޕަރޭޝަންގެ މެނޭޖިންގް ޑިރެކްޓަރ އަޙުމަދު ސަޢީދު މުޙައްމަދު މަޤާމުން ދުރުކުރައްވަން އުޅޭކަމަށް ޚަބަރުތަކެއް ވަނީ ފެންމަތިވެފައެވެ. މިކަމާ ގުޅިގެން ރައީސް އޮފީހުގެ ތަރުޖަމާނު މުޙައްމަދު މަބްރޫކް ޢަޒީޒު ވަނީ އެ ވާހަކަތައް ދޮގުކުރައްވާފައެވެ.
މި ތުހުމަތުތަކަށް ޖަވާބުދާރީވެވަޑައިގެން ކުރެއްވި ޓުވީޓެއްގައި ސަޢީދު ވަނީ، ކޮރަޕްޝަންގެ އަމަލެއް ހިންގާފައެއް ނުވާނެކަމަށާއި، އަބުރު ކަތިލަން ދައްކާ ވާހަކަ ހުއްޓާލުމަށް އެދިވަޑައިގެންފައެވެ. އަދި އޭނާ ވަނީ ކޮރަޕްޝަންގެ އަމަލެއް ހިންގައިގެން އޭނާ ވަޒީފާއަކުން ވަކިކުރަން ނުޖެހޭނެކަމުގެ ޔަޤީންކަން ދެއްވާފައެވެ. މި ފަދަ ގޮތަކަށް ޚަބަރު ފަތުރަނީ އެއްވެސް އަސާސެއްގެ މައްޗަށް ބިނާވެގެން ނޫންކަން ފާހަގަކުރައްވައި، އަބުރު ކަތިލުމުގެ މަޤުޞަދުގައި ފަތުރާ ޙަޤީޤަތާ ޚިލާފު މިފަދަ ވާހަކަތައް ނުފެތުރުމަށް އޭނާ އެދިވަޑައިގެންނެވިއެވެ.
ފެނަކައިގެ ބައެއް މަޝްރޫއުތައް ހިންގާ ކޮންޓްރެކްޓަރުންނަށް މަސައްކަތުގެ ފައިސާ ނުދީ ހިފަހައްޓާފައިވާކަމަށް ބުނެ މީޑިއާއެއްގައި މި އަހަރުގެ ޖަނަވަރީ މަހު ޚަބަރެއް ވަނީ އާންމުކޮށްފައެވެ. ފެނަކައިން އޭރުވެސް ވަނީ އެ ކުންފުންޏާއެކު އެއްބަސްވުމެއްގެ ދަށުން ކުރެވޭ މަސައްކަތެއްގައި، ކޮންމެ ކޮންޓްރެކްޓަރަކަށް ވެސް ލިބިދޭންޖެހޭ ފައިސާ އެ އެއްބަސްވުމެއްގެ ރޫޙާ އެއްގޮތްވާގޮތުން، ނުދީ ނޯންނާނެކަމަށް ބުނެފައެވެ.
ސަރުކާރުގެ "ޒީރޯ-ޓޮލަރެންސް ޓު ކޮރަޕްޝަން" ސިޔާސަތަށް އެއްބާރުލުންދީ، ކޮރަޕްޝަނާ ދެކޮޅަށް މަސައްކަތްކުރުމުގެ އިޤުރާރެއްގައި އެންމެ ފުރަތަމަ ސޮއިކުރި އެއް ބަޔަކީ ފެނަކަ ކޯޕަރޭޝަންގެ މުވައްޒަފުންނެވެ. 2019 ވަނަ އަހަރުގެ ޖަނަވަރީ މަހު ސޮއިކުރި އިޤުރާރުގައި ސޮއިކުރުމަށްފަހު، ފެނަކަ ކޯޕަރޭޝަންގެ މެނޭޖިންގ ޑިރެކްޓަރ ވިދާޅުވީ، ކޮރަޕްޝަނާ ގުޅުންހުރި ކަންކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ގެންގުޅުއްވާ ޒީރޯ ޓޮލަރެންސް ސިޔާސަތަށް ފެނަކައިން ފުރިހަމައަށް ތާޢީދުކޮށް، އެކަމަށް އެކުންފުނިން އެއްބާރުލުން ދޭނެކަމަށެވެ. އަދި މި ޤަރާރަކީ ރަމްޒީކަމެއްގެ ގޮތުގައި ނުދެކި ޢަމަލީގޮތުން އެކަން ދެއްކުމަށް ފެނަކައިގެ ހުރިހާ މުވައްޒަފުންނަށް ސަޢީދު މުޙައްމަދު ވަނީ އިލްތިމާސްކުރައްވާފައެވެ.
