އިދިކޮޅު ކޯލިޝަންގެ ދައުވަތަށް އެމްއާރްއެމުން ވެސް ބުނީ ނޫނެކޭ
ސަރުކާރުގެ ކޯލިޝަނުގައި ހިމެނޭ ޖުމްހޫރީ ޕާޓީ އާއި އަދާލަތު ޕާޓީއަށް ދިން ދައުވަތަށް އެ ދެޕާޓީން ވެސް ވަނީ ނޫނެކޭ ބުނެފައި
އެމްއާރްއެމްއިން ބޭއްވި ފުރަތަމަ ޖަލްސާގެ ތެރެއިން އެ ޕާޓީގެ ރައީސް، ކުރީގެ ރައީސް މައުމޫނު އަބްދުލް ގައްޔޫމް
އަޅުވެތިކަމުން ގައުމު ސަލާމަތް ކުރުމުގެ ނަމުގައި ޕީޕީއެމް ޕީއެންސީ ކޯލިޝަނުން ފަށާފައިވާ "މިނިވަންކަމުގެ ދިފާއުގައި - ދިވެހީން" ކެމްޕޭނާ ގުޅުމަށް ދީފައިވާ ދައުވަތަށް ސަރުކާރުގެ ކޯލިޝަނުގައި ހިމެނޭ މޯލްޑިވްސް ރިފޯމް މޫވްމެންޓް، އެމްއާރްއެމުން ވެސް ނޫނެކޭ ބުނެފިއެވެ.
އެމްއާރްއެމުން ބުނީ، އެ ޕާޓީގެ ނިންމުން މިހާރު އިދިކޮޅު ކޯލިޝަނާ ހިއްސާ ކޮށްފައިވާ ކަމަށެވެ. އެގޮތުން އެ ޕާޓީއަކީ، މިހާރު އޮތް ސަރުކާރުގެ ކޯލިޝަނުގައި ހިމެނޭ ޕާޓީއެއް ކަމަށާއި، އެމްއާރްއެމުން ކޯލިޝަނުން ވަކިވެ، ގައުމުގެ މަސްލަހަތު ގެއްލޭ އެއްވެސް ކަމެއްގައި ބައިވެރި ނުވާނެ ކަމަށެވެ. އަދި އެފަދަ ކަމަކަށް ވެސް އެ ޕާޓީން ތާއީދު ނުކުރާނެ ކަމަށެވެ.
ސަރުކާރުގެ ކޯލިޝަނުގައި ހިމެނޭ ޖުމްހޫރީ ޕާޓީ އާއި އަދާލަތު ޕާޓީއަށް ދިން ދައުވަތަށް އެ ދެޕާޓީން ވެސް ވަނީ ނޫނެކޭ ބުނެފައެވެ.
މި ކެމްޕޭން އިފްތިތާހު ކޮށްފައިވަނީ މިދިޔަ ހުކުރު ދުވަހުގެ ރެއެވެ. އެރޭ އިދިކޮޅު ކޯލިޝަނުގެ އެކްޓިން ލީޑަރު އަބްދުއްރަހީމް އަބްދުﷲ ވިދާޅުވީ ޕީޕީއެމް/ޕީއެންސީން އިސްނެގި ނަމަވެސް މިއީ ވަކި ޕާޓީއަކުން އެކަނި ކުރިއަށް ގެންދާނެ ކެމްޕޭނެއް ނޫން ކަމަށެވެ. މިއީ ގައުމީ ކެމްޕޭނެއް ކަމަށާއި ކޮންމެ ރައްޔިތަކަށް ވެސް ބައިވެރިވެވޭނެ ކަމަށް ވިދާޅުވިއެވެ.
އިދިކޮޅުން ދެން ސިޓީ ފޮނުވި ޕާޓީއަކީ ސަން ޓްރެވަލް ޝިޔާމްގެ ލީޑަރޝިޕްގެ ދަށުން ހިންގާ އެމްޑީއޭއެވެ. އެމްޑީއޭއަކީ 2018ގެ ރިޔާސީ އިންތިޚާބާ ހަަމައަށް ރައީސް ޔާމީނާއެކު އޮތް ޕާޓީއެކެވެ. އެ ޕާޓީގެ ލީޑަރު އަހުމަދު ސިޔާމް މުހައްމަދަކީ 2013 އިން 2018 އަށް ހިނގި ރަައީސް ޔާމީންގެ ވެރިކަމުގައި އެމަނިކުފާނާ އެންމެ އަރިސް އެކުވެރިޔާ އެވެ. އަދި އެ ކޯލިޝަނުގެ އެއް ޕާޓްނަރެވެ. ނަމަވެސް އިންތިޚާބުގެ ކެންޕެއިން ފެށުމާއެކު އެމްޑީއޭއިން ވަނީ އެއްވެސް ކެންޑިޑޭޓަކަށް ތާއީދު ނުކުރާކަން ހާމަކޮށްފައެވެ.
