ބިލެއްފަހި ބަނދަރުގެ މަސައްކަތް ފެބްރުއަރީގެ ކުރިން ނިންމާނަން – އާޒިމް
ބަނދަރުގައި މިހާރު ކުރަމުންދާ މަސައްކަތަކީ އެއްގަމުތޮށި ލުމުގެ މަސައްކަތް
ބިލެއްފަހި ބަނދަރުގެ މަސައްކަތް ކުރިއަށްދަނީ
ށ. ބިލެއް ފަހީގެ ބަނދަރުގެ މަސައްކަތް އަންނަ ފެބްރުއަރީގެ ކުރިން ނިންމާނެ ކަމުގެ ޔަގީންކަން އެމްޓީސީސީގެ ސީއީއޯ އާދަމް އާޒިމް ދެއްވައިފިއެވެ.
އެމްޓީސީސީން ބިލެއްފަހީގައި ކުރިއަށްގެންދާ މަޝްރޫއުގެ މަސައްކަތް ބައްލަވާލެއްވުމަށް ކުރެއްވި ދަތުރުގައި ރާއްޖެޓީވީއާ ވާހަކަ ދައްކަވަމުން އާޒިމް ވިދާޅުވީ އާދީއްތަ ދުވަހު ބިލެއްފަހީ ބަނދަރުގެ އެއްގަމު ތޮށީގެ ކޮންކްރީޓް ބްލޮކް އެތުރުމުގެ މަސައްކަތް ފަށާފައިވާ ކަމަށާއި، މަސައްކަތް ކުރިއަށްދާ ގޮތަށް ބަލައި ނިންމަން ހަމަޖެހިފައިވާ ތާރީޚުގެ ކުރިން މަސައްކަތް ނިންމާނެ ކަމަށެވެ.
28.42 މިލިއަން ރުފިޔާގެ މި މަޝްރޫއުގެ މަސައްކަތް ނިންމުމަށް ހަމަޖެހިފައިވަނީ އަންނަ އަހަރުގެ ފެބްރުއަރީ މަހުގެ ތެރޭގައެވެ. އާޒިމް ވިދާޅުވީ މަސައްކަތަށް ގެންނަން ޖެހޭ ބައެއް ބަދަލުތައް ގެނެސް ކައުންސިލާއި ރައްޔިތުން ބޭނުންވާ ގޮތަށް މަސައްކަތް ކޮށް ނިންމައި، ޒަމާނީ ބަނދަރެއް ބިލެއްފަހީގެ ރައްޔިތުންނަށް ލިބިގެންދާނެ ކަމަށެވެ.
އަދި މި ބަނދަރުވެގެންދާނީ ޒަމާނީ އަދި ފެންވަރު ރަނގަޅު ބަނދަރަކަށް ކަމަށާއި، މީގެ ކުރިން ދިމާވި މައްސަލަތައް ބަނދަރާއެކީގައި ހައްލުވެގެންދާނެ ކަމަށެވެ.
ރާއްޖެއެމްވީއާ ވާހަކަ ދައްކަވަމުން ބިލެއްފަހި ކައުންސިލްގެ ރައީސް ވިދާޅުވީ މަސައްކަތް ކުރިއަށްދާ ގޮތާ މެދު ހިތްހަމަޖެހޭ ކަމަށާއި، އުއްމީދަނީ ބަނދަރުގެ މަސައްކަތް ނިމި ރައްޔިތުންނަށް އެކަމުގެ ފައިދާ ލިބިގެން ދިއުން ކަމަށެވެ. އަދި އެމްޓީސީސީގެ މަސައްކަތާއި ދޭތެރޭގައި ހިތްހަމަ ޖެހިވަޑައިގަންނަވާ ކަމަށާއި، ކައުންސިލާއި ރައްޔިތުން އެދުނު ގޮތަށް ބަނދަރަށް ގެންނަން ބޭނުންވާ ބަދަލުތައް ގެނެސްދީފައިވާ ކަމަށެވެ.
ބިލެއްފަހި ބަނދަރުގެ މަސައްކަތުގެ ބޮޑުބައެއް ނިމިފައިވާ އިރު މިހާރު ކުރަމުންދަނީ އެއްގަމު ތޮށި ލުމުގެ މަސައްކަތެވެ. ހައުސިން މިނިސްޓްރީގެ ފަރާތުން މި މަސައްކަތް އެމްޓީސީސީއާ ހަވާލުކޮށްފައިވަނީ ޑިސެމްބަރު 2019 ގައެވެ.
މި މަޝްރޫއުގެ ދަށުން 24،125 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުމާއި، 376 މީޓަރުގެ ސަރަހައްދެއްގައި ބޭރުތޮށި ލުމާއި، 98 މީޓަރުގެ ސަރަހައްދެއްގައި އެއްގަމުތޮށިލުމާއި، 1159 އަކަ މީޓަރުގެ ސަރަހައްދެއްގައި ޕޭވްމަންޓް ހެދުމާއި މަގުބައްތި ޖެހުން ހިމެނެއެވެ.
