ކޮވިޑް-19 ވެކްސިން ނުޖަހާ ތިބި މީހުންގެ ފަރާތުން އެހެން މީހުންނަށް ޑެލްޓާ ވޭރިއަންޓް ޖެހުމުގެ ފުރުސަތެއް އޮންނަ ފަދައިން، ވެކްސިން ޖަހާފައިތިބޭ މީހުންގެ ފަރާތުން އެހެން މީހުންނަށް މި ވޭރިއަންޓް ޖެހުމުގެ ފުރުސަތުވެސް ބޮޑުކަމަށް ހޯދުންތަކުން ދައްކައިފިއެވެ.
ޕަބްލިކް ހެލްތު އިންގްލެންޑް (ޕީއެޗްއީ)ގެ ސައިންޓިސްޓުން ނެރުނު ބަޔާނެއްގައި ބުނީ މިއީ މިކަމާއި ގުޅިގެން ހަދަމުންދާ ދިރާސާތަކުގެ ފުރަތަމަކޮޅު ހޯދުނު ހޯދުންތައް ކަމަށާއި، އެކި މީހުންނަށް ބަލި ޖެހުމުގެ ފުރުސަތު އޮންނަ މިންވަރާއި ވެކްސިން ގުޅިފައި އޮތުމަކީވެސް އެކަށީގެންވާ ކަމެއް ކަމަށެވެ. މިކަން އިތުރަށް ކަށަވަރުކުރުމަށް އިތުރު ބެލުންތައް ބަލަންޖެހޭނެ ކަމަށް ބުނެފައިވެއެވެ.
ޕީއެޗްއީން ބުނީ ޖުލައި 19 އިން ފެށިގެން މިހާތަނަށް ދެނެގަނެވިފައިވާ ޑެލްޓާ ކޭސްތަކުން ހޮސްޕިޓަލުގައި އެޑްމިޓުކުރި މީހުންގެ ތެރެއިން 55.1 އިންސައްތަ މީހުންނަކީ ވެކްސިން ނުޖަހާ ތިބި މީހުން ކަމަށެވެ. 34.9 އިންސައްތަ މީހުންނަކީ ވެކްސިންގެ ދެ ޑޯޒް ފުރިހަމަކޮށްފައިވާ މީހުން ކަމަށް ޕީއެޗްއީން ބުނެފައިވެއެވެ.
އިނގިރޭސިވިލާތުގެ އާބާދީގެ 75 އިންސައްތަ މީހުންނަކީ ވެކްސިންގެ ދެ ޑޯޒް ފުރިހަމަކޮށްފައިވާ މީހުން ކަމަށާއި، ގިނަ ބަޔަކު ވެކްސިން ފުރިހަމަކުރާވަރަކުން ވެކްސިން ޖަހާފައިވާ ގިނަ ބަޔަކު ހޮސްޕިޓަލުތަކުން ފެނިގެންދާނެ ކަމަށް ޕީއެޗްއީން ބުނެއެވެ.
ބޭރުގެ މީޑިއާތަކުން ބުނާގޮތުން ޕީއެޗްއީގެ މި ހޯދުންތަކާއި، ޔޫ.އެސް ސެންޓަރ ފޮރ ޑިޒީސް ކޮންޓްރޯލް އެންޑް ޕްރިވެންޝަންގެ ހޯދުންތަކާ ދިމާވެއެވެ. ވެކްސިން ޖަހާފައިތިބޭ މީހުންގެ ތެރެއިން ޑެލްޓާ ވޭރިއެންޓް ޖެހިފައިވާ މީހުންގެ ގައިން އެހެން މީހުންގެ ގަޔަށް ބަލި ފެތުރުމަކީ ކަންބޮޑުވުމެކެވެ.
ވެކްސިންގެ ދެ ޑޯޒް ފުރިހަމަކޮށްގެން މި ވޭރިއެންޓުގައި ބޮޑުވަރުވުމުން ރައްކާތެރިކޮށްދެއެވެ. އެހެންނަމަވެސް ވެކްސިން ޖަހާފައިތިބި މީހުންގެ ތެރެއިން ޑެލްޓާ ވޭރިއެންޓް ޖެހިފައިވާ މީހުންގެ ފަރާތުން އެހެން މީހުންނަށް ބަލި ޖެހުމުގެ ފުރުސަތު އޮންނަކަން މަދުންނަމަވެސް މިހާރު ވަނީ ހޯދިފައެވެ.
