ހޯރަފުށީގައި ލައިސަންސް ކާޑު ދޫކުރުމުގެ ޚިދުމަތް ފަށައިފި

ހއ. ހޯރަފުށި ކައުންސިލް މެދުވެރިކޮށް ލައިސަންސް ކާޑު ދޫކުރުމުގެ ޚިދުމަތް ފަށައި، ލައިސަންސް ނަގަން ދުއްވަން ދަސްކުރާ ސަރަހައްދު ރަސްމީކޮށް ހުޅުވައިފިއެވެ.

މި ޚިދުމަތް ރަސްމީކޮށް ފައްޓަވައި ދެއްވީ ހޯމަ ދުވަހު ހޯރަފުށީގައި ބޭއްވި ރަސްމިއްޔާތެއްގައި އެމްޓީސީސީގެ ސީއީއޯ އާދަމް އާޒިމެވެ. މި ޚިދުމަތާއެކު މީގެ ކުރިން އަތޮޅުގެ ވެރިކަން ކުރާ ރަށުން ލައިސަންސް ފޮތް ހޯދުމަށާއި، މާލެ ގޮސް ލައިސަންސް ނެގުމަށް ކުރަންޖެހޭ މަސައްކަތް ނިމުމަކަށް އައިސް ރަށުގައި ތިބެގެން ލައިސަންސް ކާޑު ލިބޭނެ ގޮތް މަގުފަހިވެގެންދާނެ ކަމަށެވެ.

މި ރަސްމިއްޔާތުގައި ވާހަކަ ދައްކަވަމުން ހޯރަފުށީ ކައުންސިލްގެ ރައީސް މުހައްމަދު ވަހީދު ވިދާޅުވީ މި މަސައްކަތަކީ ދާއިރާގެ މަޖިލިސް މެންބަރު އަހުމަދު ސަލީމްގެ އެހީތެރިކަމާއެކު ކުރެވުނު މުހިންމު މަސައްކަތެއް ކަމަށެވެ. އަދި މި މަސައްކަތާއެކު ރަށުގައި ތިބެގެން ފަސޭހަކަމާއެކު ލައިސަންސް ކާޑު ލިބިގެންދާނެ ކަމަށާއި، ކުރިން ލައިސަންސް ނެގުމަށް ކުރަން ޖެހުނު ދިގު ދަތުރުތައް ނިމުމަކަށް އަންނާނެ ކަމަށެވެ.

މި ރަސްމިއްޔާތުގައި ވާހަކަ ދައްކަވަމުން ހޯރަފުށީ ދާއިރާގެ މެންބަރު އަހުމަދު ސަލީމް ވިދާޅުވީ ތަރައްގީގެ ގޮތުން ނަމަވެސް މިއަދު އެޅިގެން މިދަނީ މުހިންމު މަސައްކަތެއް ކަމަށާއި، ކުރިން ރަށުގައި ތިބެގެން ލައިސަންސް ލިބޭނެ އެއްވެސް ގޮތެއް ނޯންނަ ކަމަށާއި، ލައިސަންސް ފޮތް ކުރިން ހޯދަން ޖެހެނީ މާލެއަށް ނުވަތަ އަތޮޅު ވެރިކަން ކުރާ ރަށަކަށް ގޮސްގެން ކަމަށެވެ.

އެހެންނަމަވެސް މި ޚިދުމަތް ހޯދުމަށް ކުރަން ޖެހުނު ދަތުރު މިވަނީ ނިމުމަކަށް އައިސްފައި ކަމަށާއި، އަމިއްލަ ރަށުން ޚިދުމަތް ލިބޭނެ ގޮތް މިވަނީ ފަހިވެފައި ކަމަށެވެ.

ލައިސަންސް ކާޑުގެ ޚިދުމަތާއެކު ހޯރަފުށީގައި ވަނީ އެއްގަމު ލައިސަންސް ނެގުމަށް ވަކި ސަރަހައްދެއް ހަމަޖައްސައި، ލައިސަން ނެގުމަށް ޕްރެކްޓިކަލް ހެދުމަށާއި ދަސްކުރުމަށް ވަކި ސަރަހައްދެއް ހަމަޖައްސާފައެވެ. މިތަން ހަދާފައި ވަނީ ކައުންސިލާ ގުޅިގެން ސީއެސްއާރުގެ ދަށުން ފެނަކަ ކޯޕަރޭޝަނުންނެވެ.