އެޗްއާރްސީއެމްގެ އޮފީސް ދެން ހިންގާނީ ކުރީގެ ސްޓާރ ސިނަމާ އިމާރާތުގައި

ހިއުމަން ރައިޓްސް ކޮމިޝަން އޮފް ދި މޯލްޑިވްސް (އެޗްއާރްސީއެމް) ހިންގަމުންދިޔަ އިމާރަތް ބަދަލުކޮށްފިއެވެ.

އެޗްއާރްސީއެމް އިމާރަތް މީގެ ކުރިން ހިންގަމުން ދިޔައީ މއ. އުތުރުވެހި އިމާރާތުގައެވެ. ނަމަވެސް އޯގަސްޓު މަހުގެ 1 ވަނަ ދުވަހުން ފެށިގެން ރަސްމީކޮށް މ.ސްޓަރކްލައުޑްސް އަށް މަސައްކަތްތައް ބަދަލުކޮށް، އައު އިމާރާތުގައި މަސައްކަތް ކުރަން ވަނީ ފަށާފައެވެ. އެހެންނަމަވެސް، ކޮމިޝަނުގެ ޚިދުމަތްތައް އޮންލައިންކޮށް ލިބޭނެ ކަމަށާއި، ކޮމިޝަނުގެ ހޮޓްލައިން 1424ށް ގުޅައިގެން ޚިދުމަތްތައް ފަހި ކުރެވޭނެކަމަށް އެޗްއާރްސީއެމްއިން މައުލޫމާތު ދެއެވެ.

އެކަމާ ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުން އެޗްއާރްސީއެމްގެ މީޑިއާ އޮފިޝަލު ވިދާޅުވީ، ކުރިން ބޭނުން ކުރަމުންދިޔަ އިމާރާތް ބާވުމުގެ ސަބަބުން އެކި ގޮންޖެހުންތައް ހުރި ކަމަށާއި، ކަރަންޓު މައްސަލައާއި، ފެންބޮޑުވުމުގެ ސަބަބުން ދިމާވި ބައެއް މައްސަލަތައް ހުރިކަމަށެވެ.

އެޗްއާރްސީއެމްގެ ޚިދުމަތްތައް މެދުނުކެނޑި ދިނުމަށްޓަކައި ކޮމިޝަނުގެ ހިލޭ ގުޅޭ ނަންބަރު 1424 އާއިcomplaint@hrcm.org.mvއަދިinfo@hrcm.org.mvއީމެއިލްގެ އިތުރުން، ސަރުކާރުގެ މުޢާމަލާތްތައް ކުރުމަށް ހަމަޖެހިފައިވާ ޖެމްސް މެދުވެރިކޮށް ލިބޭ އިންތިޒާމްވަނީ ހަމަޖައްސާފައެވެ. އެގޮތުން ކޮވިޑުގެ ބަލިމަޑުކަމުގެ ތެރޭގައި ސަރުކާރުގެ އޮފީސްތައް ބަންދުކޮށްފައި ހުރިއިރުވެސް ކޮމިޝަނުން ވަނީ މެދުނުކެނޑި ޚިދުމަތްތައް ފޯރުކޮށްދީފައެވެ.

އެޗްއާރްސީއެމްއަށް ކޮންމެ އަހަރަކުވެސް ގިނަ މައްސަލަތަކެއް ހުށައެޅޭއިރު، އެކަށީގެންވާ ވަސީލަތްތައް ނެތުމުގެ ސަބަބުން މައްސަލަތައް އެކަށީގެންވާ ބާރު ސްޕީޑުގައި ކުރިއަށް ގެންދިއުމުގައި ދަތިތައް ހުރިކަން ކޮމިޝަނުން އެކި ފަހަރުމަތިން ފާހަގަކޮށްފައިވެއެވެ.