1500 ފަތުރުވެރިންނާއެކު ރާއްޖޭގައި ފުރަތަމަ ފަހަރަށް އީ.ޑީ.އެމް ފެސްޓިވަލެއް ބާއްވަނީ
މި ހަރަކާތުގައި ބައިވެރިވުމަށް ދިވެހި ފަންނާނުން ދަނީ ހޯދަމުން
މިއީ ރާއްޖޭގައި ބާއްވާ ފުރަތަމަ އީ.ޑީ.އެމް ފެސްޓިވަލް
ރާއްޖޭގައި ފުރަތަމަ ފަހަރަށް "އިލެކްޓްރޯނިކް ޑާންސް މިއުޒިކް ޝޯ"އެއް ބާއްވަން ނިންމައިފިއެވެ.
އިޔާޝް މޯލްޑިވްސްއިން އިންތިޒާމުކުރާ މިހަރަކާތުގެ ކަންކަން ފައިނަލައިޒްކުރުމުގެ މަސައްކަތް ކުރަމުންދާއިރު، 1500 ފަތުރުވެރިން ގެނައުމަށް ހަމަޖެހިފައިވާ މި ހަރަކާތަކީ މިހާތަނަށް ރާއްޖޭގައި ބާއްވާ ފަތުުރުވެރިކަމުގެ އެންމެ ބޮޑު އެއް ހަރަކާތަށް ވެގެންދާނެއެވެ.
މި ފެސްޓިވަލްއާއި ގުޅޭގޮތުން ރާއްޖެ އެމްވީއާއި ވާހަކަދައްކަވަމުން އިޔާޝް މޯލްޑިވްސްގެ މެނޭޖިންގް ޑިރެކްޓަރ އަލީ އިޔާޝް ވިދާޅުވީ، ރާއްޖޭގެ ފަތުރުވެރިކަން ޕްރޮމޯޓްކުރަން މިހާތަނަށް ބާއްވާފައިވާ ގިނަ ހަރަކާތްތަކާއި މި ފެސްޓިވަލް ވަރަށް ތަފާތުވެ އައު ކަންތައްތަކެއް ފެނިގެންދާނެކަމަށެވެ. އެގޮތުން މި ހަރަކާތަކީ ކޮލެޖް ޔުނިވަރސިޓީ، ނުވަތަ ޒުވާނުންނަށް ޚާއްސަކޮށް އެ އުމުރުފުރާގެ ފަތުރުވެރިން ރާއްޖެ އައުމަށް ޚާއްސަކޮށް ފަރުމާކޮށްފައިވާ ހަރަކާތެއް ކަމުން މި އިވެންޓްގެ ތެރެއިން ޒުވާނުން ގަޔާވާފަދަ ޒަމާނީ އައު ކަންތައްތައްވެސް ރާއްޖޭގައި ހުރިކަން ދައްކާދޭނެ ކަމަށެވެ.
ޒަމާނުއްސުރެ ރާއްޖެއަކީ ލޯބިވެރިންނާއި، ހަނިމޫން ހަދަން އަންނަ ޖޯޑުތަކަށް ޚާއްސަ މަންޒިލެއް ކަމުގައި ވިޔަސް، މި ފަހަރުގެ އީޑީއެމްއިން ރާއްޖޭގެ ފަތުރުވެރިކަން ސިންދަފާތުވެފައިވާ މިންވަރު މުޅި ދުނިޔެއަށް ހާމަކޮށްދޭނެއެވެ. އެގޮތުން ލައިޓް އަދި ވޯޓާ ޝޯތަކާއި، ރާއްޖެ އެކަމަކަށް މަޝްހޫރު ވޯޓަރ ސްޕޯޓްސްގެ އެކި ހަރަކާތްތައް ދައްކާލާއިރު، ފަތުރުވެރިންނަށް މިކަމުގައި ބައިވެރިވުމުގެ ފުރުސަތު ލިބޭގޮތަށް ބޮޑު ޖާގައެއް ކޮންމެ ހަރަކާތަކަށްވެސް ޚާއްސަކުރެވިފައިވާނެއެވެ.
ހެލްތް ޕްރޮޓެކްޝަން އޭޖެންސީ، އެޗްޕީއޭގެ ގައިޑްލައިންތަކަށް ތަބާވެ މި ހަރަކާތުގެ ތެރެއިން ރާއްޖެ ގެންނަނަ 1500 ފަތުރުވެރިންގެ ތެރެއިން ކޮންމެ ބައިވެރިއަކީ ވެކްސިން ގެ ދެ ޑޯޒް ހަމަކޮށް ބަލިން ރައްކާތެރިވެފައިވާ ބައެއްކަން ކަށަވަރުކުރާނެކަމަށް އިޔާޝް ވިދާޅުވިއެވެ.
3 ދުވަހަށް ދެމިގެންދާ މި ހަރަކާތުން ރާއްޖޭގެ ފަތުރުވެރިކަން ޕްރޮމޯޓްކުރަން ތަފާތުގޮތަކަށް އިޝްތިހާރު ކުރަން ހަމަޖެހިފައިވާއިރު، މި އިވެންޓް މި އަހަރުގެ ނޮވެމްބަރ މަހު ބޭއްވުމަށް ދަނީ ތައްޔާރުވަމުންނެވެ. އެގޮތުން މިކަމުގައި ރާއްޖޭގެ ރިސޯޓް، ގެސްޓްހައުސް، ސަފާރީ އަދި ލިވަބޯޑްތައް ބައިވެރިކުރަން ނިންމާފައިވެއެވެ. ސުވެނިއަރ ޝޮޕްތަކަށް ޚާއްސަ ސަރަހައްދެއްވެސް ފެސްޓިވަލްގައި ހަމަޖައްސާފައިވެއވެ.
މިކަމަށް ބޭނުންވާ ހުއްދަތައް ނެގުމުގެ މަސައްކަތް ކުރަމުންދާއިރު، މި ހަރަކާތުގައި ދިވެހި ފަންނާނުންގެ ދައުރު އިތުރުކުރުމަށް މިހާރު ދަނީ މަސައްކަތް ކުރަމުންނެވެ. އެގޮތުން ޑީޖޭއިންނާއި، ނެށުން ތެރިން އަދި ކުރެހުންތެރިންގެ އިތުރުންވެސް އެކި ކަހަލަ ފަންނާނުންނަށް ބައިވެރިވުމުގެ ފުރުސަތު ވަނީ ހުޅުވާލާފައެވެ. މިކަމަށް ޝައުގުވެރިވާ ފަރާތްތަކުން އިޔާޝް މޯލްޑިވްސްގެ ފޭސްބުކް ޕޭޖް ނުވަތަ އީމެއިލް އެޑްރެސްްއަށް iyashmaldives@gmail.com ފޮނުވުމަށް ވަނީ އެދިފައެވެ.
