ޑައިބެޓީސް ސޮސައިޓީ އޮފް މޯލްޑިވްސްގައި މިހާތަނަށް 159 ކުއްޖަކު ރަޖިސްޓަރީ ވެފައިވާ ކަމަށާއި، އެކުދިންނަށް ބޭނުންވާ އާލާތްތައް ފޯރުކޮށްދިނުމުގައި ވަރަށް ދަތިވާ ކަމަށް ޑައިބެޓީސް ސޮސައިސިޓީ އޮފް މޯލްޑިވްސްގެ ސީއީއޯ އައިޝަތު ޝިރުހާނާ ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން ޝިރުހާނާ ވިދާޅުވީ ސޮސައިޓީގެ މަސައްކަތްތައް ފަށައި ހަކުރު ބަލީގެ ކުދިންނަށް އެހީވާން ފެށި މަސައްކަތުގައި ގިނަ ގޮންޖެހުންތަކަކާ ކުރިމަތިވާ ކަމަށެވެ. އެގޮތުން ބައެއް އާލާތްތައް ލިބުމުގައި ދަތިތަކާ ކުރިމަތިވާ ކަމަށާއި، ބައެއް ޚިދުމަތްތައް އާސަންދައިގެ ދަށުން ނުލިބުމަކީ ކަންބޮޑުވުމެއް ކަމަށެވެ.

ޝިރުހާނާ ވިދާޅުވީ ރާއްޖެއިން ލިބެނީ އިންސިއުލިންނާއި ވައިލްސް އަދި ސިރިންޖު ކަމަށެވެ. ކުރެވުނު ބުރަ މަސައްކަތުން އިންސިއުލިން ޕެން ލިބިފައިވާކަން ފާހަގަކުރައްވައި ޝިރުހާނާ ވިދާޅުވީ އިންސިއުލިން ޕެން ލިބިގެންދިޔައީ ސުނާމީއަށްފަހު ބޭރުގެ ޖަމުޢިއްޔާއެއް ކަމަށްވާ އިންސިއުލިން ފޯ ލައިފްއާ ގުޅުނު ހިސާބުން ކަމަށެވެ. މިއީ ބޭރުގެ ހިލޭ އެހީގެ ދަށުން ލިބޭ އެއްޗެއްކަން އޭނާ ފާހަގަކުރެއްވިއެވެ. އަދި ވިދާޅުވީ ހަކުރު ބަލީގެ ކުދިންނަށް ދިރިއުޅުން ފަސޭހަކޮށްދިނުމަށް ކުރެވޭ މަސައްކަތުގެ ދަށުން މިހާރު އިންސިއުލިން ޕެން އާސަންދައިން ލިބޭ ގޮތް ހެދިފައިވާ ކަމަށެވެ. ނަމަވެސް ޓެކްނޮލިޖީއާއި އައު ހޯދުންތަކާއެކު އާލާތްތައް ހޯދުމަށް ދަތިވާ ކަމަށް ޝިރުހާނާ ވިދާޅުވިއެވެ.

މީގެ އިތުރުން ޝިރުހާނާ ވިދާޅުވީ ބައިނަލްއަގުވާމީ ޖަމުޢިއްޔާއާ ގުޅިގެން ކުރާ މަސައްކަތުގައި އެމީހުން ސަޕްލައި ފޮނުވަނީ އެ ކުއްޖާގެ އުމުރުން 21 އަހަރު ވަންދެން ކަމަށާއި، 21 އަހަރު ވުމުން އެ ޚިދުމަތްތައް ނުލިބޭ ކަމަށެވެ. އަދި އެކަމުގެ ސަބަބުން ބޮޑު ހޭދައެއް ކުރަން ޖެހޭ ކަމަށް އޭނާ ވިދާޅުވިއެވެ.

ޝިރުހާނާ ވިދާޅުވީ ހަކުރު ބަލީގެ ކުދިން އެކި ރަށްރަށުގައި ދިރިއުޅެމުންދާއިރު، އެކުދިންގެ ރިޕޯޓުތަކާއި ފަރުވާގެ ކަންކަން ބެލުމަށް ދަތިވާ ކަމަށެވެ. ނަމަވެސް ވީވަރަކުން އެ ކުދިންގެ ހާލު ގާތުން ބަލަމުންދާ ކަމަށް އޭނާ ވިދާޅުވިއެވެ. އަދި ވިދާޅުވީ މިހާތަނަށް ސޮސައިޓީގައި 159 ކުދިން ރަޖިސްޓަރީވެފައިވާ ކަމަށެވެ.