2021ވަނަ އަހަރުގެ ދެވަނަ ކުއާޓަރގައި ޖުމްލަ ފައިދާގެ ގޮތުގައި އެސްޓީއޯއަށް 383 މިލިއަން ރުފިޔާ ލިބިފައިވާ ކަމަށް އެ ކުންފުނިން ހާމަކޮށްފިއެވެ.
އެސްޓީއޯ އިން ބުނީ މިއީ އޭގެ ކުރީ ކުއާޓަރއާ އަޅާބަލާއިރު 4 އިންސައްތައިގެ އިތުރުވުމެކެވެ. ނިމިދިޔަ ކުއާޓަރގެ ކުންފުނީގެ ޖުމްލަ އާމްދަނީ އަކީ 2.2 ބިލިއަން ރުފިޔާއެވެ. ކޮވިޑުގެ ހާލަތު ގޯސްވެ މެއި މަހުން ފެށިގެން ސަރުކާރުން ކޮވިޑް ކޮންޓްރޯލް ކުރުމަށް އެޅި ފިޔަވަޅުތަކާއެކު ކުންފުނީގެ ބައެއް ވިޔަފާރިތަކަށް އަސަރުކޮށްފައިވީނަމަވެސް ކުންފުނިން ކުރަމުންދާ މައިގަނޑު ވިޔަފާރިތައް ރަނގަޅު ކުރެވި އެ ވިޔަފާރިތަކުގެ އާމްދަނީ އިތުރު ކުރެވިފައިވާ ކަމަށް އެ ކުންފުނިން ބުންޏެވެ. މިދިޔަ އަހަރު ތެލުގެ ވިޔަފާރިއަށް އައިސްފައިވާ ހިނަރުކަމުން އަރައިގަނެވި މިއަހަރުގެ ފުރަތަމަ ކުއާޓަރގައި ތެޔޮ ވިއްކި އަދަދު އިތުރުކުރެވި މި ކުއާޓަރގައި ވެސް މިދިޔަ ކުއާޓަރއާ ގާތްގަނޑަކަށް އެއްވަރެއްގައި ވަނީ ހިފެހެއްޓިފައެވެ.
ސިއްހީ ދާއިރާއަށް ބޭނުންވާ ބޭސް، މެޑިކަލް ކޮންސިއުމަބަލްއާއި އިކުއިޕްމަންޓްސް ވަނީ މެދުނުކެނޑި ފޯރުކޮށްދީފައިވާ ކަމަށާއި ކުންފުނީގެ ޖުމްލަ އާމްދަނީ ވަނީ އޭގެ ކުރީ ކުއާޓަރއާ އަޅާބަލާއިރު 3 އިންސައްތަ ވަނީ އިތުރުވެފައެވެ. ހިންގުމުގެ ޚަރަދު ކެނޑުމަށްފަހު އަދި ޓެކްސްއަށް ކެނޑުމުގެ ކުރިން އެސްޓީއޯގެ މިއަހަރުގެ ދެވަނަ ކުއާޓަރގެ ފައިދާއަކީ 133 މިލިއަން ރުފިޔާއެވެ. މިއީ އޭގެ ކުރީ ކުއާޓަރއާ އަޅާބަލާއިރު 2 އިންސައްތަ އިތުރުވުމުކެވެ. މީގެ މައިގަނޑު ސަބަބަކީ ޖުމްލަ ފައިދާ އިތުރުކުރެވިފައިވުމާއި ފައިނޭންސް ކުރުމުގެ ޚަރަދު ކުޑަކޮށްފައިވުން ކަމަށް އެ ކުންފުނިން ބުންޏެވެ.
ޓެކްސްއަށް ކެނޑުމަށްފަހު ސާފު ފައިދާ އަކީ 110 މިލިއަން ރުފިޔާ ކަމަށާއި މިއީ އޭގެ ކުރީ ކުއާޓަރއާ އަޅާބަލާއިރު 1 އިންސައްތައިގެ ކުރިއެރުމެކެވެ.
