ރައްޔިތުންގެ މަޖިލީހުގެ ރައީސް މުޙައްމަދު ނަަޝީދަށް އަމާޒުކޮށް ދިން ހަމަލާއާ ގުޅިގެން ޕްރޮސެކިއުޓަރ ޖެނެރަލް (ޕީޖީ) އޮފީހުން ނޫސްވެރިންގެ ބައްދަލުވުމެއް ބޭއްވުމަށް ނިންމައިފިއެވެ.

މިކަން ހާމަކުރައްވާ ޕީޖީ ހުސެން ޝަމީމް ކުރެއްވި ޓްވީޓެއްގައި ވިދާޅުވީ މި ހަމަލާއާ ގުޅިގެން އެކަމުގައި ޝާމިލުވާ މީހުންނަށް ދައުވާކުރުމަށް ނިންމާފައިވާ ކަމަށާއި، އެކަމުގެ ތަފްސީލު ހާމަކުރުމަށް އަންގާރަ ދުވަހުގެ މެންދުރުފަހު 02:00 ގައި އެ އޮފީހުގެ ފަރާތުން ނޫސްވެރިންގެ ބައްދަލުވުމެއް ބޭއްވުމަށް ނިންމާފައިވާ ކަމަށެވެ.

މި ހަމަލާގެ ތުހުމަތަށް ހައްޔަރުކޮށްފައިވާ ނ. މަނަދޫ ނޫރީގެ ޢަލީ ހައިޝަމަށް ދައުވާކުރުމަށް ދާދި ފަހުން ވަނީ ޕީޖީ އޮފީހަށް ފޮނުވާފައެވެ.

ޕްރޮސެކިއުޓަރ ޖެނެރަލް ޙުސައިން ޝަމީމް ވިދާޅުވީ އިތުރު މީހެއްގެ މައްސަލަ ފުލުހުންގެ މުއައްސަސާއިން ޕީޖީ އޮފީހަށް ފޮނުވާފައިވާ ކަމަށާއި، އެ މައްސަލަ ބަލައިގަނެފައިވާ ކަމަށެވެ. ދައުވާ ކުރުމުގެ ކުރިން ކުރަން ޖެހޭ ދިރާސާތައް ނިންމާފައިވާ ކަމަށާއި, އަދި އަންނަ ހަފުތާގެ ތެރޭގައި ދައުވާކުރުމާ މެދު ގޮތެއް ނިންމާނެ ކަމަށެވެ.

ތަހުގީގު ކުރިއަށްދާކަން ފާހަގަކުރައްވައި ޝަމީމް ވިދާޅުވީ, އަމާޒަކީ މިކަމުގައި ބައިވެރިވާ އެންމެން ހޯދުން ކަމަށާއި، މިކަހަލަ ކަމެއް ތަކުރާރުނުވާނެ ގޮތް ހެދުން ކަމަށެވެ.

ތަހުގީގު ކުރިއަށް ގޮސްފައިވާ ހިސާބާ ބެހޭގޮތުން މައުލޫމާތު ދިނުމަށް ޖުލައި 24 ވީ ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ފުލުހުން ބުނެފައިވަނީ މި ހަމަލާއާ ގުޅިގެން މިހާތަނަށް 10 މީހަކު ހައްޔަރުކޮށްފައިވާ ކަމަށެވެ. އެއީ ހަމަލާ ދިނުމުގައި އަމަލީ ގޮތުން ބައިވެރިވި މީހުންނާއި، ހަމަލާ ރޭވުމުގައި އިސްކޮށް ހަރަކާތްތެރިވި މީހުން ކަމަށެވެ. އަދި 6 މީހެއްގެ ވަނަވަރު ވެސް އާއްމުކޮށްފައިވެއެވެ.

މީގެ ކުރިން ވެސް ފުލުހުން ވަނީ ހަމަލާއާ ގުޅިގެން ހައްޔަރުކުރި ހަތަރު މީހެއްގެ ވަނަވަރު އާންމުކޮށްފައެވެ. އަދި މި ހަތަރު މީހުންގެ މައްޗަށް ދައުވާކުރަން ޖުލައި މަހުގެ 21 ވަނަ ދުވަހު ވަނީ ފޮނުވާފައެވެ.

މި ނޫސްވެރިންގެ ބައްދަލުވުމުގައި ވާހަކަދައްކަވަމުން ޝަމީމް ވިދާޅުވީ މި ތަހުގީގު މިހާރު ވެސް ވަރަށް ކައިރިން ބަލަމުން ގެންދާ ކަމަށާއި ހަތަރު މީހުންނަށް ކުރާ ދައުވާތަކުގެ ތަފްސީލު ކޯޓަށް ހުށަހަޅާނެ ކަމަށެވެ. އަދި އަންނަ މަހު ކުރީ ކޮޅު އެ މައުލޫމާތު ހިއްސާކުރާނެ ކަމަށާއި، ކުރިއަތް އޮތް ތިން މަހެއްހާ ދުވަހުގެ ތެރޭގައި މި މައްސަލައިގެ ތަހުގީގު ނިމޭނެ ކަމަށް އުންމީދު ކުރާ ކަމަށެވެ.