ތިންވަނަ ޑިވިޝަން ފުޓްބޯޅަ މުބާރާތުގެ ސެމީ ފައިނަލަށް ކުލަބު އޮންލީ ވަން އޮޕޮޗުނިޓީ (އޯވަންއޯ)، ބުރު ސްޕޯޓްސް ކުލަބު، އެލްޓީ ސްޕޯޓްސް ކުލަބު އަދި ބިސް ބުރު ސްޕޯޓްސް ކުލަބު ދަތުރުކޮށްފިއެވެ.

މި މުބާރާތުގެ ސެމީއަށް މި ހަތަރު ޓީމު ދަތުރުކުރިއިރު، ސެމީން ފުރުސަތު ހޯދުމާއެކު ހަތަރު ޓީމުވެސް ވަނީ އަންނަ ސީޒަނުގެ ދެވަނަ ޑިވިޝަނަށް ޕްރޮމޯޓުވެފައެވެ.

ތިންވަނަ ޑިވިޝަނުގެ މެޗުތައް ކުރިއަށްދަނީ މާފަންނު ޓާފް އެއް ނަންބަރު ދަނޑުގައެވެ. ސެމީގެ ފުރަތަމަ ޖާގަ އޯވަންއޯއިން ހޯދީ ބުދަ ދުވަހުގެ ހަވީރު ކުޅުނު ކުއާޓާ ފައިނަލް މެޗުގައި ޓެންޓް ސްޕޯޓްސް ކުލަބު އަތުން 2-0 ގެ ނަތީޖާއަކުން މޮޅުވެގެންނެވެ. މި މެޗުގައި އޯވަންއޯގެ ލަނޑުތައް ޖަހައިދިނީ ޝަހީމް އަބްދުލް ގާދިރާއި އޮމޮދޫ ގޮޑްފްރޭ ވެސްޓެވެ.

ސެމީއަށް ބުރު ސްޕޯޓްސް ދަތުރުކުރީ ބުދަ ދުވަހުގެރޭ ކުޅުނު ކުއާޓާގެ މެޗުގައި ކެޕިޓަލް ސިޓީ ސްޕޯޓްސް ކުލަބު އަތުން 11-0 ގެ ތަފާތު ބޮޑު ނަތީޖާއަކުން މޮޅުވެގެންނެވެ. މި މެޗުގައި ބުރުގެ އަބްދުﷲ ޝާފިއު ވަނީ ހެޓްރިކް ހަދާފައެވެ. ދެން އެ ޓީމުގެ މުޙައްމަދު ތަސްމީން، ހުސެއިން ޝަރީފް އަދި ވަޑީމް ޕެޓްރޯވް ވަނީ ކޮންމެ ކުޅުންތެރިއަކު ދެ ލަނޑު ޖަހާފައެވެ. އަދި ޑިފެންޑަރު ރޯމަން ކުޑްޗެންކޯ އާއި މުޙައްމަދު އަތީފުވެސް ވަނީ މި މެޗުގައި ލަނޑެއް ޖަހާފައެވެ.

މީގެ އިތުރުން ސެމީއަށް އެލްޓީ ސްޕޯޓްސް ދަތުރުކުރީ ބުރާސްފަތި ދުވަހުގެ ހަވީރު ކުޅުނު ކުއާޓާގެ މެޗުގައި ލޮރެންޒޯ ސްޕޯޓްސް ކުލަބު އަތުން ޕެނަލްޓީ ޖަހައިގެން މޮޅުވެގެންނެވެ. މި މެޗުގެ ފުރިހަމަ ވަގުތު ހަމަވިއިރު ދެ ޓީމުން ކުރެ ޓީމަކަށް ލަނޑެއް ކާމިޔާބުކުރެވިފައެއް ނުވެއެވެ. އެހެންކަމުން ނަތީޖާ ނެރުމަށް ޕެނަލްޓީ ޖެހިއިރު، ޕެނަލްޓީގައި އެލްޓީ ސްޕޯޓްސް ކުރިހޯދީ 3-2 ގެ ނަތީޖާއަކުންނެވެ.

އަދި ސެމީގެ ފަހު ޖާގަ ބިސް ބުރުން ހޯދީ ބުރާސްފަތި ދުވަހުގެރޭ ކުޅުނު ކުއާޓާގެ މެޗުގައި ކުލަބު ޓީނޭޖް އަތުން ޕެނަލްޓީ ޖަހައިގެން މޮޅުވެގެންނެވެ. މި މެޗުގެ ފުރިހަމަ ވަގުތު ހަމަވިއިރު ދެ ޓީމު ވަނީ 1-1 ގެ ނަތީޖާއަކުން އެއްވަރުވެފައެވެ. އެހެންކަމުން ނަތީޖާ ނެރުމަށް ޕެނަލްޓީ ޖެހިއިރު، ޕެނަލްޓީގައި ބިސް ބުރު ކުރިހޯދީ 3-1 ގެ ނަތީޖާއަކުންނެވެ.

މިއާއެކު މި މުބާރާތުގެ ސެމީއަށް ޓީމުތައް ދަތުރުކުރިއިރު، ސެމީގެ ފުރަތަމަ މެޗުގައި ބައްދަލުކުރާނީ އޯވަންއޯ އާއި ބުރު ސްޕޯޓްސްއެވެ. އަދި ދެވަނަ ސެމީގައި ބައްދަލުކުރާނީ ލިޓްލް ޓައުން އާއި ބިސް ބުރެވެ. މި މުބާރާތުގެ ފައިނަލް އޮންނާނީ މި މަހު 19 ވަނަ ދުވަހެވެ.