ކ. އަތޮޅު ތިލަފުށީން ދަގަނޑާއި ހިލަވެލި ބަރުކޮށްގެން ތިން ފަޅުވެރިންނާއެކު ދަތުރުކުރަމުންދިޔަ ދޯންޏެއް ބަންޑުން ޖަހާލައިފިއެވެ.

އެމްއެންޑީއެފުން ބުނީ މިއީ މިމަހުގެ 11 ވަނަ ދުވަހުގެ ފަތިހު 4:30 ހާއިރު ތިލަފުށިން ދަގަނޑާއި ހިލަވެލި ބަރުކޮށްގެން ވަކަރުފަޅީ ރިސޯޓަށް ދަތުރުކުރަމުން ދިޔަ ''ރާޔާ'' ނަމަކަށް ކިޔާ ދޯންޏެއް ކަމަށާއި, މި ދޯނިން ދަތުރުކުރީ 3 ފަޅުވެރިންކަމަށެވެ. ދިވެއްސަކާއި، ދެބިދޭސީން ތިބި މިދޯނި ބަންޑުން ޖަހާލާފައިވަނީ ބުދަ ދުވަހުގެ ހެނދުނު 10:30 ހާއިރު، ފިހާޅޮހި ރިސޯޓާ ގާތްގަނޑަކަށް 6.5 ނޯޓިކަލް މޭލު ބޭރުން ކަމަށް އެމްއެންޑީއެފުން ބުނެއެވެ.

ދޯނި ބަންޑުން ޖަހާލިކަމުގެ މައުލޫމާތު އެމްއެންޑީއެފްގެ ކޯސްޓްގާޑަށް ލިބިފައިވަނީ ބުދަ ދުވަހުގެ މެންދުރުފަހު 2:48 ހާއިރުއެވެ. އެ މައުލޫމާތު ލިބުމާއެކު ކޯސްޓްގާޑުން ހަރަކާތްތެރިވި ކަމަށް އެމްއެންޑީއެފުން ބުނެއެވެ.

އެމްއެންޑީއެފުން ބުނީ ހާދިސާ ހިނގި ސަރަހައްދަށް ދިޔަ "ދިރުން" ނަަމަކަަށް ކިޔާ ދޯނީގެ އެހީތެރިކަމާއެކު، ބަންޑުން ޖަހާލި ދޯނީގައި ތިބި މީހުން ކޯސްޓްގާޑުގެ އެހީގައި ހުޅުމާލެ ގެނެސްފައިވާ ކަމަށެވެ. މި ހާދިސާގައި އެއްވެސް މީހަކަށް އަނިޔާވިކަމުގެ ރިޕޯޓެއް ލިބިފައިނުވެއެވެ.