ޓެކްސް ދައްކާ ފަރާތްތަކަށް ދެވެން ހުރި ލުއިތައް މި އަންނަނީ ދެމުން: ކޮމިޝަނަރ ޖެނެރަލް އޮފް ޓެކްސޭޝަން

ޓެކްސް ދައްކާ ފަރާތްތަކަށް ގާނޫނީ ތަރަހައިގެ ތެރެއިން ދެވެން ހުރި ލުއިތައް ދެމުން އަންނަ ކަމަށް ކޮމިޝަނަރ ޖެނެރަލް އޮފް ޓެކްސޭޝަން ފަތުޙުﷲ ޖަމީލް ވިދާޅުވެއްޖެއެވެ.

މޯލްޑިވްސް އިންލަންޑް ރެވެނިއު އޮތޯރިޓީގެ 11 ވަނަ އަހަރީ ދުވަހުގެ މުނާސަބަތުގައި ނެރުއްވި މެސެޖްގައި ފަތުޙުﷲ ވިދާޅުވީ މީރާގެ 10 ވަނަ އަހަރީ ދުވަސް އައި އިރުވެސް އެ ކުންފުނި ތަޖުރިބާ ކުރަމުން ދިޔައީ ރާއްޖެއާއި މުޅި ދުނިޔެ ވެސް ފަހުގެ ތާރީޚެއްގައި ދެކެފައިވާ އެންމެ ބޮޑު އާންމު ސިއްހަތުގެ ކާރިސާގެ ތެރޭގައި ވަނިކޮށް ކަމަށެވެ. ކޮވިޑުގެ ޕެންޑަމިކް އަހަރަކަށްވުރެ އިތުރަށް ދިގުދެމިގެން ދިޔުމުގެ ސަބަބުން ރާއްޖޭގެ އިޤްތިޞާދަށް ވަރަށް ބޮޑު ހީނަރުކަމެއް އައިސްފައިވާ ކަމަށާއި އާންމު ދިރިއުޅުމާއި ރައްޔިތުންގެ ފުދުންތެރިކަމަށް ވެސް މިކަމުގެ ސަބަބުން ބޮޑެތި ގޮންޖެހުންތަކާއި ކުރިމަތިވެފައިވާ ކަމަށް ފަތުޙުﷲ ވިދާޅުވިއެވެ.

ކޮވިޑާ ގުޅިގެން އަޅަމުންދާ ފިޔަވަޅުތަކުގެ ސަބަބުން ވިޔަފާރިތަަކަށް ބޮޑެތި ގޮންޖެހުންތަކާ ކުރިމަތިވެފައިވާ ކަމަށާއި މި އުނދަގޫ ހާލަތުން އަރައިގަތުމަށްޓަކައި ޓެކްސް ދައްކާ ފަރާތްތަކުން ކުރަމުންދާ މަސައްކަތްތަަކަށް އެހީތެރިވެދިނުމުގެ ގޮތުން ގާނޫނީ ތަރަހައިގެ ތެރެއިން، ޓެކްސްގެ ނިޒާމުގައި ޓެކްސް ދައްކާ ފަރާތްތަކަށް ދެވެން ހުރި ލުއިތައް ހަމަޖައްސަވައިދެއްވާކަން ފާހަގަކުރައްވައި ފަތުޙުﷲ ވިދާޅުވީ ޓެކުހުގެ ސުންގަޑިތައް ފަސްކޮށްދިނުމާއި އިންސްޓޯލްމަންޓް އުސޫލުން ޓެކްސް ދެއްކުމުގެ ފުރުސަތު އިތުރަށް ފަސޭހަކޮށްދިނުމާއި ޖޫރިމަނާ މާފުކުރުމުގެ އުސޫލު ލުއިކޮށްދީފައިވާ ކަމަށެވެ.

ކޮވިޑުގެ ހާލަތު ދިގުދެމިގެން ދިޔަނަމަވެސް މީރާގެ މަސައްކަތްތައް ހުއްޓުމެއްނެތި ކުރިއަށް ގެންގޮސްފައިވާ ކަމަށާއި ޓެކްސް ނިޒާމު ހިންގުން ހަރުދަނާކޮށް ކުރިއަރާފައިވާ އެހެން ޓެކްސް ނިޒާމުތަކުގައި ވެސް އަމަލުކުރާ އުސޫލުން މީރާގެ މަސައްކަތްތައް ވެސް ކޮމްޕްލަޔަންސް ރިސްކް މެނޭޖްމަންޓް ޕޮލިސީ އާއި ކޮމްޕްލަންސް އިމްޕްރީވްމަންޓް ޕްލޭންގެ ދަށުން ކުރުމަށް ރޭވިފައިވާ މަސައްކަތް ކުރަމުންދާ ކަމަށް ވިދާޅުވިއެވެ.

