ހުކުރު ދުވަހު ޕޮޒިޓިވްވީ 107 މީހުން
މިވަގުތު ހޮސްޕިޓަލުތަކުގައި ފަރުވާ ދެމުން ދަނީ 13 މީހަކަށް
ކޮވިޑް އަށް ޓެސްޓު ކުރުމަށް ސާމްޕަލް ނެގުން
ރާއްޖެއިން އިތުރު 107 މީހުން ކޮވިޑް-19 އަށް ޕޮޒިޓިވްވެއްޖެއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އާންމުކޮށްފައިވާ ފަހުގެ ތަފާސްހިސާބުތައް ދައްކާގޮތުން އިތުރު 107 މީހަކު ޕޮޒިޓިވްވެފައިވާއިރު، އޭގެ ތެރޭގައި ގިނައީ އަތޮޅު ތެރެއިން ޕޮޒިޓިވްވި މީހުންނެވެ. އެގޮތުން އަތޮޅު ތެރެއިން 56 މީހަކު ޕޮޒިޓިވްވެފައިވާއިރު، މާލެ ސަރަޙައްދުންވެސް 30 މީހަކު ޕޮޒިޓިވްވެފައިވެއެވެ.
އޭގެ އިތުރުން، ރިސޯޓުތަކުން 14 މީހަކު ޕޮޒިޓިވްވެފައިވާއިރު، ހަދަމުންދާ ރަށްރަށުން 6 މީހަކާއި، ސިނާއީ މަސައްކަތް ކުރާ ރަށްރަށުން ޕޮޒިޓިވްވި އެކަކު އޭގެ ތެރޭގައި ހިމެނެއެވެ. މި އެންމެންނަކީ 5156 ސާމްޕަލްގެ ތެރެއިން ޕޮޒިޓިވްވެފައިވާ މީހުންނެވެ.
އެއާއެކު ރާއްޖެއިން މިހާތަނަށް ކޮވިޑް-19 އަށް ޕޮޒިޓިވްވި މީހުންގެ ޖުމުލަ އަދަދު މިވަނީ 77،309ށް އަރާފައެވެ. އޭގެ ތެރެއިން 74،481 މީހަކު މިހާތަނަށް ބަލިން ރަނގަޅުވެފައިވާއިރު، މިހާތަނަށް ރާއްޖެއިން ބަލި ޖެހިގެން ނިޔާވެފައިވަނީ 221 މީހެކެވެ.
އެޗްޕީއޭއިން އާންމުކޮށްފައިވާ މައުލޫމާތުތަކަށް ބަލާއިރު، މިވަގުތު ހޮސްޕިޓަލުތަކުގައި ފަރުވާ ދެމުން ދަނީ 13 މީހަކަށެވެ.
