ރިޒޭ ފިޓުވާނީ އަންނަ ސީޒަނަށް: ޝާޒްލީ

އޭއެފްސީ ކަޕުގެ ކޮލިފައިން ޕްލޭއޮފްގައި އިންޑިއާގެ ބެންގަލޫރު އެފްސީއާ ދެކޮޅަށް ކުޅޭ މެޗުގައި ހުނަރުވެރި ފޯވާޑް އަޙްމަދު ރިޒުވާން (ރިޒޭ) ނުފެންނާނެ ކަމަށް ކުލަބު އީގަލްސްގެ ކޯޗު މުޙައްމަދު ޝާޒްލީ ބުނެފިއެވެ.

ރިޒޭގެ ކަކުލަށް އަނިޔާވީ މި އަހަރުގެ ޖެނުއަރީ މަހުގެ ހަތަރުވަނަ ދުވަހު ދިރާގު ދިވެހި ޕްރިމިއާ ލީގުގައި ކުލަބު ވެލެންސިއާ އަތުން 2-0 ގެ ނަތީޖާއަކުން އީގަލްސް ބަލިވި މެޗުގައެވެ. އެ މެޗުގެ ފުރަތަމަ ހާފު ނިމެން މިނެޓަކަށް ވެފައި ވަނިކޮށް ރިޒޭއަށް އަނިޔާވެގެން ބަދަލުކުރަން ޖެހުނެވެ. އެ މެޗުގައި ރިޒޭގެ ކަކުލަށް ސީރިއަސް އަނިޔާއެއް ލިބުނުއިރު، މީގެ ކުރިންވެސް އޭނާގެ ކަކުލަށް ލިބުނު އަނިޔާއަކާ ގުޅިގެން، މދިިޔަ ސީޒަނުގެ ލީގުގެ ކުރީކޮޅު އީގަލްސްއިން ކުޅުނު ބައެއް މެޗުތައް ރިޒޭއަށް ގެއްލުނެވެ.

މީގެ ކުރިން ލިބުނު އަނިޔާއިން އެއްކޮށް ރަނގަޅު ނުވަނީސް، ރިޒޭގެ ކަކުލަށް ސީރިއަސް އަނިޔާއެއް ވުމާއެކު، އެ އަނިޔާއިން ރަނގަޅުވުމަށް ރިޒޭ ވަނީ މިދިޔަ ފެބްރުއަރީ މަހުގެ 18 ވަނަ ދުވަހު އޭޑީކޭ ހޮސްޕިޓަލުގައި ކަކުލުގެ އޮޕަރޭޝަނެއް ކޮށްފައެވެ. ކަކުލަށް ލިބުނު ސީރިއަސް އަނިޔާއާ ގުޅިގެން ރިޒޭއަށް ވަނީ މިދިޔަ ސީޒަނުގައި ބޮޑު ބައެއް ގެއްލިފައެވެ. އަދި އޭނާއަށް ވަނީ މިދިޔަ ޖޫން މަހު ގައުމީ ފުޓްބޯޅަ ޓީމުން ކުޅުނު ފީފާ ވޯލްޑް ކަޕާއި އޭއެފްސީ އޭޝިއަން ކަޕްގެ ޖޮއިންޓް ކޮލިފިކޭޝަން މެޗުތައްވެސް ގެއްލިފައެވެ.

އޭއެފްސީ ކަޕުގެ ޕްލޭއޮފް މެޗަށް އީގަލްސްއިން ތައްޔާރުވަމުން އަންނައިރު، "ރާއްޖެ.އެމްވީ" އަށް ދިން އިންޓަވިއުއެއްގައި ޝާޒްލީ ބުނީ ރިޒޭއަށް އަނިޔާގެ ސަބަބުން ބެންގަލޫރު މެޗުގައިވެސް ނުކުޅެވޭނެ ކަމަށެވެ. އަދި އަނިޔާއިން އެއްކޮށް ރަނގަޅުވެ ރިޒޭ ފިޓުވާނީ އަންނަ ސީޒަނަށް ކަމަށްވެސް ވަނީ ބުނެފައެވެ.

ރިޒޭ ނުލައި އީގަލްސްއިން އޭއެފްސީ ކަޕަށް ތައްޔާރުވަމުން އަންނައިރު، އެ ޓީމުން ވަނީ ޕްލޭއޮފް ދިމާކޮށް ތަޖުރިބާކާރު ހަތް ކުޅުންތެރިއަކު ގެނެސްފައެވެ. އެއީ ރާއްޖޭގައި އުފެދުނު އެންމެ މޮޅު ފުޓުބޯޅަ ކުޅުންތެރިޔާ އަލީ އަޝްފާގު (ދަގަނޑޭ) އާއި، ގައުމީ ފުޓްބޯޅަ ޓީމުގެ ކެޕްޓަން އަކްރަމް އަބްދުލް ޣަނީ (އަކޫ) އާއި، އިތުބާރު ފޯވާޑް އަލީ ފާސިރު (ސެންޓޭ) އާއި، ހުނަރުވެރި މިޑްފީލްޑަރުން ކަމަށްވާ މުޙައްމަދު އާރިފް (ބަކާ) އާއި އިސްމާއީލް އީސަ (މެސީ) އާއި އަޙްމަދު ހަސަން (އައްމަޑޭ) ގެ އިތުރުން ގޯލްކީޕަރު މުޙައްމަދު ފައިސަލެވެ.

ޕްލޭއޮފްގައި ވަރުގަދަ ބެންގަލޫރާ ދެކޮޅަށް އީގަލްސް ނުކުންނައިރު، ޝާޒްލީ ބުނީ ތަޖުރިބާކާރު ކުޅުންތެރިންނާއެކު އީގަލްސްގެ މިހާރުގެ އަމާޒަކީ ބެންގަލޫރު ބަލިކޮށް ގްރޫޕް ސްޓޭޖުން ޖާގައެއް ހޯދުން ކަމަށެވެ. އަދި ތަޖުރިބާކާރު އިތުރު ކުޅުންތެރިންތަކެއް ލިބުމަކީ އޭފްސީ ކަޕް ކަހަލަ މުބާރާތަކަށް ނުކުންނައިރު މުހިންމު ކަމެއް ކަމަށްވެސް ވަނީ ބުނެފައެވެ.

އަންނަ އާދީއްތަ ދުވަހު އޭއެފްސީ ކަޕުގެ ޕްލޭއޮފް މެޗު ކުޅޭއިރު، އެ މެޗަށްފަހު ގްރޫޕް ސްޓޭޖުގެ މެޗުތައް ކުރިއަށްދާނީ މި މަހުގެ 18 ވަނަ ދުވަހުން ފެށިގެން 24 ވަނަ ދުވަހުގެ ނިޔަލަށެވެ. އޭއެފްސީ ކަޕުގެ ގްރޫޕް ސްޓޭޖުގައި މި ވަގުތު އޮތީ ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަނުގެ އިތުރުން އިންޑިއާގެ މޯހަން ބަގާން އާއި ބަންގްލަދޭޝްގެ ބަޝުންދަރާ ކިންގްސްއެވެ. ގްރޫޕް ސްޓޭޖުގެ ފަހު ޖާގަ ލިބޭނީ އީގަލްސް އާއި ބެންގަލޫރު ކުޅޭ ޕްލޭއޮފް މެޗުން މޮޅުވާ ޓީމަކަށެވެ.