ކޮވިޑަށް ފަރުވާދިނުމަށް ބެންކޮކް އެއަރޕޯޓުގައި ހޮސްޕިޓަލެއް އަޅައިފިއެވެ.

ބެންކޮކްގެ ބައިނަލްއަގުވާމީ އެއަރޕޯޓުގައި އަޅާފައިވާ މި ހޮސްޕިޓަލް އަޅާފައިވަނީ، ކާގޯ ގުދަނެއް ހުސްކުރުމަށްފަހުގައެވެ. ފަރުވާދިނުމަށް ޚާއްސަކޮށްގެ 1800 އެނދާއެކު، އެ ހޮސްޕިޓަލުގައި ކޮވިޑަށް ފަރުވާ ދިނުމަށް ބޭނުންވާ ހުރިހާ އިންތިޒާމުތަކެއްވެސްވަނީ ހަަމަޖައްސާފައެވެ.

ކޮވިޑަށް ޚާއްސަ ހޮސްޕިޓަލެއް އެއަރޕޯޓުގައި ގާއިމް ކުރިއިރު، އެ ގައުމަކީ ކޮވިޑްގެ އެންމެ ފުރަތަމަ ފެނުނު ގައުމުތަކުގެ ތެރޭގައި ހިމެނޭ ގައުމެކެވެ. މިހާރުވެސް އެ ތައިލެންޑްގައި ބަލި ފެތުރެމުން އަންނާތީ ވަނީ ޚާއްސަ ފިޔަވަޅުތަކެއް އަޅާފައެވެ.

ފާއިތުވި 24 ގަޑިއިރުގެ ތެރޭގައި 16,533 މީހުންނަށްވަނީ ބަލިޖެހިފައެވެ. އަދި ބަލިމަޑުކަމުގައި 133 މީހުންވަނީ މަރުވެފައެވެ. އެއާއެކު ތައިލޭންޑުގައި ބަލިޖެހުނު މީހުންގެ ޖުމުލަ އަދަދުވަނީ 543,361އަށް އަރާފައެވެ. އަދި ބަލީގައި މަރުވި މީހުންގެ އަދަދުވަނީ 4,397އަށް އަރައިފައެވެ.

ތައިލެންޑްގެ ސަރުކާރުގެ އަމާޒުކޮށްފައިވަނީ އަހަރު ނިމުމުގެ ކުރިން 50 މިލިޔަން މީހުންނަށް ވެކްސިން ދިނުމަށެވެ. ނަމަވެސް އެ ޤައުމުގެ 66 މިލިޔަން މީހުންގެ އާބާދީން ވެކްސިންގެ ޑޯޒުތައް މިހާތަނަށް ފުރިހަމަކޮށްފައިވަނީ 5.6 އިންސައްތަ މީހުންނެވެ. ފުރަތަމަ ޑޯޒް ފުރިހަމަ ކޮށްފައިވަނީ އާބާދީގެ 19.2 އިންސައްތައެވެ.