އައްޑޫއިން އިތުރު ފަސް މީހުން ޕޮޒިޓިވް
އައްޑޫގެ އަވަށްތަކުގެ ތެރެއިން އެންމެ ގިނަ އަދަދަކަށް ކޮވިޑްގެ އެކްޓިވް ކޭސް މިހާރު ތިބީ މަރަދޫގައި
އައްޑޫ ސިޓީގައި އެކްޓިވް ކޭސްތަކުގެ ގޮތުގައި 27 ކޭހެއް
އައްޑޫ ސިޓީން އިތުރު ފަސް މީހަކު ކޮވިޑް-19 އަށް ޕޮޒިޓިވް ވެއްޖެއެވެ.
އައްޑޫ އެމަޖެންސީ އޮޕަރޭޝަން ސެންޓަރުން އެންމެފަހުން އާއްމުކުރި ތަފާސްހިސާބުތަކަށް ބަލާއިރު، ހޯމަ ދުވަހުގެ ހަވީރު 6 ޖެހުމާ ހަމައަށް ފޭދޫއިން ހަތަރު ކޭސް އަދި މަރަދޫފޭދޫއިން އެއް ކޭސް ވަނީ ފެނިފައެވެ. އޭގެތެރޭގައި ހިމެނެނީ، ރެންޑަމް ސާމްޕަލްތަކުން ޕޮޒިޓިވްވި ހަތަރު ކޭހަކާއި، ފްލޫ ކްލިނިކަށް ދެއްކި މީހުންގެ ތެރެއިން ޕޮޒިޓީވްވި މީހެކެވެ.
އައްޑޫގެ އަވަށްތަކުގެ ތެރެއިން އެންމެ ގިނަ އަދަދަކަށް ކޮވިޑްގެ އެކްޓިވް ކޭސް މިހާރު ތިބީ މަރަދޫގައެވެ. މަރަދޫގައި އެކްޓިވް ކޭސްގެ ގޮތުގައި 18 ކޭހެއް އުޅޭއިރު، ހިތަދޫގެ އެކްޓިވް ކޭސްތަކުގެ އަދަދު ވަނީ ތިނަކަށް ދަށްވެފައެވެ. އަދި ފޭދޫގައި އެކްޓިވް 5 ކޭސް މިހާރު އެބަތިއްބެވެ.
މިހާރު އައްޑޫގެ މުޅި ޖުމްލަ އެކްޓިވް ކޭސްގެ އަދަދު ވަނީ 27 އަށް އަރާފައެވެ.
އައްޑޫއިން ކޮވިޑަށް ޕޮޒިޓިވްވި މީހުންގެ ތެރެއިން 543 މީހުންވަނީ ރަނގަޅުވެފައެވެ. ކޮވިޑް ފެސިލިޓީގައި އެކަކަށް އަންނަނީ ފަރުވާ ދެމުންނެވެ. މި ބަލީގައި ދެ މީހަކު މިހާތަނަށް އައްޑޫ ސިޓީން ވަނީ ނިޔާވެފައެވެ.
