ޔާމީން މަރުކޮމިޝަނަށް ހާޒިރުކުރަނީ ރިޟްވާނުގެ މަރާ ގުޅިގެން ސުވާލު ކުރުމަށް
1 އޯގަސްޓު 2021 | އާދީއްތަ 15:35ރިޟްވާންގެ މަރާ ގުޅޭ އެއްވެސް މައުލޫމާތެއް އެނގޭ ނަމަ ހިއްސާކުރުމަށް އެދިފައިވޭ
ރައީސް ޔާމީން ފުލުހުންގެ އިދާރާއަށް ހާޒިރުކުރުން- އޯގަސްޓު މަހުގެ 3 ވަނަ ދުވަހު މަރުކޮމިޝަނަށް ހާޒިރުވެވަޑައިގަތުމަށް ރައީސް ޔާމީނަށް ވަނީ އަންގާފައި
ކުރީގެ ރައީސް ޢަބްދުﷲ ޔާމީން މަރުކޮމިޝަނަށް ހާޒިރުވެވަޑައިގަތުމަށް އަންގާފައިވަނީ މަރާލާފައިވާ ނޫސްވެރިޔާ އަޙުމަދު ރިޟްވާނާ ގުޅޭގޮތުން ސުވާލު ކުރުމަށް ކަމަށް މަރުކޮމިޝަނުން ބުނެފިއެވެ.
އޯގަސްޓު މަހުގެ 3 ވަނަ ދުވަހު މަރުކޮމިޝަނަށް ހާޒިރުވުމަށް ރައީސް ޔާމީނަށް ވަނީ އަންގާފައެވެ. އެކަމާ ގުޅޭގޮތުން ރާއްޖެއެމްވީއާ ވާހަކަ ދައްކަވަމުން ކޮމިޝަނުގެ މެމްބަރު މިޞްބާޙު ޢައްބާސް ވިދާޅުވީ، ޔާމީން ހާޒިރުވުމަށް އަންގާފައިވަނީ ކޮމިޝަނުން ތަހުގީގު ކުރަމުންދާ މ. ޝައިނިންގ ސްޓަރ ރިޟްވާންގެ މަރާ ގުޅިގެން ސުވާލު ކުރުމަށް ކަމަށެވެ.
އެކަމާ ގުޅޭގޮތުން އެމަނިކުފާނުގެ ޤާނޫނީ ޓީމުގައި ހިމެނިވަޑައިގަންނަވާ, ކުރީގެ ނައިބު ރައީސް ޑރ. މުޙައްމަދު ޖަމީލު ކުރެއްވި ޓްވީޓެއްގައި ވިދާޅުވީ، ރައީސް ޔާމީން މަރު ކޮމިޝަނަށް ހާޒިރުވާން އަންގާފައިވާ ކަމަށާއި، މި ސަރުކާރުގެ ނިޔަތް އޮތީ އެކި ގޮތްގޮތުން ރައީސް ޔާމީނަށް އަނިޔާވެރިވުމަށް ކަމަށެވެ. ޑރ. ޖަމީލް ވިދާޅުވީ، އޯގަސްޓު މަހުގެ 3 ވަނަ ދުވަހު އެ ކޮމިޝަނަށް ހާޒިރުވެވަޑައިގަތުމަށް ރައީސް ޔާމީނަށް އަންގާފައިވާ ކަމަށެވެ.
މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަ ބަލަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އެކުލަވާލާފައިވާ ރިޔާސީ ކޮމިޝަނުން, ރިޟްވާން ރަހީނުކުރި މަންޒަރު ދައްކުވައިދޭ ވީޑިއޯއެއް ޖުލައި މަހު އާންމުކޮށްފައިވާއިރު، އެ ވީޑިއޯ ފަށާފައި ވަނީ މާލެއިން ރިޟްވާން ހުޅުމާލެއަށް ދިއުމަށް ސައިކަލުގައި ދިޔަ މަންޒަރާއި ފެރީޓާމިނަލްގެ ތެރޭގައި ރިޟްވާންގެ ހަރަކާތްތައް ދައްކުވައިދޭ ސީސީޓީވީ ފުޓޭޖްތަކުންނެވެ.
މަރު ކޮމިޝަނުން އާންމުކުރި ވީޑިއޯގައި ގޭ ކައިރިން އޭނާ ރަހީނުކޮށް، ގަދަކަމުން އެ ކާރަށް އަރުވާ މަންޒަރު ވެސް ކުޅެ ދައްކާފައިވެއެވެ. މަރުކޮމިޝަނުން މީގެ ކުރިން ވެސް ވަނީ އޭނާ ކާރަށް އަރުވަން އުޅުމުގެ ތެރޭގައި އެމީހުން އަތުން ވަޅިއެއް ވެއްޓިފައިވާ ކަމަށް ބުނެފައެވެ. އަދި އެ ވަޅިއާ ގުޅޭ އެއްވެސް މައުލޫމާތެއް އެނގޭ މީހަކު ހުރި ނަމަ އަންގަން ވެސް އެދިފައިވެއެވެ. އެ ކޮމިޝަނުން ބުނީ ރިލްވާން ގެއްލުވާލިތާ ހަތް އަހަރުވާން ގާތްވެފައިވިޔަސް އަދިވެސް އެ ހާދިސާގެ މައުލޫމާތު އެނގޭ މީހުން އުޅޭނެ ކަމަށް ގަބޫލުކުރެވޭ ކަމަށެވެ. އެހެންވެ އެފަދަ އެއްވެސް މައުލޫމާތެއް އެނގޭ ނަމަ ހިއްސާކުރުމަށް އެދިފައިވެއެވެ.
ރިޟްވާން ގެއްލުވާލިތާ ފަސް އަހަރަށް ވުރެ ގިނަ ދުވަސްވެފައި ވަނިކޮށް, އޭނާ މަރާލާފައިވާކަމަށް މަރު ކޮމިޝަން އިން ވަނީ ބުނެފައެވެ. އެގޮތުން އެ ކޮމިޝަންގެ ތަހުގީގަށް އެނގިފައިވާ ގޮތުގައި އޭނާ މަރާލައި ކަނޑަށް އެއްލާލީ ކަމަށް ބުނެފައިވެއެވެ. އަދި އެ ހުރިހާ ކަމެއް ވެސް ކޮމިޝަން އިން ގުޅުވާފައިވަނީ ހަރުކަށި ފިކުރާއެވެ. ކޮމިޝަންއިން ބުނިގޮތުގައި އޭނާ ރަހީނުކުރީ ހަރުކަށި ފިކުރުގެ ބައެކެވެ. އަދި އޭނާ މަރާލުމުގެ ކުރިން ޝަހާދަތް ވެސް ލައިދީފައިވެއެވެ،
