ޣަޒްނީ ސިޓީވެސް ތާލިބާނުންގެ ބާރުދަށަށް
12 އޯގަސްޓު 2021 | ބުރާސްފަތި 13:16ޣަޒްނީ ހިފުމާއެކު މިވަގުތު އަފްޣާނުގެ 10 ސިޓީއެއް ތާލިބާނުންގެ ބާރުގެ ދަށަށް ވަނީ ގޮސްފައި
އަފްޣާނިސްތާނުގައި ހިނގަމުންދާ ހަނގުރާމައިގެ ތެރެއިން: ތާލިބާނުން ވަނީ އަފްޣާނިސްތާނުގެ 10 ސިޓީއެއް އެ ޖަމައާތުގެ ބާރުގެ ދަށަށް ގެނެސްފައި
އަފްޣާނިސްތާނުގެ ވެރިރަށް ކާބުލްގެ ކައިރީގައި އޮންނަ މުހިންމު ސިޓީއެއް ކަމަށްވާ ޣަޒްނީ ވެސް ތާލިބާނުން ހިފައިފިއެވެ.
ޣަޒްނީ ޕްރޮވެންޝަލް ކައުންސިލްގެ އެންމެ އިސްވެރިޔާ ނާސިރް އަހުމަދު ފަގީރީ ވިދާޅުވީ ތާލިބާނުން ޣަޒްނީ ސިޓީއަށް ބުދަ ދުވަހުގެ ފަތިހުގެ ވަގުތެއްގައި ވަދެފައިވާ ކަމަށެވެ.
ޣަޒްނީ ސިޓީ ހިފާފައިވާކަން ތާލިބާނުންގެ ތަރުޖަމާނު ވެސް ވަނީ ކަށަވަރުކޮށްދީފައެވެ. ތާލިބާނުންގެ ތަރުޖަމާނު ކުރި ޓްވީޓެއްގައި ބުނެފައިވަނީ ވެރިރަށް ކާބުލްއާއި އިންވެގެން އޮންނަ އެންމެ މުހިންމު ސިޓީ ޣަޒްނީވެސް ތާލިބާނުންގެ ބާރުގެ ދަށުގައިވާ ކަމަށެވެ.
ޣަޒްނީ ހިފުމާއިއެކު މިވަގުތު އަފްޣާނުގެ 10 ސިޓީއެއް ތާލިބާނުންގެ ބާރުގެ ދަށަށް ވަނީ ގޮސްފައެވެ.
ފަހަކަށް އައިސް ތާލިބާނުން އަންނަނީ އަފްޣާނިސްތާނުގެ ސަރުކާރާއި ދެކޮޅަށް އެ ޖަމާއަތުން ކުރަމުން ގެންދާ ހަނގުރާމަ އިތުރަށް ވަރުގަދަ ކޮށްފައެވެ.
އަފްޣާނިސްތާނުގެ ގިނަ ސަރަހައްދުތައް ޠާލިބާންގެ އަތްދަށުގައިވާއިރު، އެ ސަރަހައްދުތަކުގައި ދިރިއުޅޭ ރައްޔިތުންނަށް ވަނީ ގެދޮރު ދޫކޮށް ރައްކާތެރި ހިސާބުތަކަށް ބަދަލުވާން ޖެހިފައެވެ.
