އަންނަ އޯގަސްޓް މަހު ކުޅުމަށް ނިންމާފައިވާ އޭއެފްސީ ކަޕުގެ ޕްލޭއޮފް މެޗާ ދިމާކޮށް ކުލަބު އީގަލްސްގެ ފަރިތަކުރުންތަކުގައި ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) ބައިވެރިވާން ފަށައިފިއެވެ.
އެގޮތުން އަންގާރަ ދުވަހު މާފަންނު ޓާފް ދަނޑުގައި އީގަލްސްއިން ކުރިއަށްގެންދިޔަ ފަރިތަކުރުންތަކުގައި ދަގަނޑޭ ވަނީ ބައިވެރިވެފައެވެ.
އީގަލްސްގެ ފަރިތަކުރުންތަކުގައި ދަގަނޑޭ ބައިވެރިވިއިރު، ދާދި ފަހުން އެ ޓީމުން ވަނީ އޭއެފްސީ ކަޕަށް ތަޖުރިބާކާރު ފޯވާޑް އަލީ ފާސިރު (ސެންޓޭ) އަދި ތަޖުރިބާކާރު ދެ މިޑްފީލްޑަރުން ކަމަށްވާ މުޙައްމަދު އާރިފް (ބަކާ) އާއި އިސްމާޢީލް އީސަ (މެސީ) ގެނެސްފައެވެ. މީގެ ތެރެއިން ދަގަނޑޭ އާއި ސެންޓޭ މިދިޔަ ސީޒަނުގައި ކުޅުނީ ކުލަބު ވެލެންސިއާއަށެވެ.
މީގެ ކުރިން "ރާއްޖެ.އެމްވީ" އަށް މައުލޫމާތުދެމުން އީގަލްސް އޮފިޝަލަކު ބުނީ ކުރިއަށް އޮތް އޭއެފްސީ ކަޕުގެ ޕްލޭއޮފް މެޗަށް ހަތް ބަދަލު ގެނެވޭ ކަމަށާއި، އެހެންކަމުން ޓީމު ވަރުގަދަ ކުރެވޭތޯ މަސައްކަތް ކުރަމުން އަންނަ ކަމަށެވެ. އަދި މިހާރު އެ ޓީމާ ގުޅުނު ކުޅުންތެރިންގެ އިތުރުން، އިތުރު ކުޅުންތެރިންތަކެއްވެސް އީގަލްސްއިން ފެނުމުގެ ފުރުސަތު އެބައޮތް ކަމަށް ވަނީ ބުނެފައެވެ.
ދަގަނޑޭ އީގަލްސްގެ ފަރިތަކުރުންތަކުގައި ބައިވެރިވަމުން އަންނައިރު، ރާއްޖޭގެ މޮޅު ކުޅުންތެރިޔާގެ މަގާމު ހަ ފަހަރެއްގެ މަތިން ހޯދާފައިވާ ދަގަނޑޭ ފުޓްބޯޅަ ކެރިއަރު ފެށީ އުމުރުން 16 އަހަރުގައި 2001 ވަނަ އަހަރު ވެލެންސިއާއިންނެވެ. އޭގެ ފަހުން ދަގަނޑޭ ވަނީ ނިއު ރޭޑިއަންޓް ސްޕޯޓްސް ކުލަބާއި، ބްރޫނާއީގެ ޑީޕީއެމްއެމް އެފްސީ އާއި، ވީބީ އައްޑޫ އެފްސީ އަދި މެލޭޝިއާގެ ޕީޑީއާރުއެމް އެފްއޭ އާއި، މާޒިޔާ ސްޕޯޓްސް އެންޑް ރެކްރިއޭޝަނާއި، ޓީސީ ސްޕޯޓްސް ކުލަބު އަދި ކުލަބު ގްރީން ސްޓްރީޓްސްއަށްވެސް ކުޅެފައެވެ.
އޭއެފްސީ ކަޕުގެ ޕްލޭއޮފް މެޗަށް ޓީމު ވަރުގަދަކުރުމުގެ މަސައްކަތް އީގަލްސްއިން ކުރަމުން އަންނައިރު، ޕްލޭއޮފް މެޗު ކުޅޭނީ އަންނަ އޯގަސްޓް މަހުގެ 15 ވަނަ ދުވަހުއެވެ. އަދި އެއަށްފަހު ގްރޫޕް ސްޓޭޖުގެ މެޗުތައް ކުރިއަށްދާނީ އަންނަ މަހުގެ 18، 21 އަދި 24 ވަނަ ދުވަހުއެވެ. އޭއެފްސީ ކަޕުގެ ގްރޫޕް ސްޓޭޖުގައި މި ވަގުތު އޮތީ މާޒިޔާގެ އިތުރުން އިންޑިއާގެ މޯހަން ބަގާން އާއި ބަންގްލަދޭޝްގެ ބަޝުންދަރާ ކިންގްސްއެވެ. ގްރޫޕް ސްޓޭޖުގެ ފަހު ޖާގަ ލިބޭނީ އީގަލްސް އާއި އިންޑިއާގެ ބެންގަލޫރު އެފްސީ ކުޅޭ ޕްލޭއޮފް މެޗުން މޮޅުވާ ޓީމަކަށެވެ.