ފެނަކައިގެ މުވައްޒަފުން ސޮއިކުރި އިޤުރާރު އެކުލަވާލާފައިވަނީ މައިގަނޑު 7 ކަމެއްގެ މައްޗަށެވެ. އޭގެ ތެރޭގައި ކޮރަޕްޝަނާދެކޮޅަށް އެކަންކަމާމެދު ހޭލުންތެރިކުރުވައި އެފަދަ މައްސަލަތައް ކަމާބެހޭ ފަރާތްތަކަށް ރިޕޯޓުކޮށް ފިޔަވަޅުއެޅުމާއި، މަޤާމުގެ މަސްއޫލިއްޔަތުތައް ނަޒާހަތްތެރިކަމާއެކު ކުރުންފަދަ ކަންކަން ހިމެނެއެވެ. މި އިޤުރާރުގައި ފެނަކަ ކޯޕަރޭޝަންގެ ހުރިހާ ގޮފިތަކަކުން ސޮއިކުރުމަށް ހަމަޖެހިފައިވާކަމަށް ފެނަކަ ކޯޕަރޭޝަނުން ބުނެއެވެ.
ސަޢީދުގެ ލީޑަޝިޕްގެ ދަށުން ވޭތުވެ ދިޔަ 2 އަހަރު ދުވަހުގެ ތެރޭގައި ވަނީ ބޮޑެތި ކާމިޔާބީތަކެއް ވެސް ހޯދާފައެވެ. އެގޮތުން އުފެދުނު ފަހުން، މިހާތަނަށް ވެސް ގެއްލުމުގައި ހިންގަމުން އައި ފެނަކަ ކޯޕަރޭޝަނަށް، ފުރަތަމަ ފަހަރަށް ސާފު ފައިދާގެ ގޮތުގައި 35 މިލިއަން ރުފިޔާ ފެނަކައިން ވަނީ ހާސިލުކޮށްފައެވެ.
ފެނަކަ ކުންފުނީގެ އޮޑިޓް ރިޕޯޓުގައިވާ ގޮތުން ކުންފުންޏަށް 2019 އަހަރު އާމްދަނީގެ ގޮތުގައި، 1.4 ބިލިއަން ރުފިޔާ ލިބިފައިވެއެވެ. އަދި ޚަރަދު ކެނޑުމަށްފަހު ތިރީސް ފަސް މިލިއަން ނުވަ ލައްކަ ސާދަ ހާސް ހަ ސަތޭކަ ސާޅީސް ތިން ރުފިޔާ، ފައިދާގެ ގޮތުގައި އެ ކުންފުންޏަށް ވަނީ ލިބިފައެވެ.
އޭގެ ކުރީން 2018 ވަނަ އަހަރު އެ ކުންފުންޏަށް އާމްދަނީގެ ގޮތުގައި 1.1 ބިލިއަން ރުފިޔާގެ އާމްދަނީ ލިބިފައިވާއިރު، 143 މިލިއަން ރުފިޔާގެ ގެއްލުންވެފައި ވެއެވެ. މީގެ އިތުރުން އެ ކުންފުނިން ވަނީ ކުންފުނީގެ ލާމަސީލު މަސައްކަތާއެކު ބައިނަލްއަޤްވާމީ އެވޯޑްތައް ވެސް ހާސިލުކޮށްފައެވެ.
