ނިއު ޔޯކްގެ ގަވަރނަރ އެންޑްރީ ކްއެމޯ އަންހެނުންތަކަކަށް ޖިންސީ ފުރައްސާރަ ކުރެއްވިކަމަށް ރިޕޯޓްކުރުމާއިއެކު މަގާމުން އިސްތިއުފާ ދެއްވައިފިއެވެ.
ރިޕޯޓްތައް ބުނާ ގޮތުން އެންޑްރީ ކްއެމޯ މަގާމުން އިސްތިއުފާ ދެއްވީ އޭނާގެ ޕާޓީ ކަމަށްވާ ޑިމޮކްރެޓް ޕާޓީން އެކަމަށް ކުރި ޕްރެޝަރުގެ ސަބަބުންނެވެ. އަދި އޭނާ އިސްތިއުފާ ދެއްވުމަށް އެމެރިކާގެ ރައީސް ޖޯ ބައިޑެންވެސް އެދިވަޑައިގެންފައިވާ ކަމަށް ރިޕޯޓްތައް ބުނެއެވެ.
އިސްތިއުފާގެ ސިޓީގައި ކްއެމޯ ވިދާޅުވީ، މަސްލަހަތަށް ބައްލަވައި އެންމެ ރަނގަޅު ގޮތަކީ މަގާމުން އިސްތިއުފާ ދެއްވުން ކަމުގައި ދެކިވަޑައިގަންނަވާ ކަމަށެވެ. ނަމަވެސް ޖިންސީ ފުރައްސާރަ ކުރެއްވިކަމަށް ބުނާ ވާހަކަތައް ކްއެމޯ ވަނީ ދޮގު ކުރައްވާފައެވެ.
ކްއެމޯ އަންހެނުންތަކަކަށް ޖިންސީ ފުރައްސާރަ ކުރެއްވިކަމަށް ބުނާ ވާހަކަ ނިއު ޔޯކްގެ އެޓާނީ ޖެނެރަލްގެ އޮފީހުން އަންނަނީ ތަހުގީގު ކުރަމުންނެވެ. އެގޮތުން މިހާތަނަށް ބެލިބެލުމުން ކްއެމޯ، 11 އަންހެނުންނަށް ޖިންސީ ފުރައްސާރަކުރެއްވި ކަމަށް ބެލެވެއެވެ. އޭގެ ތެރޭގައި އޭނާގެ އޮފީހުގައި މަސައްކަތް ކުރާ މުވައްޒަފުންވެސް ހިމެނެއެވެ.
ކްއެމޯގެ އިސްތިއުފާއާއެކު ނިއު ޔޯކްގެ ގަވަރނަރގެ މަގާމު ވަގުތީ ގޮތުން ބަލަހައްޓަވާނީ ލެފްޓިނެންޓް ގަވަރނަރ ކެތީ ހޮކަލްއެވެ. އަދި އައު ގަވަރނަރުގެ މަގާމާ ހަވާލުވެވަޑައިގަންނަވާނީ ވެސް އެކަމަނާ ކަމަށް ބެލެވެއެވެ. އެހެންވެއްޖެ ނަމަ އެކަމަނާ ވެގެންދާނީ އެމެރިކާގެ ހަތަރުވަނައަށް އެންމެ މަގުބޫލު ސިޓީގެ ފުރަތަމަ އަންހެން ގަވަރނަރަށެވެ.
