މިސްބާހު ހިފެހެއްޓުމަށް އިމިގްރޭޝަނަށް އަންގާފައެއް ނެތް

ހދ.ނޮޅިވަރަންފަރު މިސްބާހު މުހައްމަދު ހިފެހެއްޓުމަށް އަންގާފައި ނުވާކަމަށް މޯލްޑިވްސް އިމިގްރޭޝަނުން ބުނެފިއެވެ.

އިމިގްރޭޝަނުން ބުނީ މިސްބާހު ހިފެހެއްޓުމަށް އެއްވެސް ކޯޓު އަމުރެއް އިމިގްރޭޝަނަށް ލިބިފައިނުވާ ކަމަށެވެ. އިމިގްރޭޝަނުން ފުރާ މީހުންނާ އަންނަ މީހުން ހިފަހައްޓާނީ ކޯޓު އަމުރެއް އެކަމަށް ލިބުމުން ކަމުގައި އިމިގްރޭޝަނުން މައުލޫމާތުދެއެވެ. އެފަދަ އަމުރެއް ނެތުމުން އޭނާއަށް އިމިގްރޭޝަން ކައުންޓަރުން ކްލިއަރެންސް ލިބުނީ ކަމަށް ބުނެއެވެ.

ހދ. ނޮޅިވަރަންފަރު، މޯނިންގސަން، މިސްބާހު މުހައްމަދު ގެއްލިގެން އޭނާ ހޯދުމަށް ފުލުހުން އިއުލާންކުރީ މިދިޔަ މޭމަހުގެ 14 ވަނަ ދުވަހުއެވެ. އޭނާ މާލެ އައިސްފައިވަނީ 23 ވަނަ ދުވަހު ކޮލަމްބޯއިން ފުރައިގެން ރާއްޖެ އައި، ސްރީލަންކަން އެއަރލައިންގެ ފްލަިއޓް، UL101 ގައެވެ.

ރާއްޖެޓީވީގެ "ފަށާއިރު" ޕްރޮގްރާމްގައި ވާހަކަދައްކަވަމުން ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަަރީފު ހޮނިހިރު ދުވަހު ވިދާޅުވެފައިވަނީ، ބޭރު ގައުމެއްގައި ހުރެފައި މިސްބާހު ރާއްޖެއައިސް އިމިގްރޭޝަން ކްލިއަރ ވެގެން އޭނާ އެންމެ ލަގެޖަކާއެކު ނުކުންނަން އަންނަނިކޮށް ކަސްޓަމްސްގެ އޮފިސަރަކަށް ޝައްކުވެ، ޕާސްޕޯޓާއި އެހެނިހެން ލިޔެކިޔުންތައް ބެލި ބެލުމުން އެއީ ހޯދަން އިއުލާން ކޮށްފައިވާ މީހެއްކަން އެނގުމުން ހިފެހެއްޓީ ކަމަށެވެ. އޭނާ ހިފެހެއްޓުމަށްފަހު ފުލުހުންނާ ގުޅައި މައުލޫމާތު ހިއްސާކުރީ ކަމަށް ޝަރީފު ވިދާޅުވިއެވެ. އޭނާ މިހާރު ހުރީ ފުލުހުންގެ ބެލުމުގެ ދަށުގައެވެ.

މިސްބާހުގެ މައްޗަށް ޑްރަގް ކޯޓުން 3 އަހަރުގެ ޖަލު ހުކުމެއް އިއްވާފައިވަނީ، މި އަހަރުގެ ޖޫން މަހުއެވެ. މޯލްޑިވްސް ކަރެކްޝަނަލް ސަރވިސް އިން ބުނީ، މިސްބާހު އަދި ކަރެކްޝަނާ ހަވާލުކޮށްފައި ނުވާ ކަމަށެވެ.

މިސްބާހު ގެއްލިގެން އޭނާގެ އާއިލާއިން ފުލުހުންނަށް ރިޕޯޓުކުރީ އެޕްރީލް މަހުން ފެށިގެން އޭނާގެ އެއްވެސް ޚަބަރެއް ނުވުމުންނެވެ. މިކަމާ ގުޅޭގޮތުން ޖޫން މަހު ފުލުހުން ބުނީ، މިސްބާހު ހުރީ ޕާކިސްތާނުގެ ޑްރަގް ނެޓްވާރކެއްގައި ރަހީނުކޮށްފައި ކަމަށެވެ. އޭނާ ރާއްޖެއިން ބޭރަށް ދިޔައި، 2020 ނޮވެމްބަރު މަހުގެތެރޭގައި ކަމަށް ފުލުހުންވަނީ ބުނެފައެވެ.

ފުލުހުންގެ ސްޓޭޓްމެންޓާއެކު މިސްބާހުގެ ވީޑިއޯއެއްވެސް އާއްމުވިއެވެ. އެ ވީޑިއޯގައި އޭނާ ބުނެފައިވަނީ، އޭނާއަކީ ޑްރަގު ނެޓްވޯކަކާ ގުޅުމެއް ހުރި މީހެއް ނޫންކަމަށާއި, ދިވެހި ފުލުހުން ހަދަމުންދަނީ ދޮގު ކަމަށެވެ.