ތިންވަނަ ޑިވިޝަން އަންނަ އާދީއްތަ ދުވަހު ފަށަނީ

ތިންވަނަ ޑިވިޝަން ފުޓްބޯޅަ މުބާރާތް އަންނަ އާދީއްތަ ދުވަހު ފަށަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފިއެވެ.

އެންމެ ފުރަތަމަ މި މުބާރާތް ފެށުމަށް އެފްއޭއެމުން ތާވަލުކުރީ ފެބްރުއަރީ މަހުގެ އެއްވަނަ ދުވަހުއެވެ. އެކަމަކު ފަހުން މި މުބާރާތް ފެށުން އެ މަހުގެ ހަތަރުވަނަ ދުވަހަށް ތާވަލުކުރިއިރު، އަނެއްކާވެސް އެ މަހުގެ 10 ވަނަ ދުވަހަށްވެސް މުބާރާތް ފެށުން ފަސްކުރިއެވެ.

އެކަމަކު ފެބްރުއަރީ މަހުގެ ތެރޭގައި ކޮވިޑް-19 ގެ ކޭސްތައް މާލެ ސިޓީގައި އިތުރުވުމާއެކު، ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނެރުނު އައު އުސޫލުތަކާ ގުޅިގެން މުބާރާތް މިހާތަނަށްވެސް ފެށިފައެއް ނުވެއެވެ.

ނަމަވެސް ބުދަ ދުވަހު އެފްއޭއެމުން އިޢުލާންކުރި ޝެޑިއުލްގައިވާ ގޮތުން އަންނަ އާދީއްތަ ދުވަހުގެރޭ މުބާރާތުގެ ކުޅުން ފަށާނެއެވެ. އަދި ޤައުމީ ފުޓްބޯޅަ ދަނޑާއި މާފަންނު ޓާފް ދަނޑުގައި ކުރިއަށްދާ މި މުބާރާތުގެ ފައިނަލް މެޗު ކުޅުމަށް ތާވަލުކޮށްފައިވަނީ މެއި މަހުގެ 12 ވަނަ ދުވަހުއެވެ. މީގެ ކުރިން މި މުބާރާތުގެ ގުރުލުން ޖެނުއަރީ މަހު ބޭއްވިއިރު، އޭރު މުބާރާތުގައި 15 ޓީމެއް ވަނީ ބައިވެރިވެފައެވެ. އެކަމަކު އެއް ޓީމަކުން މިހާރު ނަން ނަގާފައިވުމުން، މުބާރާތް ކުރިއަށްދާނީ 14 ޓީމުގެ މެދުގައި ކަމަށް އެފްއޭއެމުން މަޢުލޫމާތުދެއެވެ.

އެހެންކަމުން މި މުބާރާތް ކުރިއަށް ގެންދިޔުމަށް އެފްއޭއެމުން ނިންމާފައިވަނީ ހަތަރު ގްރޫޕަކަށް ބަހާލައިގެންނެވެ. އަދި ގްރޫޕް ސްޓޭޖް މެޗުތަކަށްފަހު ކުއާޓާ ފައިނަލަށް ކޮންމެ ގްރޫޕަކުންވެސް އެންމެ މޮޅު ދެ ޓީމު ދަތުރުކުރާނެއެވެ. މުބާރާތުގެ ކުއާޓާގެ މެޗުތައް މެއި މަހުގެ ފަސްވަނަ ދުވަހާއި ހަވަނަ ދުވަހު ކުޅޭއިރު، ސެމީގެ މެޗުތައް ކުޅޭނީ އެ މަހުގެ ނުވަވަނަ ދުވަހުއެވެ.

މި އަހަރު ތިންވަނަ ޑިވިޝަން ފުޓްބޯޅަ މުބާރާތް ބާއްވާއިރު، މިދިޔަ ދެ އަހަރުވެސް މި މުބާރާތް ބާއްވާފައެއް ނުވެއެވެ. އެންމެ ފަހުން މި މުބާރާތް 2018 ވަނަ އަހަރު ބޭއްވިއިރު، އެ ފަހަރު ޗެމްޕިއަންކަން ހޯދީ ރޮކް ސްޓްރީޓްސް ސްޕޯޓްސް ކުލަބެވެ.