އަފްޣާނިސްތާނުގެ ކަންދަހާރުގެ އާންމުން ސިޓީ ދޫކޮށް ފިލަން ފަށައިފި
29 ޖުލައި 2021 | ބުރާސްފަތި 07:02އެސިޓީގައި ކުދިން ސްކޫލަށް ފޮނުވުމާއި އާންމުން ދިރިއުޅުމުގެ ކަންކަމުގައި ބޭރަށް ނުކުމެ އުޅުމަކީ ރައްކާތެރިކަމެއް ނޫން
ކަންދަހާރު ދޫކޮށް އެސަރަހައްދުގައި ދިރިއުޅޭ އާއިލާއެއް ދަނީ
އަފްޣާނިސްތާނުގެ ކަންދަހާރު ސިޓީ، ޠާލިބާނުންގެ އަތްދަށަށް ދިއުމުން އާންމުން ސިޓީ ދޫކޮށް ފިލަން ފަށައިފިއެވެ.
ކަންދަހާރު ސިޓީގައި ދިރިއުޅޭ އެތައް ބަޔަކު ގެދޮރު ދޫކޮށް ފިލަން ފަށާފައިވާ އިރު، ޠާލިބާން ސިފައިން އެ ސިޓީގައި ހަރަކާތްތެރިވާން އަދި ނުފަށާ ކަމަށް އަލްޖަޒީރާގައި ވަނީ ރިޕޯޓްކޮށްފައެވެ. ނަމަވެސް އެ ސިޓީގެ ވަށައިގެންވާ ސަރަހައްދުތަކަށާއި އެ ސިޓީއަށް ޠާލިބާން ހަނގުރާމަވެރިން އައުމަށް މާ ގިނަ ދުވަސްތަކެއް ނުނަގާނެ ކަމަށް ރިޕޯޓްތައް ބުނެއެވެ.
އޭގެ އިތުރުން އެސިޓީގައި ކުދިން ސްކޫލަށް ފޮނުވުމާއި އާންމުން ދިރިއުޅުމުގެ ކަންކަމުގައި ބޭރަށް ނުކުމެ އުޅުމަކީ ރައްކާތެރިކަމެއް ނޫން ކަމަށް އެ ސިޓީގައި ދިރިއުޅޭ ރައްޔިތުންނާ ހަވާލާދީ އަލްޖަޒީރާގައި ވަނީ ރިޕޯޓްކޮށްފައެވެ. އެގޮތުން އެ ސިޓީގެ ހުރިހާ ފިހާރަތަކެއް ވެސް މިހާރު ބަންދުކޮށްފައިވާ ކަމަށް ރިޕޯޓްތައް ބުނެއެވެ.
އަފްޣާނިސްތާނުގައި އެގައުމުގެ ސަރުކާރާއި ޠާލިބާނުން ހަނގުރާމަ ކުރަމުންދާތާ މިހާރު 18 އަހަރަށް ވުރެ ގިނަ ދުވަސްވެފައިވާއިރު، މި ދާޚިލީ ހަނގުރާމާގައި އެ ގައުމުގެ އާންމުންގެ އެތައް ބަޔަކު ވަނީ މަރުވެފައެވެ.
