ހާލަތު ގޯސްވެ، ހިމަންދޫގައި ޖަމާއަތުގައި ނަމާދުކުރުން މެދުކަނޑާލައިފި
ޖަމާއަތުގައި ނަމާދުކުރުން މެދުކަނޑާލާފައިވަނީ 19 އޮގަސްޓްގެ ނިޔަލަށް
އއ.ހިމަންދޫ،
އއ. ހިމަންދޫގައި ކޮވިޑް-19 ހަލުހިމިނެއްގައި ފެތުރެމުންދާތީ ޖަމާޢަތުގައި ނަމާދުކުރުން މެދުކަނޑަލައިފިއެވެ.
ހިމަންދޫ ކައުންސިލުން ބުނީ ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19ގެ ހާލަތު އެރަށުގައި ގޯސްވެފައިވާ ކަމަށެވެ.
ކައުންސިލުން ބުނީ އެރަށުގައި 3 އޮގަސްޓް 2021 ވަނަ ދުވަހު ކޮވިޑް-19ށް މީހުން ތަކެއް ޕޮޒިޓިވްވެ، ކޮމިއުނިޓީ ސްޕްރެޑަކަށް ދިއުމުން، މޮނިޓަރިންގެ ހާލަތަށް ގެނެވި ރައްކާތެރިކަމުގެ ގޮތުން ގިނަ ފިޔަވަޅުތަކެއް އަޅަމުންދާ ކަމަށެވެ. ބަލި ކޮންޓްރޯލްކުރުމަށް ރައްޔިތުންގެ އެއްބާރުލުން ބޭނުންވާ ކަމަށާއި، ރަށު ލެވެލްގައި ކައުންސިލާއި، ޓާސްކުފޯސް އިން ގުޅިގެން ގިނަ ފިޔަވަޅުތަކެއް އަޅަމުންދާ ކަމަށް ކައުންސިލުން ބުނެއެވެ.
އެގޮތުން މިރޯގާ ފެތުރުން ހުއްޓުވުމަށް އަޅާ ރައްކާތެރިކަމުގެ ފިޔަވަޅެއްގެ ގޮތުން، 13 އޮގަސްޓް 2021 ވަނަ ދުވަހުގެ ފަތިސް ނަމާދުން ފެށިގެން 19 އޮގަސްޓް 2021 ވާ ބުރާސްފަތި ދުވަހުގެރޭ ޢިޝާ ނަމާދުގެ ނިޔަލަށް ހިމަންދޫ މަސްޖިދުލް އުލާގައި ފަރުޟު ނަމާދުތަކާއި ހުކުރު ނަމާދުގެ ޖަމާޢަތް ވަގުތީގޮތުން މެދުކަނޑާލުމަށް އިސްލާމިކް މިނިސްޓްރީން އަންގާފައިވާ ކަމަށް ކައުންސިލުން ބުނެއެވެ. މިދަނޑިވަޅުގައި މިސްކިތުގެ ޖަމާއަތުގައި ނަމާދު ނުކުރި ނަމަވެސް ފަރުޟު ފަސް ނަމާދު ބަރާބަރަށް އަދާކުރުމަށާއި، ސުންނަތް ނަމާދު ގިނަކޮށް، ގުރުއާން ކިޔަވައި، ގިނަގިނައިން ދުއާކޮށް، އިސްތިޣްފާރު ކުރުމަށް ކައުންސިލުން ވަނީ ނަސޭހަތްތެރިވެފައެވެ.
މީގެ އިތުރުން ކަމާގުޅޭ ފަރާތްތަކުން ދޭ އިރުޝާދުތަކާ އެއްގޮތަށް އަމަލުކުރުމަށް އިލްތިމާސްކޮށްފައިވެއެވެ. އަދި ރޯގާގެ އެއްވެސް އަލާމަތެއް ފެނިއްޖެނަމަ ލަސްނުކޮށް ޓެސްޓުކުރުމަށް އެދިފައިވެއެވެ. އަދި މާސްކު އެޅުމަށާއި، އިޖުތިމާއީ ގައިދުރުކުރުމަށް ޚާއްސަ ސަމާލުކަމެއް ދިނުމަށް ވެސް އިލްތިމާސްކޮށްފައިވެއެވެ.
ހިމަންދޫގައި ބުދަ ދުވަހުގެ ނިޔަލަށް 356 ސާމްޕަލެއް ނަގާފައިވެއެވެ. އޭގެ ތެރެއިން މިހާތަނަށް 142 މީހަކު ޕޮޒިޓިވްވެފައިވެއެވެ.
