ކޮވިޑް-19ށް އިތުރު 104 މީހަކު ޕޮޒިޓިވްވެއްޖެއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އެންމެ ފަހުން އާންމުކުރި ތަފާސް ހިސާބުތައް ދައްކާގޮތުން ބުދަ ދުވަހުގެ އިރުއޮއްސި 6:00ން ބުރާސްފަތި ދުވަހުގެ އިރުއޮއްސި 6:00އާ ހަމައަށް ރާއްޖެއިން 6237 މީހުން ވަނީ ކޮވިޑަށް ޓެސްޓު ކޮށްފައެވެ. އަދި އޭގެ ތެރެއިން 104 މީހުން ވަނީ ޕޮޒިޓިވްވެފައެވެ. އެއީ މާލެ ސަރަހައްދުން ޕޮޒިޓިވްވި 35 މީހުންނާއި އަތޮޅުތެރެއިން ޕޮޒިޓިވްވި 56 މީހުންނާއި ރިސޯޓުތަކުން ޕޮޒިޓިވްވި 13 މީހުން ކަމަށް އެޗްޕީއޭއިން ބުނެއެވެ. މި 104 މީހުންނާއެކު ރާއްޖެއިން މިހާތަނަށް ކޮވިޑަށް ޕޮޒިޓިވްވި މީހުންގެ އަދަދު ވަނީ 77،999ށް އަރާފައެވެ. އަދި 75،253 މީހުން ވަނީ ބަލިން ރަނގަޅުވެފައެވެ.

މިހާރު 2512 އެކްޓިވް ކޭސް ހިމެނޭއިރު، 20 މީހަކަށް ހޮސްޕިޓަލްގައި އެޑްމިޓްކޮށްގެން ދަނީ ފަރުވާ ދެމުންނެވެ. އަދި 222 މީހުން ވަނީ ބަލީގައި ނިޔާވެފައެވެ.

ރާއްޖެއިން ކޮވިޑަށް ޕޮޒިޓިވްވާ މީހުންގެ އަދަދުތައް ދަށްވާން ފަށާފައި މިވަނީ، ކޮވިޑްގެ ތިންވަނަ ރާޅާއެކު އެޕްރީލް މަހުގެ މެދުތެރެއިން ފަށައިގެން ކޮވިޑްގެ ކޭސްތައް އިންތިހާ ދަރަޖައަށް އިތުރުވުމަށްފަހުގައެވެ. އަދަދުތައް އިތުރުވާން ފެށުމާއިއެކު އެޗްޕީއޭއިން އޭރު އަޅާފައިވާ ފިޔަވަޅުތައް ވަރަށް ވަރުގަދަ ކުރިއެވެ. ނަމަވެސް މިހާރު މިވަނީ ބޮޑެތި ލުއިތަކެއް ދީފައެވެ.

އެގޮތުން މިހާރު ލުއި ނުދެވި ހުރި ކަންތައްތަކަށް އޮގަސްޓު 6 ވަނަ ދުވަހުން ފެށިގެން ލުއި ދިނުމަށް މިހާރު ވަނީ ނިންމާފައެވެ. އެގޮތުން ކެފޭ ރެސްޓޯރަންޓުތައް ހުޅުވާ ގަޑިތައް, ކުރިންވެސް އާންމުކޮށް ހުޅުވާ ގަޑިތަކަށް ބަދަލުކުރުމުގެ ހުއްދަ ވަނީ މިހާރު ދީފައެވެ. އަދި މީހުންގެ އަދަދު ކަނޑައެޅުމެއް ނެތި, ހަފްލާތަކާއި ޕާޓީތައް ބޭއްވުމުގެ ހުއްދަ ދިނުމަށްވެސް ވަނީ ނިންމާފައެވެ. ނަމަވެސް މިފަދަ ހަފްލާތައް ބާއްވަން ޖެހެނީ ކަނޑައަޅާފައިވާ އުސޫލުތަކާ އެއްގޮތަށެވެ. މިގޮތުން, މާސްކު އެޅުމާއި ގައިދުރުކަން ބެހެއްޓުމަށް ޚާއްސަ ސަމާލުކަމެއް ދިނުމަށާއި އޯޕަން އެއަރ ތަންތަނުގައި ހަފްލާތައް ބޭއްވުމަށް އިލްތިމާސްކޮށްފައިވެއެވެ

މީގެ އިތުރަށް ދެވުނު ލުއިތަކުގެ ތެރޭގައި ސްކޫލްތަކާއި ކޮލެޖްތަކާއި ޔުނިވަރސިޓީތަކަށް ވެސް ދަރިވަރުން ހާޒިރުވެ ކިޔެވުމުގެ ކަންތައް ކުރިއަށް ގެންދިއުމުގެ ހުއްދަ ވެސް ދީފައިވެއެވެ. މިލުއިތަކާއެކު ވެކްސިނޭޝަން ޕްރޮގްރާމް މިއަށްވުރެ ހަލުވި ސްޕީޑުގައި ކުރިއަށް ގެންގޮސް, ރައްކާތެރިކަމުގެ ފިޔަވަޅުތަކާއެކު އައު އާންމު ހާލަތުގައި މަސައްކަތްކުރުމަށް ކަމާބެހޭ ފަރާތްތަކުން ދަނީ ތަކުރާރުކޮށް އިލްތިމާސްކުރަމުންނެވެ.