ޖުލައި މަހު ކަރަންޓު ބިލް ބޮޑުވި މައްސަލަ ޔުޓިލިޓީ ރެގިއުލޭޓަރީ އޮތޯރިޓީން ބަލަން ފަށައިފިއެވެ.

މިދިޔަ ޖުލައި މަހުގެ ކަރަންޓު ބިލް އައި އިރު އެހެން މަސްމަހާ އަޅާ ބަލާއިރު، ބިލް ބޮޑުވެފައިވާ ކަމުގެ ޝަކުވާ ގިނަ ބަޔަކު ކުރަމުންދާ ދަނޑިވަޅެއްގައި ޔުޓިލިޓީ ރެގިއުލޭޓަރީ އޮތޯރިޓީން ނެރުނު ބަޔާނެއްގައި ބުނީ ސްޓެލްކޯގެ ކަސްޓަމަރުންގެ ކަރަންޓު ބިލްތައް މި މަހު ބޮޑުވެފައިވާކަމުގެ ޝަކުވާ އެެ އޮތޯރިޓީގެ ސަމާލުކަމަށް އައިސްފައިވާކަމަށެވެ.

މި މައްސަލަ ރަސްމީކޮށް އެ އޮތޯރިޓީއަށް ހުށަހަޅާފައިނުވާކަމަށް ޔުޓިލިޓީ ރެގިއުލޭޓަރީ އޮތޯރިޓީން ބުނެފައިވެއެވެ. އެހެންނަމަވެސް އެ އޮތޯރިޓީސް އިސްނަގައިގެން މިކަން ހިނގައިދިޔަގޮތް ބަލަން ފަށާފައިވާކަމަށް ވަނީ ބުނެފައެވެ.

ޖުލައި މަހުގެ ކަރަންޓު ބިލް އިންތިހާއަށް ބޮޑުވެފައިވާކަމުގެ ޝަކުވާ ގިނަ ބަޔަކު ކުރަމުންދާއިރު، މިކަމާ ގުޅިގެން ރާއްޖެ އެމްވީއަށް މައުލޫމާތުދެއްވަމުން ސްޓެލްކޯގެ މެނޭޖިންގް ޑިރެކްޓަރ ހަސަން މުޣުނީ ވިދާޅުވީ ޖުލައި މަހުގެ ކަރަންޓު ބިލު ބޮޑުވެފައިވަނީ ސަރުކާރުން ދޭ ސަބްސިޑީ ކަނޑާލުމުން ކަމަށެވެ. ޖޫން މަހުގެ ބިލުން ސަބްސިޑީ ދިނުމަށްފަހު، ޖުލައި މަހުގެ ބިލުން ސަބްސިޑީ ކަނޑާލުމުން ބިލް ބޮޑުވީ ކަމަށް ހީކުރެވުނީ ކަމަށް މުޣުނީ ވިދާޅުވިއެވެ.

މުޣުނީ ވިދާޅުވީ އެ ކުންފުނިން އެއްވެސް ހާލެއްގައި ކަސްޓަމަރުންނަށް އޮޅުވާލައި މަކަރު ހަދާފައެއް ނުވާނެ ކަމަށެވެ. ބިލް ބޮޑުވަނީ ކަރަންޓު ބޭނުންކުރެވޭ މިންވަރުން ކަމަށާއި، ކަރަންޓު ބޭނުންކުރި މިންވަރު ވެސް ސްޓެލްކޯގެ ބިލްތަކުން ފެންނަން ހުންނާނެ ކަމަށް މުޣުނީ ވަނީ ވިދާޅުވެފައެވެ.

ކޮވިޑް-19 ގެ ހާލަތާ ގުޅިގެން ސަރުކާރުން ވަނީ ކަރަންޓު އަދި ފެން ބިލުން ސަބްސިޑީ ދީފައެވެ. ކަރަންޓު ބިލް އަދި ފެން ބިލުން 40 އިންސައްތައިގެ ސަބްސިޑީއެއް ދީފައިވެއެވެ.