މީރާގެ ސެންޓަރުތަކުން ޚިދުމަތްދޭ ގަޑިތައް އިތުރުކޮށްފި
ދެ އެޕްލިކޭޝަން މެދުވެރިކޮށް އޮންލައިން ޓޯކަން ނެގެން ނެތްނަމަ މީރާގެ 3020460 ނަންބަރަށް ގުޅައިގެން ޚިދުމަތް ހޯދުމަށް އެޕޮއިންޓްމަންޓް ހެއްދޭނެ
ޓޯކަން ނަންބަރު ދޫކުރާނީ މޯބައިލް އެޕްލިކޭޝަން އަދި ކިއުބީ އެޕްލިކޭޝަން މެދުވެރިކޮށް
މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) ގެ ސެންޓަރުތަކުން ޚިދުމަތްދޭ ގަޑިތައް އިތުރުކޮށްފިއެވެ.
މީރާގެ ޓެކްސްޕޭޔަރ ސަރވިސް ސެންޓަރުންނާއި ހުޅުމާލެ ކަލެކްޝަން ސެންޓަރުން ޚިދުމަތްދޭ ވަގުތު އިތުރުކޮށްފައިވަނީ އޮގަސްޓް އެއްވަނަ ދުވަހުން ފެށިގެންނެވެ. އެގޮތުން ޓެކްސްއާއި އެހެނިހެން ފައިސާ ބަލައިގަތުމަށް ނަންބަރު ދޫކުރުމަށް ހަމަޖެހިފައިވަނީ ހެނދުނު 08:00ން މެންދުރުފަހު 15:00ށެވެ. ޓެކްސްޕޭޔަރ ސަރވިސް ސެންޓަރުގެ ރަޖިސްޓްރޭޝަން ކައުންޓަރުންނާއި އިންޕޮމޭޝަން ކައުންޓަރުން ޚިދުމަތް ދިނުމަށް ނަންބަރު ދޫކުރުމަށް ވެސް ހަމަޖެހިފައިވަނީ ހަމަ އެ ގަޑިތަކުގައެވެ.
މީރާގެ ސަރވިސް ސެންޓަރުން ޓޯކަން ދޫކުރުމުގެ ބަދަލުގައި ޓޯކަން ދޫކުރާނީ މޯބައިލް އެޕްލިކޭޝަން އަދި ކިއުބީ އެޕްލިކޭޝަން މެދުވެރިކޮށް ކަމަށް މީރާ އިން ބުންޏެވެ. އަދި އެ ދެ އެޕްލިކޭޝަން މެދުވެރިކޮށް އޮންލައިން ޓޯކަން ނެގެން ނެތްނަމަ މީރާގެ 3020460 ނަންބަރަށް ގުޅައިގެން ޚިދުމަތް ހޯދުމަށް އެޕޮއިންޓްމަންޓް ހެއްދޭނެ ކަމަށް ވެސް މީރާ އިން ބުންޏެވެ.
މީރާ އަށް ހުށަހަޅާ އެންމެހާ ޓެކްސްބަޔާނާއި ދައްކާ އެންމެހާ ޓެކުހާއި އެހެނިހެން ފައިސާ އޮންލައިންކޮށް ދެއްކުމުގެ އިންތިޒާމު ހަމަޖެހިފައިވާތީ އާއި ކޮވިޑުން ރައްކާތެރިވުމުގެ ގޮތުން އިޖުތިމާއީ ގައިދުރުކަން ދެމެހެއްޓުން މުހިންމުވާތީ، އޮންލައިންކޮށް މީރާގެ ޚިދުމަތް ހޯދުމަށް މީރާއިން ވަނީ އިލްތިމާސްކޮށްފައެވެ. އަދި އިތުރު މައުލޫމާތު ހޯދުމަށް ރަސްމީ ގަޑީގައި މީރާގެ ހޮޓްލައިން 1415 އަށް ގުޅުމަށް ނުވަތަ ވައިބަރ ނަންބަރު 9821415 އަށް މެސެޖު ކުރުމަށް މީރާ އިން ވަނީ އެދިފައެވެ.
