އަސްކަރީ ފަރިތަކުރުންތައް ވަރުގަދަކުރާނަމަ މަސްރަހު ގޯސްވާނެ: އުތުރު ކޮރެއާ

އެމެރިކާއާ ގުޅިގެން ދެކުނު ކޮރެއާއިން ކުރިއަށްގެންދާ އަސްކަރީ ފަރިތަކުރުންތައް ބާއްވައިފިނަމަ ކޮރެއާ މަސްރަހުގައި ބަދަހިކުރަން މަސައްކަތްކުރާ ގުޅުންތަކަށް އަސަރުކުރާނެކަމަށް އުތުރު ކޮރެޔާއިން ބުނެފިއެވެ.

އުތުރު ކޮރެޔާއިން މިހެން ބުނެފައި މިވަނީ އެމެރިކާއާ ގުޅިގެން ދެކުނު ކޮރެޔާއިން އޯގަސްޓް މަހުގެ ތެރޭގައި އަސްކަރީ ފަރިތަކުރުންތަކެއް ބާއްވަން މަސައްކަތްކުރަމުންދާކަމަށް ޚަބަރުތައް ހާމަވެފައި ވަނިކޮށެވެ. މި ފަރިތަކުރުންތަކަކީ އުތުރު ކޮރެޔާގެ މަސްލަހަތު ނެތްކަމަކަށްވެފައި، ދެކުނު ކޮރެއާގެ ބާރުވެރިކަން ދައްކާ ޗަރުކޭހެއްކަމަށް އެތައް ފަހަރެއްގެ މަތިން އުތުރު ކޮރެއާއިން އަދި ވަކިން ޚާއްސަކޮށް އެ ޤައުމުގެ ޒަޢީމުގެ ކޮއްކޯފުޅު ކިމް ޔޯ ޖޮން ވަނީ ވިދާޅުުވެފައެވެ.

އެމެރިކާއާ ގުޅިގެން ދެކުނު ކޮރެޔާއިން އޯގަސްޓް މަހުގެ ތެރޭގައި އަސްކަރީ ފަރިތަކުރުން ފަށާ ވާހަކަތައް އަނެއްކާވެސް ފެންމަތިވުމުން، މިކަމާ ގުޅެގޮތުން އުތުރު ކޮރެއާގެ ޒަޢީމުގެ ކޮއްކޯފުޅު ކިމް ޔޯ ޖޮންގް ވިދާޅުވީ މިއީ ދެ ޤައުމުގެ ދެމެދުގައި ރަސްމީ ބައްދަލުވުމެއް ބޭއްވުމަށް މަސައްކަތްކުރަމުންދާ ދަނޑިވަޅެއްކަން އެމެރިކާއިން ވެސް އަދި ދެކުނު ކޮރެއާއިން ވެސް ހަނދާން ބަހައްޓަންޖެހޭކަމަށެވެ. މި ފަދަ ދަނޑިވަޅެއްގައި އެ ދެ ޤައުމު ގުޅިގެން އަސްކަރީ ފަރިތަކުރުންތަކެއް ބޭއްވުމަކީ ބުއްދިވެރިކަމެއް ނޫންކަމަށް ކިމް ޖޮން ޔޯ ޖޮންގް ވިދާޅުވިއެވެ. އުތުރު ކޮރެއާގެ ޒަޢީމް ކިމް ޖޮން އުންގެ ޚާއްޞަ މުޝީރެއްގެ ގޮތުގައި ނުރަސްމީކޮށް މަސައްކަތްކުރައްވާ އޭނާގެ އަންހެން ކޮއްކޮ ކިމް ޔޯ ޖޮންގްވަނީ ދެކުނު ކޮރެޔާއަކީ އުތުރު ކޮރެޔާގެ ދުޝްމަނެއްކަމަށް ވެސް މީގެ ކުރިން ސިފަކުރައްވާފައެވެ.

