ރާއްޖެއާއި އިންޑިއާގެ ޤާނޫނު ހަދާ މަޖިލީހުގެ ގުޅުންތައް ބަދަހިކުރުމަށް މިހާރު ވަނީ ފުރުސަތު ފަހިވެފައި: އިންޑިއާ

ރާއްޖެއާއި އިންޑިއާގެ ގުޅުން ބަދަހިވެފައިވުމުގެ ނަތީޖާއެއްގެ ގޮތުން، ދެ ޤައުމުގެ ޤާނޫނު ހަދާ މަޖިލީހުގެ ގުޅުންތައް ބަދަހިކުރުމަށް ފުރުސަތު ފަހިވެފައިވާކަމަށް އިންޑިއާއިން ބުނެފިއެވެ.

އިންޑިއާއިން މިފަދައިން ބުނެފައިވަނީ ރާއްޖޭގެ މިނިވަން ދުވަހުގެ މުނާސަބަތުގައި ތަހުނިޔާ ކިޔުއްވުމަށް އިންޑިއާގެ ޤާނޫނު ހަދާ މަޖިލީހުގެ ތިރިގެ ނުވަތަ ލޯކް ސަބާގެ ސްޕީކަރ އޯމް ބްރިލާ, ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް ފޮނުއްވި ސިޓީފުޅެއްގައެވެ. ޖުލައި 23 ވަނަ ދުވަހު އޯމް ބްރިލާ ފޮނުއްވި މި ސިޓީފުޅުގައި ރާއްޖޭގެ މިނިވަންކަމަށް 56 އަހަރު ފުރި 57 އަހަރަށް ކުރިމަތިލުމުން އެކަމުގެ ހެޔޮ އެދުމާއި ތަހުނިޔާ ދިވެހި ހުރިހާ ރައްޔިތުންނަށް ފޮނުއްވިއެވެ.

އޯމް ބްރިލާ ވަނީ 2018 ވަނަ އަހަރު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ސަރުކާރު އައުމުން ދެ ޤައުމުގެ ހީނަރުވެފައިވާ ގުޅުމަށް އާރޯކަން ލިބިފައިވާކަމަށް ވިދާޅުވެފައެވެ. އެގޮތުން މިއަދު ދެ ޤައުމުގެ ގުޅުން އެކި ދާއިރާތަކުން ބަދަހިވެ، ބައިނަލްއަޤްވާމީ މައްސަލަތަކުގައި އެކުގައި ވަކާލާތުކުރާ ދެ ބައިވެރިންނަށް ވެފައިވާކަމަށް ވިދާޅުވިއެވެ. މުސްތަޤުބަލުގައިވެސް ދެ ޤައުމުގެ ޚާރިޖީ ގުޅުން ފެނިގެންދާނީ ފާގަތިކޮށްކަމަށް ވިދާޅުވެ، އޯމް ބްރިލާ ވަނީ, ރާއްޖެއާއި އިންޑިއާގެ ޤާނޫނު ހަދާ މަޖިލީހުގެ ގުޅުންތައް ބަދަހިކުރުމަށް މިހާރު ފުރުސަތު ފަހިވެފައިވާކަމަށެވެ.

އިންޑިއާއަކީ ރާއްޖެއަށް އަބަދުވެސް ހެޔޮ އެދޭނެ އެކުވެރިއެއްކަމަށާއި، ރާއްޖެއިން އެހީ ބޭނުންވެއްޖެ ހާލަތެއްގައި އެހީވުމުގައި ދެމި އޮންނާނެކަމުގެ ޔަޤީންކަން އޭނާ ދެއްވިއެވެ. އޯމް ބްރިލާގެ ސިޓީފުޅު ނިންމަވާލައްވާފައިވަނީ، ދެ ޤައުމުގެ ގުޅުމަށް ފާގަތިކަމަށް އެދި ވަޑައިގެން, ދިވެހި ރައްޔިތުންނަށް އުފާވެރިކަމާއި ފާގަތިކަން ލިބުމަށް އެދިވަޑައިގަންނަވާކަން ހާމަކުރައްވަމުންނެވެ.

މި ސަރުކާރު ވެރިކަމަށް އައުމަށްފަހު ރާއްޖެއާއި އިންޑިއާގެ ގުޅުން ބަދަހިވެ އިންޑިއާގެ އެހީގައި ގިނަ ތަރައްޤީގެ މަސައްކަތްތަކެއް ރާއްޖޭގެ އެކި ކަންކޮޅުތަކުގައި ދަނީ ކާމިޔާބުކަމާއެކު ހިންގަމުންނެވެ. ވަކިން ޚާއްސަކޮށް ކޮވިޑުން އަރައިގަނެ, ވެކްސިން ކަށަވަރުކުރުމަށް އިންޑިއާއިން ރާއްޖެއަށް ޚާއްސަ އަހަންމިއްޔަތުކަމެއް ދިނެވެ. އެގޮތުން އިންޑިއާގެ ސީރަމް އިންސްޓިޓިއުޓްގެ ކޮވިޝީލްޑް ވެކްސިން ފޯރުކޮށްދިން ފުރަތަމަ ޤައުމަކީވެސް ދިވެހިރާއްޖެއެވެ.

ކޮވިޑް-19ގެ މި ހާލަތުގައި އިންޑިއާއިން ފޯރުކޮށްދިން އެހީތެރިކަމުގެ ސަބަބުން ދިވެހިންނަށް ކުރިމަތިވި ގެއްލުންތައް ކުޑަކޮށް، މި ދަތި ޙާލަތުން އަރައިގަތުމަށް ކުރަމުންދާ މަސައްކަތަށް އިތުރު ބާރުވެރިކަމެއް ލިބިއްޖެކަމުގައި ރައީސުލްޖުމްހޫރިއްޔާވެސް މީގެ ކުރިން ވަނީ ވިދާޅުވެފައެވެ. ރައީސުލްޖުމްހޫރިއްޔާ ވަނީ ކާޑުގެ ބާވަތްތަކާއި ޒަރޫރީ ބޭނުންތަކަށް އިންޑިޔާއިން ރާއްޖެއަށް އެތެރެ ކުރާ މުދާ އެތެރެކުރުމަށް ދީފައިވާ ކޯޓާ ތިން އަހަރުގެ މުއްދަތަކަށް އާ ކޮށްދެއްވިކަމަށްޓަކައި އިންޑިއާގެ ބޮޑުވަޒީރަށް ޝުކުރުއަދާކުރައްވާފައެވެ.

މި ކޯޓާއަކީ މީގެކުރިން ކޮންމެ އަހަރަކު އާކުރާ ކޯޓާއެކެވެ. ރައީސުލްޖުމްހޫރިއްޔާ ފާހަގަކުރެއްވެވި ގޮތުގައި މިއީ މިހާތަނަށް މިގޮތަށް ކޯޓާ އެންމެ ގިނަ ދުވަހަށް އެޕްރޫވް ކުރި ފަހަރުކަމަށާއި، މިކަމުގެ ސަބަބުން ވިޔަފާރިތަކަށް އިތުރު ޔަޤީންކަމެއް ލިބި ރާއްޖެއަށް އެތެރެކުރާނެ މުދަލުގެ އަންދާޒާއެއް ކުރެވޭނެކަމުގައެވެ.