މީރާގެ އިދާރީ މަސައްކަތްތައް ހަރުދަނާކޮށް ނުރައްކާތެރި ހާލަތަަކަށް ނުވަތަ ކާރިސާއަކަށް ތައްޔާރުވުމުގެ ގޮތުން މުއައްސަސާއަށް ދިމާވެދާނެ ރިސްކްތައް ދެނެގަނެ އަދި އެ ރިސްކްތައް މިޓިގޭޓްކުރުމުގެ ގޮތުން މީރާގެ ބިޒްނަސް ކޮންޓިނިއުޓީ ރިސްކް އަދި އެންޓަޕްރައިޒް ރިސްކް ރަޖިސްޓަރީ އަދި މިޓިގޭޝަން ޕްލޭން ހިމޭނެ ގޮތުން، އިންޓަރނޭޝަނަލް މަނިޓަރީ ފަންޑުގެ ފަންނީ އެހީތެރިކަމާއެކު މީރާގެ ބިޒްނަސް ކޮމިއުނިޓީ ޕްލޭން ފާއިތުވި އަހަރުގެ ތެރޭގައި ވަނީ އެކުލަވާލާފައެވެ. އިޤްތިޞާދީގޮތުން ދަތި ހާލަތެއްގައި ގައުމުވާއިރު ރާއްޖޭން ނަފާ ހޯދާ މަލްޓިނޭޝަނަލް ކުންފުނިތަކުން ރާއްޖެއަށް ލިބެންވާ ޓެކްސް ހަމައަށް ލިބޭކަން ކަށަވަރުކުރުމުގެ މުހިއްމުކަން ބޮޑުވެފައިވާ ކަމަށް ވެސް މި މެސެޖުގައި ވަނީ ފާހަގަކުރައްވާފައެވެ. އެހެންކަމުން މިފަދަ ކުންފުނިތައް އޮޑިޓްކުރުމުގެ ތަމްރީނާއި ހުނަރު މީރާގެ މުވައްޒަފުންގެ ކިބައިގައި އިތުރުކުރުމަށް އެހީތެރިވެދީ އަމަލީ ގޮތުން މީރާގެ އޮޑިޓަރުންނާއެކު މަސައްކަތް ކޮށްދިނުމަށް އޯއީސީޑީ އާއި ޔޫއެންޑީޕީގެ އެހީގައި ހިންގޭ ޓެކްސް އިންސްޕެކްޓާރސް ވިތައުޓް ބޯޑަރސް ޕްރޮގްރާމުގެ ދަށުން ޓްރާންސްފަރ ޕްރައިސިންގ އޮޑިޓާ ގުޅޭ ނިއުޒިލޭންޑްގެ ތަޖުރިބާކާރެއް ހަމަޖެހި މީރާގެ އޮޑިޓަރުންނާއެކު މަސައްކަތް ކުރައްވަމުން ގެންދަވާ ކަމަށް ވެސް ވިދާޅުވިއެވެ.

ފަތުޙުﷲ އިތުރަށް ވިދާޅުވީ މީރާ އިން ޚިދުމަތް ހޯދާ ފަރާތްތަަކަށް އިތުރަށް ފަސޭހަކޮށްދިނުމުގެ ގޮތުން މީރާއަށް ދައްކާ އެންމެހާ ފައިސާ އޮންލައިންކޮށް ދެއްކޭނެ އިންތިޒާމު ހަމަޖެހިފައިވާ ކަަމަށާއި ފައިސާ ދެއްކޭނެ އިތުރު ގޮތެއް ފަހިކޮށްދިނުމުގެ ގޮތުން ދިރާގު ޕޭ އަދި އުރީދޫ އެމްފައިސާ މެދުވެރިކޮށް ފައިސާ ދެއްކޭނެ އިންތިޒާމު ފާއިތުވި އަހަރު ހަަމަޖައްސާފައިވާ ކަމަށެވެ. މީރާ އިން ފާއިތުވި އަަހަރު ކުރި މަސައްކަތްތަކަށް އަލިއަޅުވާލައްވައި ފަތުޙުﷲ ވިދާޅުވީ އިތުރު ދެ އޮފީހެއް ރާއްޖޭގެ ދެ އަތޮޅެއްގައި ގާއިމުކޮށްފައިވާ ކަމަށެވެ. މި އޮފީސްތަކާއެކު ރާއްޖޭގެ 17 އަތޮޅެއްގައި މިހާރު ވަނީ މީރާގެ އޮފީސްތައް ގާއިމުކޮށްފައެވެ.

މީރާގެ ހަޔާތުން 12 ވަނަ އަހަރަކަށް ކުރިމަތިލާއިރު ކާމިޔާބު މުއައްސަސާއެއްގެ ގޮތަށް ކުރިއަށްދަނީ މީރާގެ މުވައްޒަފުންގެ މިންނެތް މަސައްކަތާއި ޓެކްސް ދައްކާ ފަރާތްތަކުންނާއި އާންމުން ރައްޔިތުންގެ ފަރާތުން ލިބެމުންދާ އެއްބާރުލުމުގެ ސަބަބުން ކަމަށް ކޮމިޝަނަރ ޖެނެރަލް އޮފް ޓެކްސޭޝަން ވަނީ ވިދާޅުވެފައެވެ.