ދެ ކޮރެއާގެ މައްސަލަ ހައްލުކުރުމަށް އެމެރިކާގެ ކުރީގެ ރައީސް ޓްރަމްޕްގެ ވެރިކަމުގައި ފެށި މަސައްކަތް މަޑުޖެހިފައި އޮތުމަށް ފަހު ފާއިތުވި ދުވަސްތަކުގައި އުތުރު ކޮރެއާ އާއި ދެކުނު ކޮރެއާއާ ދެމެދު ގުޅުންތައް ބަދަހިކުރުމުގެ މަސައްކަތްވަނީ އަނެއްކާވެސް ފަށައިފައެވެ. އެ ގޮތުން ދެ ކޮރެޔާގެ ދެމެދުގައި ގުޅުންތައް ބަދަހިކުރުމަށް ދެ ޤައުމުން ގުޅިގެން ޚާއްޞަ އިދާރާއެއް އަލުން ޤާއިމުކުރުމަށާއި ދެ ޤައުމުގެ ދެމެދުގައި ރަސްމީ ބައްދަލުވުމެއް ބޭއްވުމަށްވަނީ މަޝްވަރާކޮށްފައެވެ. އަދި އުތުރު ކޮރެޔާގެ ޒަޢީމު ކިމު ޖޮން އުންނާއި ދެކުނު ކޮރެޔާގެ ރައީސް މޫން ޖައި އިންނާ ދެމެދު ރަސްމީ ސިޓީތަކެއް ވަނީ ބަދަލުކުރައްވާފައިވާއެވެ. އެއީ 2018 ވަނަ އަހަރުގެ ތެރޭގައި ދެ ޤައުމުގެ ދެމެދުގައި ގުޅުންތައް ގޯސްވިފަހުން ގުޅުންތައް އަލުން ބަދަހިކުރުމަށް ކުރިޔަށް އަޅައި ފުރަތަމަ ފިޔަވަޅެވެ. އޭގެ އިތުރުން ދެ ކޮރެއާގެ ދެމެދުގައި ގުޅުންތައް ބަދަހިކުރެވިއްޖެނަމަ އުތުރު ކޮރެއާއާއި އެމެރިކާއާ ދެމެދު އޮތް ހީނަރުވެފައިވާ ގުޅުންތައް ބަދަހިކުރުމަށް ވެސް ފުރުޞަތު ލިބޭނެއެވެ.

އެމެރިކާއިން އުތުރު ކޮރެއާގެ ނިއުކްލިއާ ޕްރޮގްރާމާމެދު ގެންގުޅޭ ސިޔާސަތުތައް އާއްމުކުރަން ތައްޔާރުވަމުން އަންނަނިކޮށް އުތުރުކޮރެއާއިން އެމެރިކާގެ ރައީސް ޖޯ ބައިޑަންގެ ސަރުކާރާމެދު އެ ޤައުމުން ވަނީ ނުރުހުން ވެސް ފާޅުކޮށްފައެވެ. އުތުރު ކޮރެއާގެ ފޮރިން މިނިސްޓްރީން ނެރުނު ބަޔާނެއްގައި ބުނީ އެމެރިކާ ސަރުކާރުން ދައްކާފައިވާ ވާހަކަތަކުން ދޭހަވަނީ އުތުރު ކޮރެއާއާ މެދު "ދެކޮޅުވެރިކަމުގެ ސިޔާސަތެއް" ގެންގުޅެން ބޭނުންވާކަން ކަމުގައެވެ. މިދިޔަ ހަފްތާގައި ބައިޑެން ވިދާޅުވީ އުތުރު ކޮރެއާގެ ނިއުކްލިއާ ޕްރޮގްރާމަކީ ދުނިޔޭގެ ސަލާމަތަށް އޮތް "ސީރިއަސް ނުރައްކަލެއް" ކަމަށެވެ. ވައިޓް ހައުސްއިން ބުނީ އުތުރު ކޮރެއާއާ މެދު އަމަލު ކުރާނީ ވަރަށް ވިސްނުންތެރިކަމާއެކުގައި ކަމަށެވެ.

