ވަގުތުގެ ބޭނުން ހިފުމަށް ސަރުކާރަށް ގޮވާލަން: އިންތި

ރިޟްވާނުގެ މައްސަލައިގައި އިންސާފު ނުލިބި އެތައް އަހަރެއް ވެގެންދާއިރު، ވަގުތުގެ ބޭނުން ހެޔޮ ގޮތުގައި ހިފުމަށް ސަރުކާރަށް ގޮވާލާކަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ވިދާޅުވެއްޖެއެވެ.

އިންތި މިހެން ވިދާޅުވީ ރިޟްވާނުގެ މައްސަލައަށް 7 އަހަރު ފުރުމާ ގުޅިގެން އޭނާގެ ހަނދާނުގައި އާދީއްތަ ދުވަހު ބޭއްވި ހަފްލާއެއްގައި ވާހަކަ ދައްކަވަމުންނެވެ. އިންތި ވިދާޅުވީ، މިވަގުތު ނިސްބަތްވަނީ ސަރުކާރަށް ނަމަވެސް، ސަރުކާރުން ވަގުތުގެ ބޭނުން ހިފަން އެބަޖެހޭ ކަމަށެވެ. އަދި މި މައްސަލަތައް އަވަހަށް ނިންމުމަށް މިހާރު ލިބިފައިވާ ވަގުތުތައް އަލުން އަނބުރާ ލިބޭނެކަމުގެ އުއްމީދު ނެތްކަން ފާހަގަ ކުރައްވައި އިންތި ވަނީ ތަހުގީގު އަވަސް ކުރުމަށް ސަރުކާރަށް ގޮވާލައްވާފައެވެ. އެގޮތުން މި ތަހުގީގު ކޮޅެއްގައި ނުޖެހި ހިނގައިދާނެ ކަމުގެ ބިރު އެބައޮތްކަން އިންތި ފާހަގަ ކުރެއްވިއެވެ.

Advertisement

މެމްބަރު އިންތި ވަނީ މި މައްސަލައިގެ ތަހުގީގު ވަކި ކޮޅެއްގައި ޖެހެންދެން އެކަމަށް ފާރަވެރިވެ، ތަހުގީގު އަވަހަށް ނިންމުމަށް ބާރު އެޅުމަށް ސަރުކާރަށް ގޮވާލައްވާފައެވެ. އަދި މިއީ ކުޑަ މައްސަލައެއް ނޫންކަން ފާހަގަ ކުރައްވައި އިންތި ވަނީ ބްލޮގަރ ޔާމީން ރަޝީދު މަރާލި މައްސަލައާއި، ދާދި ފަހުން ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އަވަހާރަ ކޮށްލުމަށް ދިން ހަމަލާއަށް އަލިއަޅުވާލައްވާފައެވެ.

އިންތި ވިދާޅުވީ، މި މައްސަލައިގެ ތަހުގީގު ވަކި ކޮޅެއްގައި ޖެއްސުމަށް ބޭނުންވާ "ލީޑުތައް" ރަނގަޅަށް ފެންނަން އޮއްވައި މީގެ ކުރީގެ ސަރުކާރުން އެ މައްސަލަ ގަސްތުގައި ނުބަލައި އިހުމާލުވެފައިވާ ކަމަށެވެ.

ރިޟްވާން މަރާލި މައްސަލައިގައި މަރު ކޮމިޝަނުން މީގެކުރިން ބުނެފައިވަނީ، އޭނާ ރަހީނުކޮށް، ޑިންގީއަކަށް ލައިގެން ގެންގޮސް ދޯންޏަކަށް އެރުވުމަށް ފަހު ޝަހާދަތް ލައިދީ މަރާލާފައިވާކަން މިހާތަނަށް ހޯދުނު ހެކިތަކުން އެނގިފައިވާ ކަމަށެވެ. އަދި ފޮރިންސިކް އެނަލައިސިސް ރިޕޯޓާއި، ފައިނަލް ރިޕޯޓުން, މަރާލުމަށް ފައިސާދިން ވިޔަފާރިތަކުގެ މައުލޫމާތާއި އެ މައްސަލައިގެ ޝާމިލްވާ ހުރިހާާ ފަރާތްތަކާއި ތުހުމަތު ކުރެވިފައިވާ ހުރިހާ މައުލޫމާތެއް އެނގިގެންދާނެ ކަމަށް ބުނެފައިވެއެވެ.