މެލޭޝިއާގެ ބޮޑުވަޒީރުގެ އިސްތިއުފާދިނުމަށް ގޮވާލައި ޕްރެޝަރ ބޮޑުވެއްޖެ

މެލޭޝިއާގެ ބޮޑު ވަޒީރުގެ އިސްތިއުފާ ދިނުމަށް ގޮވާލައި ޕްރެޝަރު ބޮޑުވެއްޖެއެވެ.

އެގައުމުގައި ކޮވިޑާ ގުޅިގެން އަޅާފައިވާ ފިޔަވަޅުތައް ގާނޫނު ހަދާ މަޖިލީހަށް އޮޅުވާލިކަމަށް ރައީސް ވިދާޅުވުމާއެކު ބޮޑުވަޒިރު އިސްތިއުފާ ދޭން ޕްރެޝަރު ބޮޑުވެއްޖެއެވެ. ބޮޑުވަޒީރު މުހްޔިއްދީން ޔާސީން ވެރިކަމަށް ވަޑައިގެންނެވީ އިންތިޚާބަކާ ނުލައެވެ. ބައެއް ޕާޓީތަކުން ސަރުކާރަށް ކުރި ތާއީދު އަނބުރާ ގެންދިޔުމުން ޔާސީނަށް މަގާމު ގެއްލުން އެކަށީގެންވެއެވެ.

ކޮވިޑާ ގުޅިގެން އަޅާފައިވާ ފިޔަވަޅުތަކާއެކު ގާނޫނު ހަދާ މަޖިލީހުގެ ޖަލްސާތައް ވަނީ މެދުކަނޑާލާފައެވެ. މަހަކަށްވުރެ ގިނަ ދުވަހުގެ މެދުކެނޑުމަކަށްފަހު، މި ހަފުތާގައި ޖަލްސާތައް އަލުން ވަނީ ފަށާފައެވެ. ބައެއް ރިޕޯޓުތައް ބުނާ ގޮތުގައި މަޖިލީހުގެ ޖަލްސާތައް މެދުކަނޑާލީ ޔާސީންގެ ވެރިކަން ދެމެހެއްޓޭނެ ގޮތެއްވޭތޯ ބެލުމަށެވެ.

މިދިޔަ ހޯމަ ދުވަހު، ގާނޫނާ ބެހޭ މިނިސްޓަރު މަޖިލީހުގައި ވިދާޅުވެފައިވަނީ، އޯގަސްޓް އެއް ވަނަ ދުވަހު ކުއްލި ނުރައްކަލުގެ ހާލަތު ނިމުމަކަށް އަންނާނެ ކަމަށެވެ. އެއާއެކު އޭގެ ދަށުން އެކުލަވާލި ގަވާއިދުތަކަށް އަމަލުކުރުން ވެސް ހުއްޓޭނެ ކަމަށެވެ. އިދިކޮޅު މެމްބަރުން ތުހުމަތު ކޮށްފައިވަނީ، ކުއްލި ނުރައްކަލުގެ ހާލަތު ދިގުދަންމަނީ، ޔާސީގެ އިތުބާރުނެތް ކަމުގެ ވޯޓަށް ހުރަސް އެޅުމަށެވެ.

ރަސްގެފާނު ސުލްތޯން އަބްދުﷲ ސުލްތޯން އަހްމަދު ޝާހްގެ ގަނޑުވަރުން ބުރާސްފަތި ދުވަހު ބުނީ ގަވާއިދުތައް އުވާލުމުގެ ހުއްދަ ރަސްގެފާނު މިހާތަނަށް ދެއްވާފައިނުވާ ކަމަށެވެ. މަޖިލީހަށް ދޮގު މައުލޫމާތު ފޯރުކޮށްދިނުމުން ރަސްގެފާނު އެކަމާ ހިތްހަމަޖެހިވަޑައި ނުގަންނަވާކަންވަނީ ހާމަކޮށްފައެވެ.