ތަރުޖަމާނު ޖެން ސާކީ ވިދާޅުވީ އެމެރިކާގެ ޚާރިޖީ ސިޔާސަތު މުރާޖައާކޮށްފައިވާ ކަމަށާއި އުތުރު ކޮރެއާގެ ނިއުކްލިއާ ހަތިޔާރު އުފެއްދުމުގެ ޕްރޮގްރާމް ހުއްޓުވަން ކުރީގެ ސަރުކާރުތަކުން ފެއިލްވި ސަބަބުތައް ދެނެގަނެ، އާ ސަރުކާރުން ފިލާވަޅު ލިބިގެންފައިވާ ކަމަށެވެ. އޭގެ ބަދަލުގައި އާ ސިޔާސަތު ބިނާވަނީ އަމަލުން ކަންކަން ކުރުމަށާއި ޑިޕްލޮމެޓިކް ގުޅުންތަކުގެ މައްޗަށް ކަމަށް އޭނާ ވިދާޅުވިއެވެ. ސިޔާސަތަށް ގެނައި ބަދަލާ މެދު މަޝްވަރާ ކުރަން ޖަޕާނާއި ދެކުނު ކޮރެއާގެ ވެރިން ވަރަށް އަވަހަށް އެމެރިކާއާ އެކު ބައްދަލުކުރެވޭނެ ކަމަށް އެމެރިކާއިން އުންމީދުކުރެއެވެ. އެމެރިކާގެ ރައީސް ބައިޑަން ކޮންގްރެސްގައި އިއްވެވި ރިޔާސީ ބަޔާނުގައި އުތުރު ކޮރެއާއާ ގުޅޭގޮތުން ދައްކަވާފައިވާ ވާހަކަތަކާ ބެހޭގޮތުން އުތުރު ކޮރެއާގެ ފޮރިން މިނިސްޓަރ ވަނީ ބައިޑަންއާ ފޯނުން ގުޅުއްވައި ވާހަކަދައްކަވާފައެވެ.

އުތުރު ކޮރެއާގެ ޒައީމްގެ ކޮއްކޯފުޅުގެ ބަހުގެ ހޫނު ހަމަލާތަކެއް އެމެރިކާއާއި ދެކުނު ކޮރެއާއަށް އަމާޒުވެފައި މިވަނީ، އެ ޤައުމުގެ ޒައީމް ކިމް ޖޮންގް އުން އާންމުންގެ ތެރެއަށް ނިކުމެވަޑައިގެން އުޅުއްވުން މަދުކުރައްވާފަައިވާ ދުވަސްވަރަކުއެވެ. މިކަމުގައި ވެސް އުތުރު ކޮރެއާގެ ޒައީމްގެ ސީދާ ބަހެއް ވިދާޅުވެފައެއް ނުވެއެވެ.

އުތުރު ކޮރެއާގެ ޒައީމް ކިމް ޖޮން އުން މިފަހަކަށް އައިސް ދޭތެރެ ދޭތެރެއިން އާންމުކޮށް ބޭރަށް ނުކުތުން މެދުކަނޑާލައި "ބްރޭކްތަކެއް" ނަގަން ވަނީ ފަށާފައެވެ. 2014 ވަނަ އަހަރު 40 ދުވަސްވަންދެން އާންމުނަށް ފެނިވަޑައިނުގެން އުޅުއްވުމުން ބައެއް މީޑިއާތަކުން ވަނީ ކިމް އަވަހާރަވެއްޖެ ކަމަށާއި، އެކަން ޝާހީ އާއިލާއިން ސިއްރުކުރަން އުޅެނީކަމަށް ވެސް ރިޕޯޓްކޮށްފައެވެ. އެގޮތުން ބަރު ދަން ލުއިވެ މޫނު ފުޅުގެ ބައްޓަން ވެސް ބަދަލުވެފައިވާކަމަށް އުތުރު ކޮރެއާގެ ދައުލަތުގެ މީޑިއާއިން ވަނީ ރިޕޯޓްކޮށްފައެވެ.