ރާއްޖޭގައި ޓެލެކޮމިއުނިކޭޝަން ޚިދުމަތްދޭ ދެވަނަ ކުންފުންޏެއް އުފަންވެ މަސައްކަތްތައް ފެށިގެން ދިޔައީ 2005 ވަނަ އަހަރުއެވެ. އެއީ ވަތަނިއްޔާގެ ނަމުގައެވެ. ކުންފުނީގެ މަސައްކަތްތައް ފެށިގެން އައިރު ގިނަ ގޮންޖެހުންތަކަކާ ކުރިމަތިލާން ޖެހުނެވެ. ކުންފުނި އުފައްދައި ރާއްޖޭގައި ޓެލެކޮމިއުނިކޭޝަން ޚިދުމަތްދިނުމުގެ ފުރުސަތު ކުންފުންޏަށް ދިންއިރު، ފުރަތަމަ ހަ މަސް ދުވަހުގެ ތެރޭގައި މުޅި ރާއްޖެއަށް ކަވަރޭޖް ފޯރުކޮށްދޭން ޖެހޭނެކަން ބުނެފައި އޮތްއޮތުން ވެގެން ދިޔައީ އެންމެ ފުރަތަަމަ ކުންފުންޏަށް ކުރިމަތިވި ޗެލެންޖަކަށެވެ. މިހާ ބޮޑު ޗެލެންޖަކަށް މިކަންވީ ސަބަބަކީ އޭރު ރާއްޖޭގައި އޮތް ހަމައެކަނި ޓެލެކޮމިއުނިކޭޝަން ކުންފުންޏަށްވެސް ރާއްޖޭގެ ހުރިހާ ހިސާބަކަށް ޚިދުމަތް ފޯރުކޮށްދޭން ފެށިފައިނުވާތީއެވެ.

ވަތަނިއްޔާއަށް ޓެލެކޮމިއުނިކޭޝަން ޚިދުމަތްދިނުމުގެ ލައިސަންސް ލިބުނީ 2005 ވަނަ އަހަރުގެ ފެބްރުއަރީ މަހުއެވެ. އެއާއެކު ހަ މަސް ދުވަހުގެ ތެރޭގައި ރާއްޖޭގެ ހުރިހާ ހިސާބަކަށް ކުންފުނީގެ ޚިދުމަތް ފޯރުކޮށްދިނުމުގެ މަސައްކަތްތައް ފެށިއެވެ. ނަމަވެސް އެ އަހަރަކީ މޫސުން ގޯސްވެ، ވާރޭވެހުމުގެ ސަބަބުން ރާއްޖޭގެ އެކި ހިސާބުތަކުގައި ފެންބޮޑުވުމުގެ މައްސަލަތައް ފެންމަތިވި އަހަރެއް ކަމުން، ގިނަ ގޮންޖެހުންތަކެއް ވަތަނިއްޔާއަށް ކުރިމަތިވިއެވެ. އެކަމަކު ގޮންޖެހުންތަކާއެކުވެސް ވަތަނިއްޔާގެ އެކި ޓީމުތައް ރާއްޖޭގެ އެކި ހިސާބުތަކުގައި ހަރަކާތްތެރިވާން ފެށިއެވެ. އަދި ޖުލައި މަހުގެ ނިޔަލަށް ރާއްޖޭގެ ހުރިހާ ހިސާބަކަށް ކުންފުނީގެ ޚިދުމަތްދެވޭނެ އިންތިޒާމުތައް ހަމަޖައްސައި، އޮގަސްޓް މަހުގެ އެއްވަނަ ދުވަހު ވަތަނިއްޔާގެ މަސައްކަތްތައް ރަސްމީކޮށް ފެށުނެވެ.

ވަތަނިއްޔާއަށް ގިނަ އަދަދެއްގެ ރައްޔިތުންގެ އެއްބާރުލުން ލިބިގެން ދިޔައިރު، ރަށްރަށަށް މި ޚިދުމަތް ފޯރުކޮށްދިނުމުގެ މަސައްކަތް ކުންފުނިން ކުރަން ފެށުން ވެގެންދިޔައީ ދިވެހިންގެ މޫނުމައްޗަށް ހިނިތުންވުން ގެނުވި ކަމަކަށެވެ. އެގޮތުން ރަށްރަށުގައި ޚިދުމަތް ދިނުމަށް ހަމަޖައްސަންޖެހޭ ކަންތައްތައް ހަމަޖެއްސުމަށް އާންމު ރައްޔިތުންގެ ފަރާތުން ވަރަށް ބޮޑު އެއްބާރުލުމެއް ކުންފުންޏަށް ލިބިގެންދިޔައެވެ. ރަށްރަށުގައި ގާއިމުކުރަންޖެހޭ އެންޓަނާތައް ގާއިމުކުރުމަށްވެސް އެތައް ދުވަހެއް ނަގައެވެ. އެންމެ އެކަށޭނަ ވަސީލަތްތައް ރަށްރަށުގައި ނެތުން ވެގެންދިޔައީ ވަރަށް ބޮޑު ގޮންޖެހުމަކަށެވެ.

