ޕްލޭއޮފް މެޗު ކުޅެން ބެންގަލޫރު ޓީމު އަނެއްކާވެސް ރާއްޖެއަށް

އޭއެފްސީ ކަޕުގެ ކޮލިފައިން ޕްލޭއޮފްގައި ރާއްޖޭގެ ކުލަބު އީގަލްސްއާ ދެކޮޅަށް ކުޅޭ މެޗަށް އިންޑިއާގެ ބެންގަލޫރު އެފްސީ ޓީމު ބުދަ ދުވަހު މާލެ އަތުވެއްޖެއެވެ.

ޕްލޭއޮފުގައި އީގަލްސް އާއި ބެންގަލޫރު ބައްދަލުކުރާ މެޗު ކުޅުމަށް ތާވަލުކޮށްފައިވަނީ އަންނަ އާދީއްތަ ދުވަހު ގައުމީ ފުޓްބޯޅަ ދަނޑުގައެވެ. އެ މެޗު ކުޅުމަށް ބުދަ ދުވަހުގެ ހަވީރުގެ ވަގުތެއްގައި ބެންގަލޫރުގެ ކުޅުންތެރިންނާއި އޮފިޝަލުން ވަނީ މާލެ އައިސްފައެވެ. ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މައުލޫމާތުދޭ ގޮތުން ބެންގަލޫރު ޓީމު ރާއްޖޭގައި ކޭމްޕްކުރާނީ ހުޅުލޭ އައިލެންޑް ހޮޓެލުގައެވެ.

އޭއެފްސީ ކަޕުގެ ޕްލޭއޮފް މެޗު އަންނަ އާދީއްތަ ދުވހު ކުޅޭއިރު، މީގެ ކުރިން މި މެޗު މެއި މަހުގެ 11 ވަނަ ދުވަހު ކުޅެންވެސް ތާވަލުކުރިއެވެ. އެކަމަކު އެ މެޗު ފަސްކުރަން ޖެހުނީ އެ ފަހަރު މާލެއައި ބެންގަލޫރު ޓީމު ކޮވިޑް-19 ގެ އުސޫލުތަކާ ޚިލާފުވުމުންނެވެ.

މި ފަހަރުގެ ޕްލޭއޮފްގައި އީގަލްސް އާއި ބެންގަލޫރު ބައްދަލުކުރާއިރު، މި މެޗަށް އީގަލްސް ދަތުރުކުރީ ޕްރިލިމިނަރީ ފުރަތަމަ ބުރުގައި މިދިޔަ އޭޕްރީލް މަހު މާލޭގައި ބޫޓާންގެ ތިމްޕޫ ސިޓީއާ ދެކޮޅަށް ކުޅުނު މެޗު ކާމިޔާބުކޮށްގެންނެވެ. ޕްރިލިމިނަރީ ދެވަނަ ބުރުގައި އީގަލްސް ވާދަކުރަން ހަމަޖެހިފައި އޮތީ، ބަންގްލަދޭޝްގެ ޑާކާ އަބަހާނީއާއެވެ. އެކަމަކު ކޮވިޑުގެ ސަބަބުން އެ ޓީމަށް ދަތުރުކުރުމުގެ ހުއްދަ ނުލިބި އަދި އަމިއްލަ ގައުމުގައި މެޗު ކުޅުމުގެ ހުއްދަވެސް ނުލިބުމުން އޭއެފްސީ ނިންމީ އަބަހާނީ މުބާރާތުން ވަކިވެފައިވާ ކަމަށެވެ.

ޕްލޭއޮފުން މޮޅުވާ ޓީމަކަށް ގްރޫޕް ސްޓޭޖުގެ ފަހު ޖާގަ ލިބޭއިރު، ރާއްޖެއިން ގްރޫޕް ސްޓޭޖުގެ ސީދާ ޖާގައެއް ލިބިފައިވަނީ މިދިޔަ ސީޒަނުގެ ދިރާގު ދިވެހި ޕްރިމިއާ ލީގުގެ ޗެމްޕިއަންކަން ހޯދި މާޒިޔާއަށެވެ. މާޒިޔާގެ އިތުރުން ދެން ގްރޫޕް ސްޓޭޖުގައި ހިމެނެނީ އިންޑިއާގެ މޯހަން ބަގާން އާއި ބަންގްލަދޭޝްގެ ޗެމްޕިއަން ބަޝުންދަރާ ކިންގްސްއެވެ.

ޕްލޭއޮފް މެޗާ ކުރިމަތިލާއިރު ބެންގަލޫރުން ވަނީ މުބާރާތުގެ ގްރޫޕް ސްޓޭޖަށް ވަނުމުގެ އަމާޒުގައި ގިނަ ކުޅުންތެރިންތަކެއްގެ ސޮއި ހޯދާފައެވެ. އޭގެ ތެރޭގައި ކޮންގޯގެ ގައުމީ ޓީމުގެ ފޯވާޑް ޕްރިންސް އިބަރާ އާއި، ކުރިން ޗެންނާއީ އާއި މޯހަން ބަގާންއަށް ކުޅުނު މިޑްފީލްޑަރު ޖަޔޭޝް ރާނޭ އާއި، ބްރެޒިލް ލީގުން ގެނައި ޑިފެންޑަރު އެލަން ކޮސްޓާ އާއި، މިދިޔަ ސީޒަނުގެ އެންމެ ގިނަ ލަނޑު ޖެހި ޒުވާން ފޯވާޑް ބިދްޔާޝަގަރު ސިންހް އާއި، އީސްޓް ބެންގޯލުގެ ޑިފެންޑަރު ސަތާކް ގޯލުއީ އާއި، ފޯވާޑް ހަމަންފްރީތު ސިންހް އާއި، ރިއަލް ކަޝްމީރު ޓީމުން ގެނައި ދާނިޝް ފާރޫގް އަދި ކެރަލާ ބްލާސްޓާސްގެ މިޑްފީލްޑަރު ރޯހިތު ކުމާރު ހިމެނެއެވެ.

އޭއެފްސީ ކަޕުގެ ޕްލޭއޮފް މެޗަށްފަހު ގްރޫޕް ސްޓޭޖުގެ މެޗުތައް ކުރިއަށްދާނީ މި މަހުގެ 18، 21 އަދި 24 ވަނަ ދުވަހުއެވެ. ގްރޫޕް ސްޓޭޖުގެ ހުރިހާ މެޗެއް ރާއްޖޭގައި ބޭއްވުމަށް އޭއެފްސީން މީގެ ކުރިން ވަނީ ނިންމާފައެވެ.