ދިވެހިރާއްޖެއިން ވަނީ ކޮވިޑްގެ ތެރޭގައި ފަތުރުވެރިކަން ހިންގައި، ދުނިޔެއަށް މިސާލު ދައްކާފައި: ކޮރެއާ

ދިވެހިރާއްޖެއިން ވަނީ ކޮވިޑްގެ ތެރޭގައި ފަތުރުވެރިކަން ހިންގައި، މުޅި ދުނިޔެއަށް މިސާލު ދައްކާފައިކަމަށް ކޮރެއާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ވިދާޅުވެއްޖެއެވެ.

ރާއްޖޭގެ މިނިވަން ދުވަހުގެ ތަހުނިޔާ ވިދާޅުވުމަށް ކުރެއްވި މެސެޖެއްގައި ކޮރެއާގެ ސަފީރު ވީޖިންގް ޖިއޮންގް ވަނީ، މިނިވަން ދުވަހުގެ ތަހުނިޔާ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށާއި، ދިވެހި ހުރިހާ ރައްޔިތުންނަށް ފޮނުއްވާފައެވެ.

ރާއްޖެއިން މިނިވަންކަމުގެ 56 އަހަރު ފުރިހަމަ ކުރާއިރު، ރާއްޖެއާއި ކޮރެއާގެ ގުޅުންވެސް ވަރަށް ބޮޑަށް ބަދަހިވެފައިވާކަން ސަފީރު ފާހަގަކުރެއްވިއެވެ. އެގޮތުން ރާއްޖެއަކީ ކޮރެއާއިން އަބަދުވެސް ޚާއްސަ އަހަންމިއްޔަތުކަމެއްދޭ ގައުމެއްކަމުގައި ފާހަގަކުރެއްވިއެވެ. ދިވެހިންނަކީ މަސައްކަތްތަތެރި އަދި މިނިވަންކަމަށް ލޯބިކުރާ ރައްޔިތުންތަކެއްކަން ވޭތުވެ ދިޔަ ތަނުގައި ސާބިތުކޮށްދީފައިވާކަމަށް ސަފީރު ވިދާޅުވިއެވެ. އެގޮތުން ރާއްޖޭގެ ފޮރިން މިނިސްޓަރ ޢަބްދުﷲ ޝާހިދު އދ. ގެ އާންމު މަޖިލީހުގެ ރިޔާސަތާ ހަވާލުވެވަޑައިގަތުމަށް ކުރެއްވި މަސައްކަތަށް 193 މެމްބަރުންގެ ތާއީދާއެކު ހޮވުމަކީ މިކަމުގެ އަލިގަދަ ހެތްކެއްކަމުގައި ސިފަކުރެއްވިއެވެ. މި ދަތުރުގައި ކޮރެއާއިން މިނިސްޓަރަށް އަބަދުވެސް ތާއީކުރެއްވިކަމަށްވެސް ވިދާޅުވިއެވެ.

1965 ވަނަ އަހަރުގެ ޖުލައި މަހުގެ 26 ވަނަ ދުވަހު ރާއްޖެއަށް މިނިވަންކަން ލިބުމަށްފަހު މުޅި ދުނިޔެއަށް މިސާލު ދައްކާފައިވާކަމަށް ސަފީރު ވިދާޅުވިއެވެ. އެގޮތުން އެންމެ ފަގީރު ގައުމުތަކުގެ ގިންތިން އަރައިގަތުމަށް ކުރި މަސައްކަތުން މިއަދު ރާއްޖެއަކީ މެދު މިނުގެ އާމްދަނީއެއް ލިބޭ ގައުމަކަށް ވެފައިވާކަން ފާހަގަކުރެއްވިއެވެ. މީގެ އިތުރުން ކޮވިޑް-19ގެ ތެރޭގައިވެސް ރާއްޖެއިން މިސާލު ދައްކުވައިދިންކަން ފާހަގަކުރެއްވިއެވެ. އެގޮތުން ކޮރެއާއާއި ރާއްޖެއިން ކޮވިޑްގެ ދަތި ހާލަތުގައިވެސް ފަތުރުވެރިކަން ހިންގައި، ދުނިޔެއަށް މިސާލު ދައްކާފައިކަމަށް ވިދާޅުވެފައެވެ. މި މެސެޖުގައި ސަފީރު ވަނީ ރާއްޖެއަށް ބޭނުންވާ ކަންކަމަށް މަގުފަހިކޮށްދިނުމަށް ކޮރެއާއިން މަދަދުވެރިވެދޭނެކަމުގެ ޔަގީންކަން ދެއްވާފައެވެ. އަދި ކޮވިޑް-19އިން އަރައިގަތުމަށް ވަރަށް ގާތުން މަސައްކަތްކުރާނެކަމުގެ ޔަގީންކަން އޭނާ ދެއްވިއެވެ.