އިސްކަންދަރު ސްކޫލު ގޯތިތެރޭފައި ހުރި ގޮނޑިއެއް މަތީ އޮތް ދަބަހެއް ވަގަށް ނެގި މައްސަލައާ ގުޅިގެން ފުލުހުން މީހަކު ހޯދަން ފަށައިފި އެވެ.

ފުލުހުން ބުދަ ދުވަހު ވަނީ މިކަމާ ގުޅިގެން ވީޑިޔޯއެއްވެސް އާއްމުކޮށްފަ އެވެ. ފުލުހުން ބުނީ މިދިޔަ އޭޕްރީލް މަހުގެ 13 ވަނަ ދުވަހުގެ ވަގުތެއްހައި އިސްކަންދަރު ސްކޫލު ގޯތިތެރޭގައި ހުރި ގޮނޑިއެއް މަތީ ބާއްވާފައި އޮތް އަތް ދަބަހެއް ގެއްލިގެން ބެލި ބެލުމުން، މީހަކު އެ  އަތް ދަބަސް ނަގާ މަންޒަރު ފެނިފައިވާ ކަމަށެވެ.

އަދި ވީޑިޔޯ އިން އާއްމުކޮށްފައިވާ މައުލޫމާތު އެނގޭ މީހަކު ފުލުހުންގެ ހޮޓްލައިން ނަމްބަރު 3322111 އަށް ނުވަތަ ޖެނެރަލް އިންވެސްޓިގޭޝަން ނަމްބަރު 9631696 އަށް ގުޅުމަށް ވަނީ އެދިފަ އެވެ.

މީގެ އިތުރުން ފުލުހުން އަންގާރަ ދުވަހު ވަނީ އޭޑީކޭ ހޮސްޕިޓަލުގެ ޕްރައިވެޓް ރޫމަކުން ވައްކަން ކޮށްފައިވާކަމަށް ތުހުމަތުކުރެވޭ މައްސަލައަކާ ގުޅިގެން ތުހުމަތު ކުރެވޭ މީހެއްގެ ވީޑިއޯވެސް އާއްމު ކޮށްފަ އެވެ.

ފުލުހުން މިދެ ވީޑިޔޯ އާއްމުކޮށްފައިވާ އިރު، މިދުވަސް ވަރަކީ މަގުމަތީން ފޭރުމުގެ މައްސަލަތައް ގިނަ ވެފައިވާ ދުވަސް ވަރެއް ކަމަށް ފުލުހުން ބުނެ އެވެ. އެގޮތުން މަގުމަތީ ހިނގާ ބިނގާވެ އުޅޭ އިރު ފޯނު ފަދަ އަގު ބޮޑެތި ތަކެތި ގެންގުޅުމުގައި ހުރިހާ ފަރާތްތަކުންވެސް ސަމާލުވުމަށް ފުލުހުން ވަނީ އިލްތިމާސްކޮށްފަ އެވެ.