ގިނަ ގޮންޖެހުންތަކަކާއި ފެށި މަސައްކަތްތައް ކާމިޔާބު ކަމާއެކު ފުޅާކުރަމުންގޮސް، އަށް އަހަރަށް ފަހު ވަަތަނިއްޔާގެ ނަން އުރީދޫ މޯލްޑިވްސްއަށް ރީބްރޭންޑް ކުރެވިގެން ދިޔައެވެ. 2013 ވަނަ އަހަރުގެ ޑިސެމްބަރު މަހުގެ ތެރޭގައި އުރީދޫ މޯލްޑިވްސްގެ ގޮތުގައި މަސައްކަތްތައް ފަށައި، ކުންފުނިން ފޯރުކޮށްދެމުންދިޔަ ޚިދުމަތްތައް އިތުރަށް ފުޅާކުރިއެވެ. މިއަދާ ހަމައަށް އައިރު ތަފާތު ގިނަ ޚިދުމަތްތައް ތައާރަފުކޮށް، ކަސްޓަމަރުން އެންމެ ހިންހަމަޖެހޭނެ ގޮތަށް ޚިދުމަތްތައް ފޯރުކޮށްދިނުމަކީ އެންމެ ފުރަތަމަ ދުވަހުން ފެށިގެން މިއަދާ ހަމައަށްވެސް އުރީދޫން އެންމެ އިސްކަންދޭ އެއް ކަމެވެ.

އޭގެ އެއް ހެއްކަކީ މުޅި ދުނިޔެއަށް ކުރިމަތިވި ބަލިމަޑުކަމުގެ ތެރޭގައި ކަސްޓަމަރުންނަށް އެހީތެރިވުމުގެ ގޮތުން އެކުންފުނިން ކޮށްދީފައިވާ ކަންތައްތަކެވެ. އިންޓަނެޓްގެ ޚިދުމަތްތައް ފުޅާކޮށް ފަސޭހަކަމާއެކު ކަސްޓަމަރުންނަށް ޚިދުމަތްތައް ލިބޭނެ މަގު ކުންފުނިން ވަނީ ފޯރުކޮށްދީފައެވެ. ކަސްޓަމަރުންގެ ބޭނުންތައް ފުއްދުމައްޓަކައި ކަސްޓަމަރުން ގަޔާވާނެ ތަފާތު ޕެކޭޖުތައް ތައާރަފުކޮށްދިނެވެ. އަދި މިފަހަކަށް އައިސް ރައްޔިތުންގެ އެންމެ ބޮޑު ޝަކުވާއަކަށް ވެފައިފާ އިންޓަނުގެ އަގުތަކަށް ހައްލު ހޯދައިދިނުމުގެ މަސައްކަތްވެސް މިހާރު ވަނީ އުރީދޫން ކޮށްފައެވެ.

ދިވެހި ރައްޔިތުންނަށް ޚިދުމަތްކޮށްދިނުމުގައި ހޭދަކުރި 16 އަހަރުގެ ތެރޭގައި އެކުންފުންޏަށް ހޯދުނު އެންމެ ބޮޑު ކާމިޔާބީއަކީ އިންޓަނެޓާއި މުވާސަލާތީގެ ފެންވަރު ރަނގަޅު ޚިދުމަތްތައް އަތްފޯރާ ފަށުގައި ކަސްޓަމަރުންނަށް ފޯރުކޮށްދިނުމެވެ. އެގޮތުން އުރީދޫ މޯލްޑިވްސްގެ ފިކްސްޑް ބްރޯޑްބޭންޑް އަދި ސުޕަރނެޓްގެ ޚިދުމަތްތައް ފުޅާކުރުމަށް ގިނަ މަސައްކަތްތަކެއް ކުރަމުން އަންނައިރު، ދާދި ފަހުން ވަނީ އުރީދޫ ސުޕަރނެޓް ޕެކޭޖްތަކަށް ބޮޑެތި ބަދަލުތަކެއް ގެނެސް، އަޕްގްރޭޑްކޮށްފައެވެ. މި ބަދަލުގެ ދަށުން ސުޕަރނެޓް ކަސްޓަމަރުންނަށް ފަސް ގުނަ އިތުރު ސްޕީޑާއެކު 100 އިންސައްތާއާ ހަމައަށް އިތުރު ޑޭޓާ އަދި ކުރިއަށްވުރެ ހަލުވި ތްރޮޓްލް އިންޓަނެޓް ސްޕީޑް ލިބިގެންދާ ގޮތަށް މިހާރު ވަނީ ހަދާފައެވެ. އަދި ސުޕަރނެޓް ގެންގުޅުއްވާ ހުރިހާ ކަސްޓަމަރުންނަށް ޑޭޓާ ރޯލް އޯވަރގެ ޚިދުމަތާއެކު، މަސް ނިމޭއިރު ބާކީ ހުންނަ ޑޭޓާ އަނެއް މަހުގެ ޕެކޭޖް އިންކްލޫސިވް ޑޭޓާއާ އެއްވެގެންދާނެ އިންތިޒާމުތައްވެސް މިހާރު އުރީދޫން ވަނީ ހަމަޖައްސާފައެވެ.

އުރީދޫގެ ޚިދުމަތްތައް ރާއްޖޭގެ ހުރިހާ ހިސާބަކަށް ލިބެމުންދާއިރު، ކުންފުނިން ފޯރުކޮށްދެމުން އަންނަ ޚިދުމަތްތައް އިތުރަށް ފުޅާކޮށް އެންމެ ފުރިހަމަ ޚިދުމަތްތައް ކަސްޓަމަރުންނަށް ފޯރުކޮށްދިނުމަށް އެ ކުންފުނިން ދަނީ މެދުކެނޑުމެއް ނެތި މަސައްކަތްކުރަމުންނެވެ.