ބޮމުގެ ހަމަލާތަކެއް ދޭން އުޅޭކަމަށް ބުނި ބުނުން ލަންކާގެ ފުލުހުން ދޮގުކޮށްފި
7 އޯގަސްޓު 2021 | ހޮނިހިރު 03:09ބޮމުގެ ހަމަލާއެއްގެ ބިރު އުފެދުނީ މީހަކު ސޯޝަލް މީޑިއާގައި ކުރި ޕޯސްޓަކުން
ސްރީލަންކާގެ ފުލުހުން
ސްރީލަންކާގެ 6 ސަރަހައްދެއްގައި ބޮމުގެ ހަމަލާ ދޭން ބަޔަކު އުޅޭ ކަމަށް ދެކެވުނު ވާހަކަތަކަކީ ދޮގު ވާހަކަތަކެއް ކަމަށް އެގައުމުގެ ފުލުހުން ބުނެފިއެވެ.
ސްރީލަންކާގެ ނޫސްތަކުގައި ރިޕޯޓުކޮށްފައިވާގޮތުން ކޮލަމްބޯގައި ހުންނަ ފައިވް ސްޓަރ ދެ ހޮޓެލެއްގައާއި، އެ ސިޓީގެ ބަމްބުޅަޕިޓިޔާ، ވެއްލަވައްތަ، މިރިހާނާ، ނުގެގޯޑާ، މައުންޓް ލެވީނިއާ އަދި ދެހިވަލާގައި ބޮން ގޮއްވުމުގެ ނުރައްކާ އޮތް ކަމަށް ސޯޝަލް މީޑިއާގައި މީހަކު ހިއްސާކުރި ޕޯސްޓެއްގައި ވަނީ ބުނެފައެވެ. އެހެންނަމަވެސް މި ސަރަހައްދުތަކަށް ބޮމުގެ ނުރައްކަލެއް ނެތް ކަމަށް ފުލުހުން ވަނީ ބުނެފައެވެ.
ސްރީލަންކާގެ ސިފައިންގެ ވެރިޔާ ޖެނެރަލް ޝަވެންދްރާ ސިލްވާ ވަނީ މި ރިޕޯޓުތަކަކީ ދޮގު ރިޕޯޓުތަކެއްކަން މީޑިއާތަކަށް ކަށަވަރުކޮށްދީފައެވެ. ސޯޝަލް މީޑިއާގައި ދައުރުވި ޕޯސްޓެއްގެ ސަބަބުން ރައްޔިތުންގެ މެދުގައި ބިރުވެރިކަން އުފެދިފައިވަނީ 2019 ވަނަ އަހަރު ހިނގި ކޮލަމްބޯގައި ދިން ބޮމުގެ ހަމަލާތަކަށްފަހު މިފަދަ ކަމަކާ އަނެއްކާވެސް ކުރިމަތިލާންޖެހިދާނެތީ ކަމަށް ޖެނެރަލް ޝަވިންދްރާ ވިދާޅުވިއެވެ.
މިކަމާއި ގުޅުންހުރި އިތުރު ތަހުގީގުތައް ލަންކާ ފުލުހުން ދަނީ ކުރަމުންނެވެ.
2019 ވަނަ އަހަރުގެ އޭޕްރިލް މަހު ލަންކާގައި ދިން ބޮމުގެ ހަމަލާތަކުގައި މުޅިއެކު 21 ބޮން ގޮއްވާލާފައިވާއިރު، 250ށް ވުރެ ގިނަ މީހުން ވަނީ މަރުވެފައެވެ.
