މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން އެމެރިކާގައި ރާއްޖެ އަކީ ލަގްޒަރީ މަންޒިލެއް ގޮތުގައި އިޝްތިހާރުކުރުމަށް ޚާއްސަ ސަމިޓެއްގައި ބައިވެރިވެއްޖެއެވެ.

ޖުލައި މަހުގެ 25ން 27ށް ކުރިއަށްދާ ލަގްޒަރީ ޓްރެވެލް އެޑްވައިޒާސް އަލްޓްރާ ސަމިޓުގައި އެމްއެމްޕީއާރުސީން ރާއްޖެ ތަމުސީލު ކުރާއިރު، މި ސަމިޓު ކުރިއަށް ދަނީ އެމެރިކާގެ ޓެކްސަސްގައެވެ.

އެމްއެމްޕީއާރުސީން މައުލޫމާތުދޭ ގޮތުގައި މި ސަމިޓްގައި ބައިވެރިވުމުގެ މަގުސަދަކީ ކޮވިޑް-19ގެ ސަބަބުން ރާއްޖޭގެ ފަތުރުވެރިކަމުގެ ދާއިރާއަށް ފާއިތުވި އަހަރު ކުރިމަތިވި ގޮންޖެހުންތަކާއެކު، ލަގްޒަރީ ޓްރެވެލްއަށް މާކެޓެއްގެ ގޮތުގައި ރާއްޖެ އިޝްތިހާރުކުރުމަށް އެމްއެމްޕީއާރުސީން ކުރަމުންދާ މަސައްކަތްތައް ހުއްޓާނުލައި ކުރިއަށް ގެންދިއުމެވެ. އަދި ރާއްޖެއަކީ ލަގްޒަރީ ޓްރެވެލްއަށް މާކެޓެއްގެ ގޮތުގައި ފަތުރުވެރިންގެ މެދުގައި އޮތް މަގުބޫލުކަން ފަޑުވިޔަ ނުދީ ހިފެހެއްޓުމަކީ މި ސަމިޓުގައި ބައިވެރިވުމުގެ އެއް މަގުސަދުކަމަށް އެމްއެމްޕީއާރުސީން ފާހަގަކުރެއެވެ.

މިއީ މި އަހަރުގެ ތެރޭގައި އެމެރިކާ މާކެޓުގައި ރާއްޖެ އިޝްތިހާރުކުރުމަށް އެމްއެމްޕީއާރުސީން ބައިވެރިވާ ފުރަތަމަ ފިޒިކަލް އިވެންޓެވެ. ލަގްޒަރީ މާކެޓުތައް އިޝްތިހާރުކުރުމަށް ބޭއްވޭ މި ބީޓުބީ ސަމިޓަކީ ދާއިރާގައި އެންމެ ތަރުހީބު ބޮޑު އެއް އިވެންޓެވެ. މި ސަމިޓުގެ ސަބަބުން ދިވެހި ކުންފުނިތަކަށް އެމެރިކާ ސަރަހައްދުގެ މާކެޓްތަކާއެކު ގުޅުން ބަދަހިކުރުމުގެ ފުރުސަތު ލިބިގެންދާނެ ކަމަށް އެމްއެމްޕީއާރުސީން ފާހަގަކުރެއެވެ.

މި ސަމިޓުގައި ބައިވެރިވުމުގެ ދައުވަތު ދެނީ ލަގްޒަރީ މާކެޓްތަކުގައި އެންމެ ފާހަގަކޮށްލެވޭ ކުންފުނިތަކުގެ ވެރިންނަށާއި، މެނޭޖަރުންނަށް ކަމަށް އެމްއެމްޕީއާރްސީއިން ފާހަގަކުރެއެވެ.

މިހާރު ރާއްޖެއަށް އެންމެ ގިނަ އަދަދެއްގެ ފަތުރުވެރިން އަންނަ 10 ގައުމުގެ ލިސްޓުގައި އެމެރިކާ ހިމެނެއެވެ. އެގޮތުން މި އަހަރުގެ މިހާތަނަށް އެ ގައުމުން 23,504 ފަތުރުވެރިން ވަނީ ރާއްޖެ އައިސްފައެވެ.

ރާއްޖެއަކީ ލަގްޒަރީ މާކެޓެއްގެ ގޮތުގައި އިޝްތިހާރު ކުރުމަށް ގިނަ މަސައްކަތްތަކެއް ކުރަމުންދާ އިރު، މިހާރު ވެސް އެމްއެމްޕީއާރުސީން ދަނީ ދުނިޔޭގެ 10ށް ވުރެ ގިނަ މާކެޓުގައި ރާއްޖެ އިޝްތިހާރު ކުރަމުންނެވެ.