ވެކްސިންގެ މުއްދަތު ނޮވެމްބަރު މަހު ހަމަވާނެ، އެންމެ ބޭނުންވާ ވަރަށް މީހުން ވެކްސިނެއް ނުޖަހާ
މިހާތަނަށް އައިއިރު 4،492 މީހުންނަށް އެސްޓްރަޒެނެކާ ވެކްސިންގެ ފުރަތަމަ ޑޯޒް ދެވިފައިވޭ
ވެކްސިންގެ ފުރަތަމަ ޑޯޒް ޖެހުމަށް އިސްލާމީ މަރުކަޒު ބޭރުގައި ކިއު ހަދާފައި
މިހާރު ރާއްޖެއަށް ލިބިފައިވާ އެސްޓްރަޒެނެކާ ވެކްސިންގެ ޑޯޒްތައް މި ނޮވެމްބަރު މަހު ހަމަވާނެ ކަމަށް ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ)ގެ ތަރުޖަމާން ޑރ. ނަޒްލާ ރަފީޤު ވިދާޅުވެއްޖެއެވެ.
އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޑރ. ނަޒްލާ ވަނީ ރާއްޖޭގައި އެސްޓްރަޒެނެކާ ވެކްސިންގެ ޑޯޒްތައް ޖަހަންފެށިތާ ދުވަސްކޮޅެއް ވެއްޖެ ކަމަށާއި މިހާތަނަށް އައިއިރު 4،492 މީހުންނަށް އެސްޓްރަޒެނެކާ ވެކްސިންގެ ފުރަތަމަ ޑޯޒް ދެވިފައިވާކަން ފާހަގަކުރައްވާފައެވެ. އަދި ކޮވިޝީލްޑުގެ ދެވަނަ ޑޯޒް ނުޖެހި ތިބި މީހުންގެ ތެރެއިން 12،243 މީހުން އެސްޓްރަޒެނެކާ ވެކްސިންގެ ޑޯޒް ޖަހާފައިވާ ކަމަށް ޑރ. ނަޒްލާ ވިދާޅުވިއެވެ.
އެހެން ނަމަވެސް ޑރ. ނަޒްލާ ވަނީ އަދިވެސް އެންމެ ބޭނުންވާ ވަރަށް މީހުން ވެކްސިން ޖަހަން ނާންނަ ކަމަށް ވިދާޅުވެ އެކަމުގެ ކަންބޮޑުވުން ފާޅުކުރައްވާފައެވެ. އަދި އެސްޓްރަޒެނެކާ ވެކްސިންގެ ފުރަތަމަ ޑޯޒް ޖެހުމުގެ ކަންތައްތައް ކުރިއަށް ގެންދާނީ ސެޕްޓެމްބަރު މަހުގެ 1 ވަނަ ދުވަހުގެ ނިޔަލަށް ކަމަށް ވަނީ ވިދާޅުވެފައެވެ.
ޑރ. ނަޒްލާ މިގޮތަށް ވާހަކަދައްކަވާފައިވާއިރު، ސަރުކާރުން ވަނީ އޮގަސްޓު މަހުގެ ނިޔަލަށް ރާއްޖޭގެ އާބާދީގެ ވެކްސިން ޖެހޭ އުމުރުފުރައިގެ 90 އިންސައްތަ މީހުންގެ ވެކްސިނޭޝަން ފުރިހަމަކުރުމަށް އަމާޒު ހިފާފައެވެ. އެގޮތުން ސްކޫލްތަކުގެ މުވައްޒަފުންނާއި މުޅި ތައުލީމީ ދާއިރާގައި މަސައްކަތްކުރާ ހުރިހާ އެންމެން ވެކްސިން ފުރިހަމަ ކުރުމަށް ޚާއްސަ ކެމްޕެއިނެއް, އެޑިއުކޭޝަން މިނިސްޓްރީން އިސްނަގައިގެން ފަށާފައިވާއިރު، ސަރުކާރުގެ ވުޒާރާތަކުގުގައި މަސައްކަތްކުރާ މުވައްޒަފުން ވީހާވެސް އަވަހަކަށް ވެކްސިންގެ ޑޯޒްތައް ފުރިހަމަ ކުރުމަށް ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙް ވަނީ އެދިވަޑައިގެންފައެވެ.
މިހާރު ރާއްޖޭގައި އެސްޓްރަޒެނެކާ ވެކްސިން ޖެހުމުގެ ކަންކަަން ކުރިއަށް ގެންދާއިރު، ވަރަށް އަވަހަށް ފައިޒަރ ވެކްސިން ޖަހަން ފަށާނެ ކަމަށާއި, އެ ވެކްސިން 12 އަހަރާއި 17 އަހަރާ ދެމެދުގެ ކުދިންނަށް ޖަހާނެ ކަމަށް ޑރ. ނަޒްލާ ވަނީ ވިދާޅުވެފައެވެ.
