ކޮލޮމްބޯގައި ތިބި ވެކްސިން ނުޖަހާ މީހުން ދެނެގަތުމަށް ޚާއްސަ އޮޕަރޭޝަނެއް
8 އޯގަސްޓު 2021 | އާދީއްތަ 12:43ކޮލޮމްބޯގައި ވެކްސިން ނުޖަހާ އުޅޭ 30 އަހަރުން މަތީގެ މީހުން ޝުގަދާސަ ސްޓޭޑިއަމްއަށް ދިޔުމަށް ގޮވާލާފައިވޭ
ކޮވިޑުން ރައްކާތެރިވުމަށް ލަންކާގައި ހިންގާ ވެކްސިން ޕްރޮގްރާމްގެ ތެރެއިން
ސްރީލަންކާގެ ވެރިރަށް ކޮލޮމްބޯގައި ތިބި, ކޮވިޑް-19 ވެކްސިންގެ އެންމެ ޑޯޒެއްވެސް ނުޖަހާ މީހުން ދެނެގަތުމަށް އެގައުމުން ޚާއްސަ އޮޕަރޭޝަނެއް ފަށައިފިއެވެ.
ކޮލޮމްބޯގެ ފުލުހުންގެ ތަރުޖަމާނު އަޖިތު ރޮހާނާ ވިދާޅުވީ އެމީހުން ޓްރޭސް ކުރުމުގެ މަސައްކަތް ހަވާލުކޮށްފައިވަނީ އެގައުމުގެ ކޮމިއުނިޓީ ޕޮލިސް ޑިވިޝަނާ ކަމަށެވެ. އަދި އެ މަސައްކަތް ކުރިޔަށްދާނީ ސިއްހީ އިދާރާތަކާއި ކޮލޮމްބޯ މުނިސިޕަލް ކައުންސިލް (ސީއެމްސީ)ގެ އޮފިޝަލުންގެ އެހީއާއެކު ކަމަށެވެ.
މީގެ އިތުރުން ރޮހާނާ ވަނީ ކޮލޮމްބޯގައި ވެކްސިން ނުޖަހާ ތިބި 30 އަހަރުން މަތީގެ މީހުން ޝުގަދާސަ ސްޓޭޑިއަމްއަށް ދިޔުމަށް ގޮވާލާފައެވެ. އޭނާ ވިދާޅުވީ މިހާތަނަށް ކޮމިއުނިޓީ ފުލުހުންގެ އެހީތެރިކަމާއެކު އެ ސްޓޭޑިއަމްއަށް 5،000ށް ވުރެ ގިނަ މީހުން ގޮސްފައިވާ ކަމަށެވެ.
ލަންކާގައި ކޮވިޑުން ރައްކާތެރިވުމަށް ބޭނުން ކުރުމުގެ ހުއްދަ ދީފައިވަނީ ފައިޒަރ ވެކްސިނާއި، ސިނޮފަރމް ވެކްސިނާއި، ސްޕަޓްނިކްވީ ވެކްސިނާއި، ކޮވިޝީލްޑް ވެކްސިންގެ އިތުރުން ސިނޮވެކް ވެކްސިނަށެވެ.
